 |
ໃນກອງປະຊຸມ, ໄດ້ຮັບຟັງການນໍາສະເໜີໂດຍຫຍໍ້ກ່ຽວກັບເນື້ອໃນຂໍ້ສະຫຼຸບ ກອງປະຊຸມເຄືອຄ່າຍແມ່ນໍ້າສົມບູນ ຄັ້ງທີ I ແລະ II, ຜົນການຕິດຕາມຄຸນນະພາບນໍ້າ ໃນອ່າງຮັບນໍ້າເຊບັ້ງໄຟ ພ້ອມທັງຮັບຟັງການນໍາສະເໜີແຜນການຄຸ້ມຄອງສິ່ງແວດລ້ອມ ຈາກຕາງໜ້າບໍລິສັດການລົງທຶນຂະໜາດໃຫຍ່ ຢູ່ໃນແຂວງຄໍາມ່ວນ ເປັນຕົ້ນ: ລາວຄາຍຢວນ ບໍ່ແຮ່ ຈຳກັດ, ບໍລິສັດ ຄໍາມ່ວນຊີມັງ.ນອກນີ້, ກອງປະຊຸມຍັງໄດ້ເປີດກວ້າງ ເພື່ອໃຫ້ບັນດາຜູ້ເຂົ້າຮ່ວມໄດ້ປະກອບຄໍາຄິດເຫັນແລກປ່ຽນດ້ານຄວາມຮູ້, ບົດຮຽນ ແລະ ປະສົບການ ນໍາໄປໝູນໃຊ້ເຂົ້າໃນການປະຕິບັດຕົວຈິງ ໃນການຄຸ້ມຄອງທາງດ້ານປະລິມານ ແລະ ຄຸນນະພາບ ໃຫ້ມີປະສິດທິຜົນ ແລະ ເກີດປະໂຫຍດສູງສຸດ.
ໂຄງການຄຸ້ມຄອງອ່າງຮັບນໍ້າໂດຍການມີສ່ວນຮ່ວມຈາກຊຸມຊົນ ໃນແຂວງຄຳມ່ວນ ມີເປົ້າໝາຍຈັດຕັ້ງປະຕິບັດຢູ່ 5 ເມືອງຄື: ເມືອງເຊບັ້ງໄຟ, ມະຫາໄຊ, ໜອງບົກ, ຍົມມະລາດ ແລະ ເມື່ອງບົວລະພາ, ກວມເອົາ 18 ບ້ານ, ງົບປະມານໂຄງການທັງໝົດ 273,653 ໂດລາສະຫະລັດ, ອາຍຸຂອງໂຄງການ 2 ປີ (2025-2027),ກິດຈະກຳຫຼັກຂອງໂຄງການ: ເພື່ອປັບປຸງຖານຂໍ້ມູນຊັບພະຍາກອນນໍ້າ ແລະ ຂະບວນການວາງແຜນທີ່ກ່ຽວຂ້ອງໃຫ້ດີຂຶ້ນ ໂດຍສ້າງຄວາມເຂັ້ມແຂງ ໃນການວິເຄາະຂໍ້ມູນ, ເພີ່ມການມີສ່ວນຮ່ວມ, ຄຸ້ມຄອງຊັບພະຍາກອນນໍ້າຂັ້ນທ້ອງຖິ່ນ, ແຜນຄຸ້ມຄອງອ່າງຮັບນໍ້າ ທີ່ກໍາລັງດໍາເນີນຢູ່ ແລະ ປັບປຸງຄຸ້ມຄອງຊັບພະຍາກອນນໍ້າຂອງຊຸມຊົນຕິດພັນກັບການປົກປັກຮັກສາທີ່ດິນບໍລິເວນນໍ້າ, ສ້າງຄວາມທົນທານໃນການປ່ຽນແປງດິນຟ້າອາກາດ, ສົ່ງເສີມ ແລະ ສ້າງກົນໄກການຄຸ້ມຄອງອ່າງຮັບນໍ້າທີ່ເຂັ້ມແຂງ ໂດຍການມີສ່ວນຮ່ວມຢ່າງຕັ້ງໜ້າຂອງຊຸມຊົນ ຕາມຫຼັກການຄຸ້ມຄອງຊັບພະຍາກອນນໍ້າແບບເຊື່ອມສານ ແນໃສ່ການຄຸ້ມຄອງນໍ້າ ແລະ ຊັບພະຍາກອນນໍ້າ ເຂົ້າໃນພາລະບົດບາດ ແລະ ຄວາມຮັບຜິດຊອບຂອງແຕ່ລະພາກສ່ວນໃນສັງຄົມ ເພື່ອຮັກສາຄວາມອຸດົມສົມບູນ ແລະ ຄວາມຫຼາກຫຼາຍດ້ານຊີວະນາໆພັນ ແລະ ນິເວດວິທະຍາ ທັງເປັນການຫຼຸດຜ່ອນບັນຫາທີ່ອາດຈະນໍາໄປສູ້ການເກີດມົນລະພິດທາງນໍ້າ.
 |
ທ່ານ ນາງ ໂສພາວັນ ຣາດຊະພົງ ຫົວໜ້າໂຄງການຄຸ້ມຄອງອ່າງຮັບນໍ້າໂດຍການມີສ່ວນຮ່ວມຈາກຊຸມຊົນ ໃນແຂວງຄຳມ່ວນໄດ້ນໍາສະເໜີຜົນການຕິດຕາມຄຸນນະພາບນໍ້າ ຊຶ່ງໃຫ້ເຫັນເຖິງການຄົ້ນພົບ ໄມພາສຕິກ ຢູ່ໃນສັດນໍ້າ (ປາ) ຊຶ່ງອາດຈະສົ່ງຜົນກະທົບຕໍ່ສຸຂະພາບ ແລະ ລະບົບນິເວດ ໃນຕໍ່ໜ້າ. ສະນັ້ນ, ຈຶ່ງມີຄວາມຈໍາເປັນໃຫ້ທຸກພາກສ່ວນຊ່ວຍປະຊາສຳພັນ ແລະ ປູກຈິດສຳນຶກ ໃນການຮັກສາສິ່ງແວດລ້ອມ ໂດຍສະເພາະແຫຼ່ງນໍ້າໃຫ້ມີຄວາມສະອາດ ແລະ ອຸດົມສົມບູນ ໃນອະນາຄົດ.
(ຂ່າວ-ພາບ: ກອງຄໍາ)
ຄໍາເຫັນ