ລາວ-ຈີນ ຫາລືສົ່ງເສີມການສຶກສາ ແລະ ເສດຖະກິດ-ການຄ້າ

ໂອກາດດັ່ງກ່າວ, ທ່ານ ສີລິລາດທົງສິນ ທອງເພັງ ໄດ້ໃຫ້ຮູ້ວ່າ: ກອງປະຊຸມໃນຄັ້ງນີ້, ເປັນຂີດໝາຍສໍາຄັນໃນການເຕົ້າໂຮມກໍາລັງແຮງ ເພື່ອຮ່ວມກັນຊຸກຍູ້ ແລະ ລົງເລິກການຮ່ວມມືພັດທະນາວຽກງານດ້ານການສຶກສາ, ເສດຖະກິດ-ການຄ້າ ແບບຮອບດ້ານ ລະຫວ່າງ ສປປ ລາວ ແລະ ສປ ຈີນ ກໍຄື ນະຄອນຫຼວງວຽງຈັນ ແລະ ແຂວງເສສວນ ຊຶ່ງມີເປົ້າໝາຍເພື່ອເພີ່ມທະວີ ແລະ ເສີມຂະຫຍາຍ ການຮ່ວມມືຮອບດ້ານໃນຂົງເຂດການສຶກສາ ແລະ ຂົງເຂດເສດຖະກິດ-ການຄ້າ ໃຫ້ໄດ້ຮັບການຂະຫຍາຍຕົວ ເປັນແຕ່ລະໄລຍະ.

ພ້ອມນີ້, ກອງປະຊຸມ ຍັງໄດ້ພ້ອມກັນສົນທະນາ, ປຶກສາຫາລື, ແລກປ່ຽນບົດຮຽນຮ່ວມກັນ, ຖືເປັນອີກໂອກາດໜຶ່ງ ເພື່ອສ້າງເວທີໃຫ້ພາກລັດ, ພາກເອກະຊົນ ກໍຄື ບັນດານັກທຸລະກິດ ຂອງນະຄອນຫລວງວຽງຈັນ ແລະ ແຂວງເສສວນ ໄດ້ມີໂອກາດ ພົບປະສ້າງສາຍພົວພັນອັນສະໜິດສະໜົມ ກໍຄື ການສ້າງຄູ່ຮ່ວມຍຸດທະສາດ ດ້ານການສຶກສາ, ດ້ານເສດຖະກິດ-ການຄ້າ ຮ່ວມກັນ ເພື່ອປະກອບສ່ວນເຮັດໃຫ້ການພັດທະນາເສດຖະກິດ-ສັງຄົມ ຂອງສອງພັກສອງລັດ ໂດຍສະເພາະ ກໍແມ່ນ ນະຄອນຫຼວງວຽງຈັນ ແລະ ແຂວງເສສວນ ໃຫ້ມີຄວາມເຂັ້ມແຂງ, ຍືນຍົງຕໍ່ໄປ ພ້ອມກັນແນໃສ່ເຮັດໃຫ້ປະຊາຊົນ ຂອງສອງປະເທດ ໄດ້ມີການພັດທະນາ ໃນຮູບແບບທີ່ທັນສະໄໝ ຂຶ້ນເປັນກ້າວໆ.

ທ່ານ ສີລິລາດທົງສິນ ທອງເພັງ ໄດ້ໃຫ້ຮູ້ອີກວ່າ: ສຳລັບ ສປປ ລາວ ທັດສະນະໃນການພັດທະນານະຄອນຫຼວງວຽງຈັນ ໃນໄລຍະໃໝ່ ແມ່ນສ້າງໃຫ້ເປັນຫົວໜ່ວຍຍຸດທະສາດໜຶ່ງທີ່ເຂັ້ມແຂງ ຂອງປະເທດເປັນສູນກາງທາງດ້ານການເມືອງ, ຄວາມໝັ້ນຄົງ, ເສດຖະກິດ, ວັດທະນະທຳ-ສັງຄົມ, ການສຶກສາ, ຄວາມອັດສະລິຍະວິທະຍາສາດ-ເຕັກໂນໂລຊີ ແລະ ການເຊື່ອມໂຍງກັບພາກພື້ນ-ສາກົນ, ສ້າງ 9 ຕົວເມືອງໃນນະຄອນຫຼວງວຽງຈັນ ໃຫ້ເຂັ້ມແຂງຮອບດ້ານ ແລະ ສ້າງທຸກບ້ານໃຫ້ເປັນບ້ານພັດທະນາ.

ພ້ອມນີ້, ນະຄອນຫຼວງວຽງຈັນ ໄດ້ສ້າງທຸກເງື່ອນໄຂທີ່ເອື້ອອຳນວຍ ແລະ ເປີດໃຫ້ນັກລົງທຶນ ທີ່ເປັນບຸກຄົນ ຫຼື ນິຕິບຸກຄົນຕ່າງປະເທດ ສາມາດລົງທຶນເຂົ້າໃນປະເພດກິດຈະການຕ່າງໆເພີ່ມຂຶ້ນ ໂດຍສະເພາະແມ່ນທຸລະກິດ ທີ່ໄດ້ສະຫງວນໄວ້ ສຳລັບ ພົນລະເມືອງລາວ ຊຶ່ງແຕ່ກ່ອນບໍ່ອະນຸຍາດໃຫ້ນັກລົງທຶນ ຕ່າງປະເທດເຮັດໄດ້, ປັດຈຸບັນ ບຸກຄົນ ຫຼື ນິຕິບຸກຄົນຕ່າງປະເທດ ສາມາດລົງທຶນໄດ້ ແຕ່ຕ້ອງປະຕິບັດໃຫ້ສອດຄ່ອງກັບເງື່ອນໄຂສະເພາະ ຕາມທີ່ໄດ້ກຳນົດໄວ້ໃນລະບຽບ ແລະ ກົດໝາຍ ທີ່ກ່ຽວຂ້ອງເຊັ່ນ: ທຸລະກິດການຄ້າຂາຍຍົກ-ຂາຍຍ່ອຍ; ສູນການຄ້າ, ຮ້ານສັບພະສິນຄ້າ ແລະ ອຸດສາຫະກຳປຸງແຕ່ງ; ການຜະລິດຢາປົວພະຍາດ, ຜະລິດເຄມີ ເພື່ອໃຊ້ປຸງແຕ່ງຢາ ແລະ ຜະລິດຕະພັນການຢາຈາກພືດ, ທຶນຈົດທະບຽນວິສາຫະກິດ ແຕ່ 1 ຕື້ກີບຂຶ້ນໄປ ສາມາດຖືຮຸ້ນໄດ້ 49%. ນອກຈາກນັ້ນ, ເພື່ອເປັນການຊຸກຍູ້ ແລະ ສົ່ງເສີມການສົ່ງອອກຢ່າງແຂງແຮງຂອງຂະແໜງອຸດສາຫະກຳ ແລະ ການຄ້າ ຍັງໄດ້ປັບປຸງຂອດການບໍລິການໃຫ້ກະທັດຮັດວ່ອງໄວ ເປັນຕົ້ນ ແມ່ນການນຳເຂົ້າ-ສົ່ງອອກ, ການຄ້າຊາຍແດນ ແລະ ຜ່ານແດນຕ່າງໆ.

(ຂ່າວ: ທະນູທອງ, ພາບ: ຂັນໄຊ)