ລາຄານ້ຳມັນ ໃນກຳປູເຈຍຍັງສືບຕໍ່ເພີ່ມຂຶ້ນ

ຂ່າວສານຊີອາໄອລາຍງານວ່າ: ໃນວັນ​ທີ 16 ມີ​ນາ​ ຜ່ານມາ, ຫ້ອງ​ການ​ຖະ​ແຫຼງ​ຂ່າວ​ຂອງ​​ລັດ​ຖະ​ບານ​ຈີນ​ໄດ້​ຈັດ​ກອງ​ປະ​ຊຸມ​ຖະ​ແຫຼງ​ຂ່າວ​ ເພື່ອ​ແຈ້ງ​ສະ​ພາບ​ການເຄື່ອນ​ໄຫວຂອງ​ເສດ​ຖະ​ກິດ​ຈີນ​ນັບ​ແຕ່ເດືອນ​ມັງ​ກອນ​ ຫາ ​ກຸມ​ພາ​ປີນີ້.

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 17 ມີນາ ຜ່ານມາ ຢູ່ນະຄອນຫຼວງຮ່າໂນ້ຍ, ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ໄດ້ເຮັດວຽກກັບກະຊວງອຸດສາຫະກຳ - ການຄ້າ ແລະ ບາງກະຊວງ, ຂະແໜງການທີ່ກ່ຽວຂ້ອງກ່ຽວກັບສາຍພົວພັນດ້ານການຄ້າສາກົນ ແລະ ການເຊື່ອມຕໍ່ການຄ້າກັບຄູ່ຮ່ວມມືສຳຄັນໃນສະພາບພູມີສາດ - ການເມືອງ, ພູມີສາດ - ເສດຖະກິດໂລກໃນປັດຈຸບັນ.

ຂ່າວຕ່າງປະເທດລາຍງານວ່າ: ກະຊວງສາທາລະນະສຸກກຳປູເຈຍໄດ້ເປີດເຜີຍໃນວັນທີ 15 ມີນາ ຜ່ານມາວ່າ: ແມ່ຍິງອາຍຸ 45 ປີ ໃນແຂວງບັນເຕຍມຽນເຈຍ ທາງພາກຕາເວັນຕົກສ່ຽງເໜືອຂອງປະເທດ ໄດ້ກວດພົບວ່າຕິດເຊື້ອໄວຣັດໄຂ້ຫວັດສັດປີກ H5N1 ຊຶ່ງເປັນກໍລະນີທີ 2 ໃນປີນີ້. ຄົນເຈັບອາໄສຢູ່ໃນບ້ານໂຣພັກ ເມືອງພະເນດພຣະ, ໂດຍສະຖາບັນສາທາລະນະສຸກແຫ່ງຊາດ (NIPH) ໄດ້ຢືນຢັນຜົນກວດເປັນບວກໃນທີ 14 ມີນາ ຜ່ານມາ.

ຂ່າວຕ່າງປະເທດລາຍງານ ໃນວັນທີ 16 ມີນາ ຜ່ານມາວ່າ: ປະຊາຊົນຈຳນວນຫຼາຍໄດ້ມີການຕໍ່ຄິວຍາວຢູ່ຕໍ່ໜ້າບໍລິສັດຈຳໜ່າຍແກ໊ສປຸງແຕ່ງອາຫານ (LPG) ຂອງເອກະຊົນໃນຫຼາຍພື້ນທີ່ທົ່ວປະເທດອິນເດຍ ໃນວັນທີ 13 ມີນາຜ່ານມາ, ລວມທັງໃນນະຄອນຫຼວງນິວເດລີ, ໂດຍມີການລາຍງານບັນຫາການຈອງການເຕີມແກ໊ສປຸງແຕ່ງອາຫານໃນຄົວເຮືອນຜ່ານລະບົບອອນລາຍ ທ່າມກາງຄວາມຂັດແຍ້ງທີ່ຍັງດຳເນີນຢູ່ໃນຕາເວັນອອກກາງ.

