ລາວ - ສ ເກົາຫຼີ ລົງນາມຈັດສົ່ງແຮງງານໄປເຮັດວຽກລະດູການ

ທ່ານ ໂພໄຊ ໄຊຍະສອນ ໄດ້ສະແດງຄວາມຍິນດີຕ້ອນຮັບທ່ານ Park Yomg Cheol ພ້ອມດ້ວຍຄະນະໃນຄັ້ງນີ້ ພ້ອມທັງສະແດງຄວາມຂອບໃຈໄປຍັງລັດຖະບານ ສ ເກົາຫຼີ ທີ່ໄດ້ໃຫ້ການຊ່ວຍເຫຼືອກະຊວງ ຮສສ ໃນຫຼາຍໆດ້ານ, ເປັນຕົ້ນການສ້າງໂອກາດໃຫ້ແຮງງານລາວໄດ້ໄປເຮັດວຽກໃນຂະແໜງການຕ່າງໆເຊັ່ນ: ກະສິກຳ ເພື່ອເພີ່ມທັກສະໃນການເຮັດວຽກທີ່ທັນສະໄໝ ສ້າງລາຍຮັບໃຫ້ກັບຄອບຄົວ, ນຳເອົາຄວາມຮູ້-ຄວາມສາມາດມາພັດທະນາປະເທດຊາດ. ພ້ອມທັງຍົກສູງຄຸນນະພາບການຜະລິດກະສິກໍາ ສະໜອງພາຍໃນປະເທດໃຫ້ພຽງພໍ ແລະ ກ້າວໄປເຖິງການສົ່ງອອກໄປປະເທດຕ່າງໆ; ລັດຖະບານ ສປປ ລາວ ໄດ້ມີນະໂຍບາຍສົ່ງເສີມປະ ຊາຊົນຜູ້ທີ່ປະກອບອາຊີບກະສິກໍາ ໂດຍສະເພາະຜູ້ທີ່ອາໄສໃນຂົງເຂດຊົນນະບົດ ໃຫ້ມີໂອກາດໃນການເຂົ້າເຖິງການພັດທະນາສີມືແຮງງານ ແລະ ນໍາໃຊ້ເຕັກໂນໂລຊີທີ່ທັນສະໄໝເຂົ້າໃນການຜະລິດກະສິກໍາ ແນ່ນອນວ່າ ສ ເກົາຫຼີ ແມ່ນເປົ້າໝາຍໜຶ່ງທີ່ລັດຖະບານ ສປປ ລາວ ມີເຈດຈໍານົງໃນການຮ່ວມມືຫຼາຍໆດ້ານ ລວມທັງການຈັດສົ່ງແຮງງານລາວໄປເຮັດວຽກໃນຂົງເຂດກະສິກໍາ ເພື່ອຖ່າຍທອດເອົາຄວາມຮູ້ ແລະ ປະສົບການຂອງຊາວກະສິ ກອນ ສ ເກົາຫຼີ ມາພັດທະນາບ້ານເກີດເມືອງນອນຂອງຕົນ.

ໃນພິທີໄດ້ລົງນາມເຊັນບົດບັນທຶກຄວາມເຂົ້າໃຈ ວ່າດ້ວຍການຈັດສົ່ງແຮງງານລາວໄປເຮັດວຽກຢູ່ ສ ເກົາຫຼີ ຕາມລະດູການລະຫວ່າງທ່ານນາງ ອານຸສອນ ຄຳສິງສະຫວັດ ຫົວໜ້າກົມການຈັດຫາງານກະຊວງ ຮສສ ແລະ ທ່ານ Park Yomg Cheol ເຈົ້າເມືອງກັງຮວາ ສ ເກົາຫຼີ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ; ການຈັດສົ່ງແຮງງານລາວໄປເຮັດວຽກຕາມລະດູການທີ່ ສ ເກົາຫຼີ ນັບແຕ່ເດືອນພຶດສະພາ 2022 ມາຮອດປັດຈຸບັນ, ກົມການຈັດຫາງານໄດ້ມີບົດບັນທຶກການຮ່ວມມືຢູ່ 2 ແຂວງ ແລະ 80 ເມືອງ ສາມາດຈັດສົ່ງແຮງງານລາວໄປເຮັດວຽກຕາມລະດູການຢູ່ ສ ເກົາຫຼີ ທັງໝົດ 11 ພັນກວ່າຄົນ ຍິງ 5 ພັນກວ່າຄົນ. ສຳລັບເມືອງກັງຮວາ ສ ເກົາຫຼີ ມີຄວາມຕ້ອງການແຮງງານລາວທີ່ໄປເຮັດວຽກຢູ່ເມືອງດັ່ງກ່າວ ໄດ້ຮັບຜົນປະໂຫຍດສູງສຸດ ແລະ ສອງຝ່າຍຍັງໄດ້ພ້ອມກັນປັບປຸງບັນດານະໂຍບາຍຕ່າງໆ ສຳຄັນແມ່ນປ້ອງກັນບັນຫາແຮງງານໂຕນໜີ ຊຶ່ງເປັນບັນຫາສຳຄັນຫຼາຍ. ການຮ່ວມມືຄັ້ງນີ້ຖືເປັນບາດກ້າວສໍາຄັນ ແລະ ສ້າງຜົນປະໂຫຍດໃຫ້ແກ່ສອງຝ່າຍ. ສໍາລັບແຮງງານລາວກໍຈະໄດ້ຮັບການພັດທະນາສີມືແຮງງານ ມີລາຍຮັບ ປະກອບສ່ວນພັດທະນາປະເທດຊາດ ພ້ອມທັງເຮັດໃຫ້ຊາວກະສິກອນ, ເຈົ້າຂອງບັນດາຟາມພາຍໃນເມືອງກໍຈະມີແຮງງານເຂົ້າຮັບໃຊ້ການຜະລິດກະສິກໍາຫຼາຍຂຶ້ນ.