ທ່ານ ສຸບັນ ສະວະບຸດ ປະທານກຳມາທິການວຽກງານສະມາຊິກສະພາແຫ່ງຊາດ ແຫ່ງ ສປປ ລາວ ໄດ້ພົບປະກັບ ທ່ານ ນາງ ຫງວຽນ ແທັງຮ່າຍ ຫົວໜ້າຄະນະກຳມະການວຽກງານ ສະມາຊິກສະພາແຫ່ງຊາດ ແຫ່ງ ສສ ຫວຽດນາມ ໃນວັນທີ 19 ຕຸລານີ້ ທີ່ນະຄອນຫຼວງວຽງຈັນ.
ໃນໂອກາດດັ່ງກ່າວ ທ່ານ ສຸບັນ ສະວະບຸດ ໄດ້ສະແດງຄວາມຍິນດີ ແລະ ຊົມເຊີຍຕໍ່ ສະຫາຍ ນາງ ຫງວຽນ ແທັງ ຮ່າຍ ທີ່ໄດ້ຮັບການເລືອກຕັ້ງເປັນກຳມະການຄະນະປະຈຳສະພາແຫ່ງຊາດ ທັງເປັນຫົວໜ້າຄະນະກຳມະການວຽກງານສະມາຊິກສະພາແຫ່ງຊາດ ສສ ຫວຽດນາມ .
ທ່ານ ສຸບັນ ສະວະບຸດ ໄດ້ລາຍງານກ່ຽວກັບວຽກງານ ສສຊ ຕາມພາລະບົດບາດ ມີຢູ່ 4 ວຽກໃຫຍ່: ການຄຸ້ມຄອງ ສສຊ (ໃນນີ້ກໍເວົ້າເຖິງ ນະໂຍບາຍຕ່າງໆ, ການບັນຈຸຊັບຊ້ອນ ສສຊ ສັງກັດ ກຳມາທິການ, ການແຕ່ງຕັ້ງ ຍົກຍ້າຍ) ການພັດທະນາ: ປະສານສົມທົບກັບພາກສ່ວນຕ່າງໆ ໃນການສ້າງຄວາມເຂັ້ມແຂງ ໃຫ້ ສສຊ ແລະ ສສຂ, ການຄົ້ນຄວ້າດ້ານໂຄງປະກອບຂອງ ສພຊ ແລະ ສພຂ ການກະກຽມວຽກງານເລືອກຕັ້ງ, ກ່ອນການແຕ່ງຕັ້ງຄະນະກຳມະການເລືອກຕັ້ງລະດັບຊາດ ຕ້ອງກຽມເອກະສານ, ເງື່ອນໄຂອໍານວຍຄວາມສະດວກ, ການສ້າງ-ປັບປຸງ ນິຕິກຳ ເປັນຕົ້ນລະບຽບການດໍາເນີນກອງປະຊຸມ, ການເຄື່ອນໄຫວຂອງ ຄະນະ ສສຊ ແລະ ອື່ນໆ. ສະນັ້ນ, ຜ່ານການເຄື່ອນໄຫວກໍມີທັງປະຕິບັດ ແລະ ຖອດຖອນບົດຮຽນໄປນໍາ, ຫຼາຍບັນຫາກໍຍັງພົບຄວາມຫຍຸ້ງຍາກ, ສໍາລັບທິດທາງຕໍ່ໜ້ານີ້ ພັກໄດ້ກຳນົດແນວທາງໃຫ້ປັບປຸງບູລະນະອໍານາດການປົກຄອງທ້ອງຖິ່ນ ຊຶ່ງຈະໃຫ້ມີການສ້າງຕັ້ງຕາແສງ, ກຳນົດເອົາເລຂາພັກແຂວງ ເປັນປະທານສະພາ ປະຊາຊົນຂັ້ນແຂວງ, ເລຂາພັກເມືອງ ເປັນຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເມືອງ (ປັດຈຸບັນ ລາວຍັງບໍ່ທັນມີສະພາປະຊາຊົນເມືອງ) ແລະ ໃນປີ 2025 ນີ້ຕ້ອງກະກຽມດ້ານຕ່າງໆ ໃຫ້ແກ່ການເລືອກຕັ້ງ ສສຊ ແລະ ສສຂ ຊຶ່ງຈະດໍາເນີນຂຶ້ນໃນ ຕົ້ນປີ 2026. ສະນັ້ນ, ໃນໂອກາດທີ່ສະຫາຍ ໄດ້ມີບົດຮຽນປະສົບການໃນການ ນໍາພາ-ຊີ້ນໍາ ຢູ່ທ້ອງຖິ່ນມາແລ້ວ ກໍຢາກຂໍເຊີນສະຫາຍ ນໍາພາຄະນະຜູ້ແທນມາຢ້ຽມຢາມເປັນທາງການ ແລະ ໃຫ້ຄວາມຮູ້ແກ່ພວກເຮົາ ຫຼື ຖ້າມີໂອກາດ ພວກຂ້າພະເຈົ້າຈະໄປແລກປ່ຽນຮຽນຮູ້ບົດຮຽນ ຢູ່ທ້ອງຖິ່ນຕ່າງໆ ຂອງຫວຽດນາມຕື່ມ.
(ຂ່າວ-ພາບ:ສຳນານ)
ຄໍາເຫັນ