ສະຫາຍ ນາງ ທຸມມາລີ ວົງພະຈັນ ປະທານກຳມາທິການຍຸຕິທໍາ ສະພາແຫ່ງຊາດ ສປປ ລາວ ພ້ອມດ້ວຍຄະນະ ໄດ້ພົບປະສອງຝ່າຍກັບ ສະຫາຍ ເຢືອງ ແທງ ບິ່ງ ຫົວໜ້າຄະນະຄຳຮ້ອງຂອງປະຊາຊົນ ສະພາແຫ່ງຊາດ ແຫ່ງ ສສ ຫວຽດນາມ ພ້ອມດ້ວຍຄະນະ ໃນວັນທີ 18 ຕຸລາຜ່ານມາ ທີ່ ນະຄອນຫຼວງວຽງຈັນ.
ສະຫາຍ ນາງ ທຸມມາລີ ວົງພະຈັນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ຜົນສຳເລັດການຮ່ວມມື 2 ຝ່າຍ ແລະ ແຈ້ງສະພາບການພົ້ນເດັ່ນ ຂອງ ສປປ ລາວ ແລະ ຂອງສະພາແຫ່ງຊາດລາວ ໂດຍຫຍໍ້ໃຫ້ຝ່າຍຫວຽດນາມໄດ້ຮັບຊາບ; ພ້ອມທັງ ເຫັນດີເປັນເອກະພາບຕໍ່ການຕີລາຄາ ຂອງສອງສະຫາຍປະທານສະພາແຫ່ງຊາດລາວ ແລະ ປະທານສະພາແຫ່ງຊາດ ຫວຽດນາມ ຕໍ່ການພົວພັນຮ່ວມມື ລະຫວ່າງ ສອງປະເທດ ກໍຄື ສອງອົງການນິຕິບັນຍັດ ນັບມື້ນັບໜັກແໜ້ນ ເຂົ້າສູ່ລວງເລິກ ແລະ ນຳເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ.
ການພົບປະຄັ້ງນີ້, ທັງສອງກຳມາທິການຍັງໄດ້ມີຄໍາເຫັນ ປຶກສາຫາລື ແລະ ແລກປ່ຽນບົດຮຽນເຊິ່ງກັນ ແລະ ກັນ ກ່ຽວກັບ ວຽກງານແກ້ໄຂຄໍາຮ້ອງຂອງປະຊາຊົນ, ຊຶ່ງບັນຫາດັ່ງກ່າວ ທັງສອງຝ່າຍຍັງຈະໄດ້ສືບຕໍ່ແລກປ່ຽນຂໍ້ມູນ-ຂ່າວສານ ແລະ ບົດຮຽນກ່ຽວກັບວຽກງານດັ່ງກ່າວ ລະອຽດນໍາກັນ ໃນຕໍ່ໜ້າ.
ສະຫາຍ ເຢືອງ ແທງ ບິ່ງ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ທັງແຈ້ງໃຫ້ຊາບການຈັດຕັ້ງປະຕິບັດວຽກງານຂອງຕົນ ແລະ ສະພາແຫ່ງຊາດ ແຫ່ງ ສສ ຫວຽດນາມ ທັງຢັ້ງຢືນຈະສືບຕໍ່ຮັດແໜ້ນ ແລະ ເສີມຂະຫຍາຍການພົວພັນຮ່ວມມືລະຫວ່າງສອງອົງການນິຕິບັນຍັດ ເວົ້າລວມ, ເວົ້າສະເພາະ ແມ່ນ ລະຫວ່າງ ສອງກໍາມາທິການຍຸຕິທໍາ ສະພາແຫ່ງຊາດ ແຫ່ງ ສປປ ລາວ ແລະ ຄະນະຄຳຮ້ອງຂອງປະຊາຊົນ ສະພາແຫ່ງຊາດ ແຫ່ງ ສສ ຫວຽດນາມ ໃຫ້ໄດ້ຮັບການຈັດຕັ້ງປະຕິບັດຢ່າງມີໝາກຜົນ ແລະ ເປັນຮູບປະທໍາ.
(ຂ່າວ: ສພຊ, ພາບ: ສຸກສະຫວັນ)
ຄໍາເຫັນ