 |
ທ່ານ ພົນໂທ ຄໍາກິ່ງ ຜຸຍຫຼ້າມະນີວົງ ກ່າວວ່າ: ສປປ ລາວ ເປັນປະເທດໜຶ່ງທີ່ໄດ້ຮັບຜົນກະທົບຈາກການຄ້າມະນຸດໂດຍກົງ ແລະ ທາງອ້ອມເກີດຂຶ້ນຫຼາຍກວ່າໝູ່ແມ່ນການແຕ່ງດອງແອບແຝງ, ການຖ່າຍຮູບພາບ, ສະແດງ, ເຜີຍແຜ່ສິ່ງລາມົກ, ການຄ້າປະເວນີຂອງຜູ້ອື່ນ ແລະ ບັງຄັບໃຫ້ເປັນໂສເພນີ, ການໃຫ້ຖືພາແທນ ແລະ ການຂູດຮີດແຮງງານ ຊຶ່ງໃນ 1 ປີຜ່ານມາ, ລັດຖະບານໄດ້ນຳພາ-ຊີ້ນຳການຈັດຕັ້ງປະຕິບັດວຽກງານຕ້ານການຄ້າມະນຸດຢ່າງຈິງຈັງ ເປັນຕົ້ນການຈັດຕັ້ງປະຕິບັດແຜນງານແຫ່ງຊາດ ວ່າດ້ວຍການຕ້ານການຄ້າມະນຸດໄລຍະ 3 (2021-2025) ຢ່າງເປັນຮູບປະທຳ ຊຶ່ງໃນປີ 2025 ນີ້ແມ່ນປີສຸດທ້າຍຂອງໄລຍະການຈັດຕັ້ງປະຕິບັດແຜນງານດັ່ງກ່າວ ໂດຍຄະນະກຳມະ ການຕ້ານການຄ້າມະນຸດລະດັບຊາດ ໄດ້ສະຫຼຸບການຈັດຕັ້ງປະຕິບັດແຜນງານດັ່ງກ່າວ ພ້ອມທັງກະກຽມສ້າງແຜນງານແຫ່ງຊາດ ວ່າດ້ວຍການຕ້ານການຄ້າມະນຸດໄລຍະ 4 (ແຕ່ປີ 2026-2030) ເພື່ອໃຫ້ການຈັດຕັ້ງປະຕິບັດວຽກງານຕ້ານການຄ້າມະນຸດສືບຕໍ່ຢ່າງເປັນປົກກະຕິ ແລະ ໄດ້ຮັບປະສິດທິພາບສູງກວ່າເກົ່າ. ເອົາໃຈໃສ່ວຽກໂຄສະນາເຜີຍແຜ່ບັນດາວຽກງານຕ້ານການຄ້າມະນຸດ, ຜົນຮ້າຍຂອງການຄ້າມະນຸດຜ່ານຫຼາຍຊ່ອງທາງ ເປັນຕົ້ນຜ່ານສື່ສັງຄົມອອນລາຍ, ວິທະຍຸ, ໂທລະພາບ, ໜັງສືພິມ, ລົງໂຄສະນາຕາມສະຖານທີ່ມີຄວາມສ່ຽງ ເພື່ອໃຫ້ປະຊາຊົນຮັບຮູ້ ແລະ ເຂົ້າໃຈຄວາມເປັນອັນຕະລາຍ ແລະ ຜົນກະທົບຂອງການຄ້າມະນຸດ; ເອົາໃຈໃສ່ໃນການປະຕິບັດມາດຕະການທາງດ້ານກົດ ໝາຍ ຕິດຕາມເປົ້າໝາຍ ແລະ ນຳຈັບຕົວຜູ້ກະທຳຜິດມາດຳເນີນການສືບສວນ-ສອບສວນດຳເນີນຄະດີຕາມລະບຽບກົດໝາຍຂອງ ສປປ ລາວ ຢ່າງເຂັ້ມງວດ. ເຮັດໃຫ້ກຸ່ມຄົນທີ່ພະຍາຍາມກໍ່ການກະທຳຜິດ ຫຼື ກຳລັງກະທຳຜິດຮັບຮູ້ໄດ້ເຖິງໂທດທີ່ແທ້ຈິງໃນສະຖານຄ້າມະນຸດໃຫ້ພວກກ່ຽວຢຸດເຊົາຄວາມພະຍາຍາມ ແລະ ການກະທຳຂອງຕົນ ໂດຍຄຽງຄູ່ກັບການດຳເນີນຄະດີເອົາຜູ້ກະທຳຜິດມາລົງໂທດ ພ້ອມທັງປົກປ້ອງຊ່ວຍເຫຼືອຜູ້ຖືກເຄາະຮ້າຍ, ກຸ່ມສ່ຽງຈາກການຄ້າມະນຸດທັງພາຍໃນ ແລະ ຈາກຕ່າງປະເທດຕາມລະບຽບການ ແລະ ກົດໝາຍທີ່ກ່ຽວຂ້ອງ.
ການຈັດງານໃນຄັ້ງນີ້, ເພື່ອໂຄສະນາແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດກ່ຽວກັບການສະກັດກັ້ນ ແລະ ຕ້ານການຄ້າມະນຸດ ລວມທັງຜົນສຳເລັດຂອງການເຄື່ອນໄຫວວຽກງານດັ່ງກ່າວ ເພື່ອໂຄສະນາປູກຈິດສຳນຶກໃຫ້ສັງຄົມຮັບຮູ້ຄວາມໝາຍ, ຄວາມສຳຄັນ, ຜົນຮ້າຍ ເພື່ອມີສະຕິປ້ອງກັນຕົວບໍ່ໃຫ້ຕົກເປັນຜູ້ຖືກເຄາະຮ້າຍຈາກການຄ້າມະນຸດ ເພື່ອປະຕິບັດພັນທະຂອງ ສປປ ລາວ ໃນນາມເປັນພາຄີຂອງອະນຸສັນຍາວ່າດ້ວຍການສະກັດກັ້ນ, ປາບປາມ ແລະ ລົງໂທດຈາກການຄ້າມະນຸດໂດຍສະເພາະແມ່ຍິງ ແລະ ເດັກນ້ອຍ. ພາຍໃນງານໄດ້ມີການສະແດງສິລະປະ, ສໍາມະນາກ່ຽວກັບວຽກງານຕ້ານການຄ້າມະນຸດ, ຖາມ-ຕອບຄວາມຮູ້ ແລະ ແຈກຢາຍສື່ໂຄສະນາຕ້ານການຄ້າມະນຸດ.
ຂ່າວ: ທິດາ ສິດທິໄຊ
ຄໍາເຫັນ