ລາວ-ເຢຍລະມັນປຶກສາຫາລື ການຮ່ວມມືເພື່ອການພັດທະນາ 

ລັດຖະບານ ສປປ ລາວ ແລະ ລັດຖະບານ ສສ ເຢຍລະມັນ ໄດ້ຈັດກອງປະຊຸມປຶກສາຫາລືລະດັບສູງ ເພື່ອແລກປ່ຽນກ່ຽວກັບຜົນສໍາເລັດ, ສິ່ງທ້າທາຍ ແລະ ທິດທາງໃນຕໍ່ໜ້າຂອງການຮ່ວມມືລາວ-ເຢຍລະມັນຂຶ້ນໃນວັນທີ 7 ພະຈິກ ຜ່ານມາ; ເຂົ້າຮ່ວມໃນກອງປະຊຸມຄັ້ງນີ້ປະກອບມີ: ທ່ານ ນາງ ພອນວັນ ອຸທະວົງ ຮອງລັດຖະມົນຕີກະຊວງແຜນການ ແລະ ການລົງທຶນ(ຜທ), ທ່ານ ນາງ ສີສົມບູນ ອຸນາວົງຫົວໜ້າກົມຮ່ວມມືສາກົນ, ກະຊວງ ຜທ, ທ່ານ ນາງ ອາແນັດ ຄະໂນບລອກເອກອັກຄະລັດຖະທູດເຢຍລະມັນ ປະຈໍາ ສປປ ລາວ ແລະ ທ່ານ ນາງ ມີຄາເອລາ ແຮນນິງຮອງຫົວໜ້າພະແນກອາຊີຕາເວັນຕົກກະຊວງຮ່ວມມືເສດຖະກິດ ແລະ  ການພັດທະນາ ແຫ່ງ ສສ ເຢຍລະມັນ (BMZ). 
ກອງປະຊຸມໄດ້ປຶກສາຫາລືການຮ່ວມມື ພາຍໃຕ 4 ຂົງເຂດບຸລິມະສິດ ຄື: ການປົກປັກຮັກສາຊັບພະຍາກອນທໍາມະຊາດ, ການພັດທະນາເສດຖະກິດແບບຍືນຍົງ, ການສ້າງໂລກທີ່ບໍ່ມີຄວາມອຶດຫີວ ໂດຍຜ່ານການປະຕິຮູບລະບົບໂພຊະນາການ ແລະ ການຮັກສາສັນຕິພາບ ແລະ ຄວາມກົມກຽວໃນສັງຄົມ. ການຊ່ວຍເຫຼືອຂອງລັດຖະບານ ສສ ເຢຍລະມັນ ໄດ້ຮັບການຈັດຕັ້ງປະຕິບັດຜ່ານອົງການ ຮ່ວມມືເພື່ອການພັດທະນາ ລາວ-ເຢຍລະມັນ (GIZ) ທະນາຄານສິນເຊື່ອແຫ່ງ ສສ ເຢຍລະມັນ (KFW) ແລະ ສະຖາບັນພູມສາດ ແລະ ຊັບພະຍາກອນທໍາມະຊາດ ແຫ່ງ ສສ ເຢຍລະມັນ (BGR).
ທ່ານ ນາງ ອາແນັດ ຄະໂນບລອກໄດ້ກ່າວວ່າ: “ໃນປີ 2022 ລັດຖະບານ ສສ ເຢຍລະມັນ ໄດ້ຕັດສິນໃຈສືບຕໍ່ການຮ່ວມມືສອງຝ່າຍກັບ ສປປ ລາວ. ການຕັດສິນໃຈຄັ້ງນີ້ ເປັນນິມິດໝາຍອັນສໍາຄັນ ພ້ອມທັງເປັນເຫດຜົນທີ່ທັງສອງລັດຖະບານ ຈະສະເຫຼີມສະຫຼອງການຮ່ວມມືຄົບຮອບ 60 ປີ ໃນປີທີ່ຈະມາເຖິງ. ມາຮອດປັດຈຸບັນ, ສສ ເຢຍລະມັນ ໄດ້ໃຫ້ການຊ່ວຍເຫຼືອແກ່ ສປປ ລາວ ໃນມູນຄ່າຫຼາຍກວ່າ 570 ລ້ານເອີໂຣ”.
