ລັດຖະບານສະຫະລັດອາເມຣິກາ ໄດ້ມອບລົດໂຕໂຢຕ້າແລນຄຣູສເຊີ 4 ຄັນ ເພື່ອບໍລິການວັກຊິນເຄື່ອນທີ່ ຢູ່ ສປປ ລາວ

ລັດຖະບານສະຫະລັດອາເມຣິກາ ໄດ້ໃຫ້ການຊ່ວຍເຫຼືອລົດໂຕໂຢຕ້າແລນຄຣູສເຊີ ຈຳນວນ 4 ຄັນ ເພື່ອນຳໃຊ້ເຂົ້າໃນການບໍລິການວັກຊິນແບບເຄື່ອນທີ່ ຢູ່ບັນດາເມືອງທີ່ຢູ່ເຂດຫ່າງໄກ ກໍຄືກຸ່ມປະຊາກອນທີ່ມີຄວາມສ່ຽງສູງຢູ່ 4 ເມືອງໃນບັນດາແຂວງເປົ້າໝາຍຢູ່ ສປປ ລາວ ຄື: ເມືອງສຳພັນ ແຂວງຜົ້ງສາລີ, ເມືອງເມິງ ແຂວງບໍ່ແກ້ວ, ເມືອງງອຍ ແຂວງຫຼວງພະບາງ ແລະ ເມືອງຊຳໃຕ້ ແຂວງຫົວພັນ.
ພິທີມອບ-ຮັບລົດດັ່ງກ່າວ ໄດ້ຈັດຂຶ້ນໃນວັນທີ 19 ຕຸລາ ຜ່ານມາ ທີ່ກະຊວງສາທາລະນະສຸກ ໂດຍກ່າວມອບຂອງ ທ່ານ ນາງ Michelle Y. Outlaw ອຸປະທູດ ສະຫະລັດອາເມຣິກາ ປະຈຳລາວ ແລະ ໂດຍກ່າວຮັບຂອງ ທ່ານ ນາງ ສຸພາພອນ ສະເດັດຕັນ ຮອງຫົວໜ້າຫ້ອງການກະຊວງສາທາລະນະ, ມີຮັກສາການ ຜູ້ຕາງໜ້າອົງການອະນາໄມໂລກ ປະຈຳ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ການຊ່ວຍເຫຼືອຈາກສະຫະລັດອາເມຣິກາ ຜ່ານອົງການອະນາໄມໂລກໃນຄັ້ງນີ້ ໂດຍມີມູນຄ່າທັງໝົດ 2,3 ຕື້ກີບ (113.000 ໂດລາ). ລົດຈຳນວນ 4 ຄັນດັ່ງກ່າວ ຍັງເປັນສ່ວນໜຶ່ງຂອງການສະໜັບສະໜູນຢ່າງຕໍ່ເນື່ອງຈາກລັດຖະບານສະຫະລັດອາເມຣິກາໃນຂົງເຂດສາທາລະນະສຸກ ແລະ ການໂຕ້ຕອບການລະບາດ ພະຍາດ ໃນ ສປປ ລາວ ແລະ ເປັນການຊ່ວຍເຫຼືອເພີ່ມຕື່ມໃຫ້ແກ່ກະຊວງສາທາລະນະສຸກ ລວມໄປເຖິງການປັບປຸງລະບົບເຢັນ, ວັກຊິນໂຄວິດ-19 ເກືອບ 3 ລ້ານໂດສ ແລະ ອຸປະກອນການແພດອື່ນໆ.
ໃນພິທີ, ທ່ານ ນາງ ສຸພາພອນ ສະເດັດຕັນ ໄດ້ກ່າວສະແດງຄວາມຂອບໃຈມາຍັງລັດຖະບານອາເມຣິກາ ທີ່ໃຫ້ການສະໜັບສະໜູນທາງດ້ານສາທາລະນະສຸກໃນບັນດາ 4 ແຂວງເປົ້າໝາຍ, ເພື່ອປະກອບສ່ວນຊ່ວຍແພດໝໍ ແລະ ນຳເອົາວັກຊິນໄປໃຫ້ບໍລິການແກ່ກຸ່ມເປົ້າໝາຍຫຼາຍພັນຄົນທີ່ຢູ່ໃນກຸ່ມສ່ຽງທີ່ຈຳເປັນຕ້ອງສັກວັກຊິນທີ່ຢູ່ເຂດຫ່າງໄກ ແລະ ຊ່ວຍປິດຊ່ອງວ່າງການໃຫ້ບໍລິການສັກວັກຊິນ. ລົດຈຳນວນດັ່ງກ່າວຍັງຈະໄດ້ນຳໄປໃຊ້ເພື່ອຮັບ-ສົ່ງຜູ້ທີ່ມີບັນຫາດ້ານສຸຂະພາບຂັ້ນຮຸນແຮງ, ລວມທັງຜູ້ທີ່ມີອາການພະຍາດໂຄວິດ-19 ຂັ້ນຮຸນແຮງ ແລະ ການລົງໃຫ້ບໍລິການເຄື່ອນທີ່ເຊັ່ນ: ການບໍລິການສຸຂະພາບສຳລັບແມ່ ແລະ ເດັກ, ການໃຫ້ຄຳແນະນຳດ້ານໂພຊະນາການ ແລະ ດ້ານການວາງແຜນຄອບຄົວ ແລະ ຖືເປັນການຫຼຸດຜ່ອນຄວາມບໍ່ສະເໝີພາບ ໂດຍການຊ່ວຍໃຫ້ກຸ່ມເປົ້າໝາຍທີ່ອາໄສຢູ່ເຂດດັ່ງກ່າວສາມາດເຂົ້າເຖິງວັກຊິນ ແລະ ການບໍລິການດ້ານສຸຂະພາບອື່ນໆ ຊຶ່ງຈະຊ່ວຍສົ່ງເສີມສຸຂະພາບ, ກອບກູ້ຊີວິດ ແລະ ຍົກສູງຄຸນນະພາບຊີວິດໃຫ້ດີຂຶ້ນ. 
(ຂ່າວ: ວັນເພັງ, ຂໍ່ໍ້ມູນ-ພາບ: ສູນສະຖິຕິ ແລະ ຂ່າວສານກະຊວງສາທາ )