 |
ກອງປະຊຸມຄັ້ງນີ້ ແມ່ນເພື່ອຊອກຫາແນວທາງຮ່ວມມືໃນການເຊື່ອມໂຍງແຂວງຄຳມ່ວນ ກັບກຸ່ມຈັງຫວັດສະນຸກຂອງໄທ ປະກອບມີ (ສະກົນນະຄອນ, ນະຄອນພະນົມ ແລະ ມຸກດາຫານ) ໃຫ້ເປັນເຄືອຂ່າຍຈຸດໝາຍທ່ອງທ່ຽວຂ້າມແດນ ເໝາະສົມກັບການທ່ອງທ່ຽວໄລຍະສັ້ນ ໂດຍເນັ້ນຈຸດເດັ່ນຮ່ວມກັນທັງດ້ານສາສະໜາ, ວັດທະນະທຳ, ປະຫວັດສາດ, ທຳມະຊາດ ແລະ ວິຖີຊີວິດ.
ຄວາມຫຼາກຫຼາຍຂອງແຫຼ່ງທ່ອງທ່ຽວຖືເປັນຈຸດແຂງສຳຄັນຂອງແຂວງຄຳມ່ວນ ເພາະສາມາດຕໍ່ຍອດເປັນໂປຣແກຣມທ່ອງທ່ຽວໄດ້ຫຼາຍຮູບແບບ ຕັ້ງແຕ່ການທ່ອງທ່ຽວທາງທຳມະຊາດ, ການສຳຜັດວິຖີຊີວິດ, ການຮຽນຮູ້ປະເພນີ ແລະ ວັດທະນະທຳ ໄປຈົນເຖິງການຕາມຮອຍປະຫວັດສາດ. ການນຳຈຸດແຂງເຫຼົ່ານີ້ມາເຊື່ອມກັບຈຸດໝາຍທ່ອງທ່ຽວຂອງຝັ່ງໄທ ຈຶ່ງມີສັກກະຍະພາບສ້າງເປັນ “ເສັ້ນທາງທ່ອງທ່ຽວດຽວ ແຕ່ສອງປະເທດ” ໄດ້.
ການເຊື່ອມໂຍງດັ່ງກ່າວ ມຸ່ງເນັ້ນການສ້າງໂປຣແກຣມທ່ອງທ່ຽວໄລຍະສັ້ນຂ້າມແດນ ໂດຍນຳເອົາຈຸດເດັ່ນຂອງສອງຝັ່ງແມ່ນ້ຳຂອງມາປະກອບເຂົ້າດ້ວຍກັນ. ແນວທາງນີ້ບໍ່ພຽງແຕ່ເພີ່ມທາງເລືອກໃຫ້ນັກທ່ອງທ່ຽວ ແຕ່ຍັງສາມາດກະຈາຍລາຍໄດ້ໄປສູ່ໂຮງແຮມ, ຮ້ານອາຫານ, ຜູ້ນຳທ່ຽວ, ກຸ່ມຜະລິດສິນຄ້າຊຸມຊົນ ແລະ ທຸລະກິດບໍລິການອື່ນໆໃນສອງຝັ່ງຂອງ.
 |
ປັດຈຸບັນ ແຂວງຄຳມ່ວນມີແຫຼ່ງທ່ອງທ່ຽວລວມທັງໝົດ 210 ແຫ່ງ, ໃນນັ້ນ ແຫຼ່ງທ່ອງທ່ຽວທາງທຳມະຊາດ 145 ແຫ່ງ, ທາງວັດທະນະທຳ 33 ແຫ່ງ ແລະ ທາງປະຫວັດສາດ 32 ແຫ່ງ, ໄດ້ພັດທະນາ ແລະ ເປີດບໍລິການແລ້ວ 27 ແຫ່ງ ແລະ ອີກ 20 ແຫ່ງ ຢູ່ໃນບັນຊີເອີ້ນການລົງທຶນ. ຄວາມຫຼາກຫຼາຍນີ້ຖືເປັນທຶນສຳຄັນໃນການຕໍ່ຍອດເປັນໂປຣແກຣມທ່ອງທ່ຽວຮ່ວມລາວ-ໄທ.
ທ່ານ ເດດສັກດາ ມະນີຄຳ ໄດ້ກ່າວວ່າ: ແຂວງຄຳມ່ວນ ມີທຶນທາງທຳມະຊາດ, ວັດທະນະທຳ ແລະ ປະຫວັດສາດອັນຫຼາກຫຼາຍ ທີ່ໄດ້ຮັບການຮັກສາ ແລະ ສືບທອດຈາກຮຸ່ນສູ່ຮຸ່ນ. ຄາດຫວັງວ່າ ກອງປະຊຸມສຳມະນາຄັ້ງນີ້ຈະສ້າງໂອກາດໃໝ່ໃຫ້ແກ່ຜູ້ປະກອບການລາວ-ໄທ ໃນການເຊື່ອມໂຍງທຸລະກິດ, ສິນຄ້າ, ບໍລິການ ແລະ ຕະຫຼາດທ່ອງທ່ຽວ.
ການຮ່ວມມືຄັ້ງນີ້ຈຶ່ງບໍ່ຈຳກັດພຽງການແລກປ່ຽນນັກທ່ອງທ່ຽວ ແຕ່ຍັງມຸ່ງສ້າງເສັ້ນທາງ ແລະ ໂປຣແກຣມທ່ອງທ່ຽວຂ້າມແດນທີ່ນຳຈຸດເດັ່ນຂອງສອງຝັ່ງແມ່ນ້ຳຂອງມາຮ່ວມກັນ. ຄາດວ່າຈະຊ່ວຍຍົກລະດັບເຂດຊາຍແດນຈາກ “ຈຸດຜ່ານທາງ” ໃຫ້ກາຍເປັນ “ຈຸດໝາຍປາຍທາງ” ການທ່ອງທ່ຽວ ພ້ອມສ້າງລາຍໄດ້, ກະຈາຍຜົນປະໂຫຍດສູ່ຊຸມຊົນ ແລະ ເປີດໂອກາດໃໝ່ໃຫ້ພາກທຸລະກິດຂອງສອງປະເທດຕື່ມອີກ.
ຂ່າວ: ກອງຄໍາ
ຄໍາເຫັນ