ລາວ-ນອກແວ ເພີ່ມທະວີຮັດແໜ້ນການຮ່ວມມື ດ້ານນິຕິບັນຍັດ

ທ່ານ ສັນຍາ ປຣະເສີດ, ປະທານກຳມາທິການການຕ່າງປະເທດ ໄດ້ພົບປະກັບ ທ່ານ ອາສະລາກ ເຊັມ ຈາຄັອບເຊັນ (Aslaug Sem-Jacobsen), ສະມາຊິກລັດຖະສະພາ ແຫ່ງ ຣາຊະອານາຈັກນອກແວ ໃນວັນທີ 19 ຕຸລາ 2024 ທີ່ຫໍປະຊຸມແຫ່ງຊາດ ໃນໂອກາດທີ່ເດີນທາງມາເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາ ລະຫວ່າງຊາດອາຊຽນ ຄັ້ງທີ 45 (AIPA-45) ຢູ່ ສປປ ລາວ

ໃນໂອກາກດດັ່ງກ່າວ ທ່ານ ສັນຍາ ປຣະເສີດ ໄດ້ສະແດງຄວາມຂອບໃຈເປັນຢ່າງສູງ ຕໍ່ຄໍາເວົ້າອັນຈົບງາມ ຂອງຂອງ ທ່ານ ອາສະລາກ ເຊັມ ຈາຄັອບເຊັນ ທີ່ມີຕໍ່ ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ກໍຄື ສອງອົງການນິຕິບັນຍັດ ພ້ອມນັ້ນ ທ່ານຍັງໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດ ນັບແຕ່ສອງຝ່າຍສ້າງສາຍພົວພັນການທູດນຳກັນ ໃນວັນທີ 12 ພະຈິກ 1991 ເຖິງປັດຈຸບັນຄົບຮອບ 33 ປີ ການພົວພັນຮ່ວມມື ລະຫວ່າງສອງປະເທດ ໄດ້ມີບາດກ້າວຂະຫຍາຍຕົວຢ່າງຕໍ່ເນື່ອງ ຊຶ່ງສະແດງອອກໃນການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆ ຢ່າງເປັນປົກກະຕິ ມີການໄປມາຫາສູ່ກັນ ລະຫວ່າງ ປະຊາຊົນສອງປະເທດ; ມີການພົວພັນດ້ານການຄ້າ-ການລົງທຶນ ໃນຂະແໜງອຸດສາຫະກຳ ແລະ ຫັດຖະກຳ ຂະແໜງໄຟຟ້ານ້ຳຕົກ ສ່ວນດ້ານການຄ້າ ລະຫວ່າງ ສປປ ລາວ ແລະ ຣາຊະອານາຈັກນອກແວ ແມ່ນຍັງໜ້ອຍ ຖ້າທຽບໃສ່ປະເທດອື່ນໆ ສິນຄ້າຫຼັກໃນການສົ່ງອອກໄປປະເທດນອກແວ ແມ່ນ ປະເພດເຄື່ອງນຸ່ງຫົ່ມ ແລະ ເກີບ ໜັງ ສ່ວນສິນຄ້ານໍາເຂົ້າຫຼັກປະກອບມີປະເພດເຄື່ອງກົນຈັກ ເຄື່ອງຕາຊັ່ງ ແລະ ຜະລິດຕະພັນເຄື່ອງໄຟຟ້າ ແລະ ອຸປະກອນເຄື່ອງໃຊ້ໄຟຟ້າ ແລະ ອື່ນໆ.

ນອກຈາກນີ້ ນອກແວ ຍັງໄດ້ໃຫ້ການຊ່ວຍເຫຼືອຫຼາຍຂະແໜງການ ເປັນຕົ້ນແມ່ນ ການຊ່ວຍເຫຼືອໃນການເກັບກູ້ລະເບີດທີ່ຍັງບໍ່ທັນແຕກ; ການພັດທະນາພະລັງງານໄຟຟ້າ; ການຄຸ້ມຄອງຊັບພະຍາກອນທຳມະຊາດ ແລະ ສົ່ງເສີມຂະແໜງເອກະຊົນຂອງລາວ ໃນໄລຍະເສດຖະກິດຂ້າມຜ່ານ, ການພັດທະນາຂະແໜງການສັງຄົມ ການສຶກສາຂັ້ນພື້ນຖານ ແລະ ສາທາລະນະສຸກຂັ້ນພື້ນຖານອື່ນໆ. ໃນນັ້ນຍັງໃຫ້ການຊ່ວຍເຫຼືອໃນຂົງເຂດ ເປັນແຜນງານບູລິມະສິດຂອງລັດຖະບານ ສະໜັບສະໜູນ ສປປ ລາວ ໃຫ້ບັນລຸເປົ້າໝາຍ ສະຫັດສະຫວັດ ແລະ ຫຼຸດພົ້ນອອກຈາກ ການເປັນປະເທດດ້ອຍພັດທະນາໃນປີ 2026.

ສຳລັບສະພາແຫ່ງຊາດລາວ ແລະ ລັດຖະສະພານອກແວ ກໍມີການພົວພັນຮ່ວມມືນໍາກັນຢ່າງເປັນປົກກະຕິ ຊຶ່ງມີການພົບປະໃນໂອກາດເຂົ້າຮ່ວມກອງປະຊຸມສາກົນ ມີການແລກປ່ຽນສານຊົມເຊີຍ ສານອວຍພອນ ໃນໂອກາດວັນສຳຄັນຕ່າງໆ ຂອງ 2 ປະເທດ, ສອງຝ່າຍ ຮ່ວມມືກັນໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນແມ່ນເວທີ AIPA, ASEP, IPU ແລະ ອົງການອື່ນໆ.

ພ້ອມນັ້ນທ່ານກໍໄດ້ສະເໜີບາງຄໍາຄິດຄໍາເຫັນ ເພື່ອຮ່ວມມື ໃນຕໍ່ໜ້າ ດັ່ງນີ້:

1) ສະເໜີຊຸກຍູ້ ໃຫ້ສອງອົງການນີຕິບັນຍັດລາວ-ນອກແວ ມີການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ກຳມາທິການ, ຄະນະເລຂາທິການ ແລະ ຄະນະມິດຕະພາບລັດຖະສະພາຂອງສອງປະເທດ ຢ່າງເປັນປົກກະຕິນໍາກັນ.

2) ສະເໜີໃຫ້ຊຸກຍູ້ ແລະ ສົ່ງເສີມໃຫ້ລັດຖະບານຂອງສອງປະເທດ ເອົາໃຈໃສ່ໃນການຈັດຕັ້ງປະຕິບັດການຕົກລົງເຫັນດີນໍາກັນໃຫ້ມີປະສິດທິຜົນດີ.

3) ສືບຕໍ່ຮ່ວມມື ຊ່ວຍເຫຼືອ ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ.

ຂ່າວ-ພາບ: ຍຸພິນທອງ-ຕຸໄລເພັດ

ดูข้อมูลเชิงลึกและโฆษณา

โปรโมทโพสต์

ความรู้สึกทั้งหมด