ຂ່າວຕ່າງປະເທດລາຍງານວ່າ: ສື່ມວນຊົນທ້ອງຖິ່ນຂອງຍີ່ປຸ່ນລາຍງານວ່າ, ຍີ່ປຸ່ນໄດ້ເລີ່ມປ່ອຍນ້ຳມັນຈາກຄັງສຳຮອງແຫ່ງຊາດໃນວັນທີ 16 ມີນາ ຜ່ານມາ ເພື່ອຫຼຸດຜ່ອນຄວາມກັງວົນກ່ຽວກັບການສະໜອງທ່າມກາງຄວາມຂັດແຍ້ງທີ່ເພີ່ມຂຶ້ນໃນຕາເວັນອອກກາງ ແລະ ເພື່ອຮັບປະກັນການສະໜອງຜະລິດຕະພັນນ້ຳມັນຢ່າງໝັ້ນຄົງ.

ຂ່າວຕ່າງປະເທດລາຍງານຫວ່າງມໍ່ໆມານີ້ວ່າ: ອົງການພະລັງງານສາກົນ (IEA) ໄດ້ເປີດເຜີຍວ່າ, ຕະຫຼາດນ້ຳມັນໂລກກຳລັງປະເຊີນກັບການຢຸດສະງັກຂອງການສະໜອງຄັ້ງໃຫຍ່ທີ່ສຸດໃນປະຫວັດສາດ, ຫຼັງຈາກຄວາມຂັດແຍ່ງໃນຕາເວັນອອກກາງສົ່ງຜົນກະທົບຮ້າຍແຮງຕໍ່ການຂົນສົ່ງພະລັງງານໃນພາກພື້ນ.

ຂ່າວສານຊີອາໄອລາຍງານວ່າ: ໃນວັນ​ທີ 16 ມີ​ນາ​ ຜ່ານມາ, ກົມ​ສະ​ຖິ​ຕິ​ແຫ່ງ​ຊາດ​ຈີນ​ໄດ້​ເປີດ​ເຜີຍ​ຂໍ້​ມູນ​ໂດຍ​ສະ​ແດງ​ໃຫ້​ເຫັນ​ວ່າ: ນັບ​ແຕ່ເດືອນ​ມັງ​ກອນ ​ຫາ ​ເດືອນ​ກຸມ​ພາ​​ປີ​ນີ້, ການ​ເຕີບ​ໂຕ​ດ້ານ​ການ​ຜະ​ລິດ​ ແລະ ການ​ສະ​ໜອງ​​ໄດ້​ໄວ​ຂຶ້ນ, ຄວາມ​ຕ້ອງ​ການ​ຂອງ​ຕະ​ຫຼາດ​ເພີ່ມ​ຂຶ້ນ​ຢ່າງ​ໝັ້ນ​ທ່ຽງ, ລາ​ຄາ​ສິນ​ຄ້າ ​ແລະ​ ການ​ປະ​ກອບ​ອາ​ຊີບ​ມີ​​ຄວາມ​ໝັ້ນ​ທ່ຽງ​ໂດຍ​ລວມ, ກຳ​ລັງ​ການ​ຜະ​ລິດໃນ​ຄຸນ​ນະ​ພາບ​ໃໝ່​ໄດ້​ມີ​ການ​ພັດ​ທະ​ນາ​, ເສດ​ຖະ​ກິດ​ໄດ້​ເລີ່ມ​ຕົ້ນ​ຢ່າງ​ເຂັ້ມ​ແຂງ ແລະ ບັນ​ລຸ​ການ​ເລີ່ມ​ຕົ້ນ​ທີ່​ດີ.

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 16 ມີນາ ຜ່ານມາ ຢູ່ນະຄອນຫຼວງຮ່າໂນ້ຍ, ທ່ານຟ້າມມິງຈິງ ນາຍົກລັດຖະມົນຕີຫວຽດນາມ ໄດ້ເປັນປະທານບັນດາກອງປະຊຸມຂອງຄະນະປະຈຳລັດຖະບານເພື່ອປະກອບຄຳເຫັນກ່ຽວກັບບາງເນື້ອໃນສຳຄັນເພື່ອປະຕິບັດເປົ້າໝາຍນຳການເຕີບໂຕເສດຖະກິດບັນລຸລະດັບ 10% ຂຶ້ນໄປ, ຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້, ຮັບປະກັນບັນດາຄວາມດຸ່ນດ່ຽງໃຫຍ່ຂອງພື້ນຖານເສດຖະ ກິດໃນສະພາບການປະສົບກັບຄວາມຫຍຸ້ງຍາກ, ສິ່ງທ້າທາຍ, ຂໍ້ຕິດຂັດຫຼາຍຢາງ, ໂຄງການຍັງຄົງຄ້າງ, ແກ່ຍາວ, ປຸກ ລະດົມ ແລະ ນຳໃຊ້ບັນດາແຫຼ່ງກຳລັງຢ່າງມີປະສິດທິຜົນ, ຊຸກຍູ້ບັນດາກຳລັງໜູນພັດທະນາ, ປະກອບສ່ວນເຂົ້າໃນການພັດທະນາໂດຍໄວ ແລະ ຍືນຍົງ.