ທ່ານ ນາງ ພອນວັນ ອຸທະວົງ ໄດ້ສະແດງຄວາມຂອບໃຈຕໍ່ຝ່າຍເຢຍລະມັນ ສໍາລັບການຮ່ວມມືອັນຍາວນານ ພ້ອມທັງກ່າວວ່າ: ‘ພວກເຮົາຕີລາຄາສູງຕໍ່ການສະໜັບສະໜູນດ້ານວິຊາການ ແລະ ການເງິນ ຂອງ ລັດຖະບານ ສສ ເຢຍລະມັນ ທີ່ສຸມໃສ່ການພັດທະນາຊົນນະບົດ, ການຄຸ້ມຄອງຊັບພະຍາກອນທໍາມະຊາດ ແລະ ການພັດທະນາເສດຖະກິດແບບຍືນຍົງ ຊຶ່ງໄດ້ປະກອບສ່ວນເຂົ້າໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ຂອງ ສປປ ລາວ. ພ້ອມດຽວກັນນີ້, ຂ້າພະເຈົ້າຮັບຊາບ ແລະ ຂໍສະແດງຄວາມຮູ້ບຸນຄຸນ ຕໍ່ການມອບທຶນສະໜັບສະໜູນເພີ່ມ ຈໍານວນ 38 ລ້ານເອີໂຣ ຊຶ່ງຈະນໍາໃຊ້ເຂົ້າໃນການຈັດຕັ້ງປະຕິບັດໂຄງການ ແລະ ແຜນງານທີ່ມີຢູ່’.    
ພາຍຫຼັງກອງປະຊຸມສິ້ນສຸດລົງ, ຄະນະຜູ້ແທນຈາກ ສສ ເຢຍລະມັນ ຈະເດີນທາງໄປຢ້ຽມຢາມໂຄງການ ທີ່ ນະຄອນຫຼວງວຽງຈັນ ແລະ ແຂວງຫຼວງພະບາງ ເພື່ອຕິດຕາມຄວາມຄືບໜ້າການຈັດຕັ້ງປະຕິບັດກິດຈະກໍາ ແລະ ຜົນສໍາເລັດຈາກການຈັດຕັ້ງປະຕິບັດດັ່ງກ່າວ. ໂຄງການດັ່ງກ່າວແມ່ນອີງຕາມການຮ່ວມມືທີ່ມີມູນເຊື້ອອັນຍາວນານ ລະຫວ່າງທັງສອງລັດຖະບານ. 
ຜູ້ຕາງໜ້າຈາກທັງສອງປະເທດ ໄດ້ຕີລາຄາສູງຕໍ່ມິດຕະພາບ ແລະ ການຮ່ວມມືທີ່ດີ ຊຶ່ງໄດ້ນໍາມາສູ່ຜົນສໍາເລັດຂອງໂຄງການ ແລະ ການເພີ່ມພັນທະການຮ່ວມມື ເພື່ອການພັດທະນາທີ່ຍືນຍົງຂອງ ສປປ ລາວ; ນອກຈາກນີ້, ລັດຖະບານ ສປປ ລາວ ແລະ ລັດຖະບານ ສສ ເຢຍລະມັນ ຍັງໄດ້ຮ່ວມກັນລົງນາມໃນສັນຍາການເງິນໃນມູນຄ່າ 24,6 ລ້ານເອີໂຣ ພາຍໃຕ້ສອງໂຄງການ ຄື: (1) ແຜນງານພັດທະນາຊົນນະບົດ ໄລຍະທີ 4 ມູນຄ່າ 18 ລ້ານເອີໂຣ ຊຶ່ງຈະປະກອບສ່ວນເຂົ້າໃນການຍົກລະດັບການເຊື່ອມຈອດ, ການປັບໂຕເຂົ້າກັບການປ່ຽນແປງດິນຟ້າອາກາດ ແລະ ການພັດທະນາເສດຖະກິດ-ສັງຄົມຂອງແຂວງຫົວພັນ ແລະ ແຂວງຜົ້ງສາລີ. ພ້ອມດຽວກັນນີ້, ຍັງມີແຜນງານສ້າງຂີດຄວາມສາມາດ ມູນຄ່າ 600.000 ເອີໂຣ ເພື່ອຮັບປະກັນຄວາມຍືນຍົງຂອງໂຄງການ; ແລະ (2) ໂຄງການສະໜັບສະໜູນການເງິນອາຊີວະສຶກສາ ມູນຄ່າ 6 ລ້ານເອີໂຣ ຊຶ່ງຈະສະໜັບສະໜູນກົນໄກການຮ່ວມມື ລະຫວ່າງ ສະຖາບັນອາຊີວະສຶກ ແລະ ຫົວໜ່ວຍທຸລະກິດ ໃນທົ່ວປະເທດ ເພື່ອສະໜອງການຝຶກອົບຮົມແບບຄວບຄູ່ ແລະ ສ້າງແຮງງານທີ່ຕອບສະໜອງໃຫ້ແກ່ຄວາມຕ້ອງການຂອງຕະຫຼາດແຮງງານ. ທັງສອງໂຄງການຈະຖືກຈັດຕັ້ງປະຕິບັດຜ່ານ ທະນາຄານ KfW.
(ຂ່າວ-ພາບ: ກະຊວງ ຜທ)