ຂ່າວສານຊີອາໄອລາຍງານວ່າ: ໃນວັນ​ທີ 15 - 16 ມີ​ນາ​ນີ້​ (ຕາມ​ເວ​ລາ​ທ້ອງ​ຖິ່ນ) ຈີນ​-ອາ​ເມ​ຣິ​ກາ ໄດ້ຈັດ​ການ​ເຈ​ລະ​ຈາ​ເສດ​ຖະ​ກິດ​ການ​ຄ້າ​ຢູ່​ນະ​ຄອນ​ຫຼວງ​ປາ​ຣີ​ ຂອງ​ຝ​ຣັ່ງ. ທ່ານ ຫຼີ​ເຊີງ​ກ່າງ ຜູ້​ແທນ​ການ​ເຈ​ລະ​ຈາ​ການ​ຄ້າ​ສາ​ກົນ ທັງ​ເປັນ​ຮອງ​ລັດ​ຖະ​ມົນ​ຕີ​ກະ​ຊວງ​ການ​ຄ້າ​ຈີນ​ກ່າວ​ວ່າ: ໃນ​​ໜຶ່ງ​ມື້​ເຄິ່ງ​ຜ່ານ​ມາ, ຄະ​ນະ​ຜູ້​ແທນ​ຂອງ​ທັງ​ສອງ​ຝ່າຍ​ໄດ້​ດຳ​ເນີນ​ການ​ເຈ​ລະ​ຈາ​ກົງ​ໄປ​ກົງ​ມາ, ​ເລິກເຊິ່ງ ແລະ ​ມີ​ລັກ​ສະ​ນະ​ສ້າງ​ສັນ, ໂດຍ​ໄດ້ບັນ​ລຸ​ຄວາມ​ຮັບ​ຮູ້​ທີ່​ເປັນ​ເອ​ກະ​ພາບ​ກັນ​​​ເບື້ອງ​ຕົ້ນ​ກ່ຽວ​ກັບ​ຫົວ​ຂໍ້​ຫາ​ລື​ຈຳ​ນວນ​ໜຶ່ງ. ຕໍ່​ໄປ, ສອງ​ຝ່າຍ​ຈະ​ດຳ​ເນີນ​ການ​ເຈ​ລະ​ຈາ​ຕາມ​​ຂັ້ນ​ຕອນ​ຕໍ່​ໄປ.

ຂ່າວຕ່າງປະເທດລາຍງານ ໃນວັນທີ 15 ມີນາ ຜ່ານມາວ່າ: ກະຊວງພະລັງງານສີລັງກາ ລາຍງານວ່າ, ສີລັງກາ ໄດ້ເລີ່ມຈຳໜ່າຍນໍ້າມັນເຊື້ອໄຟໃຫ້ແກ່ຍານພາຫະນະຜ່ານລະບົບລະຫັດ QR ແລະສະຖານີນໍ້າມັນເຊື້ອໄຟຈະບໍ່ຈຳໜ່າຍນໍ້າມັນເຊື້ອໄຟໃຫ້ແກ່ຍານພາຫະນະທີ່ບໍ່ມີລະຫັດ QR. ມາດຕະການນີ້ເພື່ອຄຸ້ມຄອງຄັງສຳຮອງນໍ້າມັນເຊື້ອໄຟຂອງປະເທດ ທ່າມກາງການສະໜອງທີ່ຢຸດສະງັກຈາກສະຖານະການຄວາມຂັດແຍ່ງໃນຕາເວັນອອກກາງ.