ທ່ານ ສອນໄຊ ສີພັນດອນ ກ່າວວ່າ: ລັດຖະບານໄດ້ສຸມໃສ່ປະຕິບັດວາລະແຫ່ງຊາດຕາມ 5 ວຽກຈຸດສຸມທີ່ສະພາແຫ່ງຊາດໄດ້ຮັບຮອງຄື: ຈຸດສຸມທີ 1) ການສົ່ງເສີມການຜະລິດເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ; ຈຸດສຸມທີ 2) ການສ້າງຄວາມເຂັ້ມແຂງທາງດ້ານການເກັບລາຍຮັບເຂົ້າງົບປະມານ; ຈຸດສຸມທີ3) ຍົກສູງປະສິດທິຜົນການຄຸ້ມຄອງລາຍຈ່າຍງົບປະມານຂອງລັດ; ຈຸດສຸມທີ 4) ການຮັກສາສະຖຽນລະພາບເງິນຕາ; ຈຸດສຸມທີ 5) ຍົກສູງປະສິດທະພາບຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ.
ຜ່ານການຈັດຕັ້ງປະຕິບັດ 5 ຈຸດສຸມດັ່ງກ່າວໄດ້ມີຜົນສໍາເລັດຫຼາຍດ້ານເຊັ່ນ: ມູນຄ່າການສົ່ງອອກສິນຄ້າທັງໝົດໃນ 5 ເດືອນຕົ້ນປີ 2025 ປະຕິບັດໄດ້ 5,313 ລ້ານໂດລາຫຼື ເທົ່າກັບ 53.70% ຂອງແຜນການປີເພີ່ມຂຶ້ນ 29.70% ທຽບໃສ່ໄລຍະດຽວຂອງປີຜ່ານມາ. ໃນນັ້ນ, ສາມາດສົ່ງອອກຜະລິດຕະພັນກະສິກຳໃນ 5 ເດືອນຕົ້ນປີ 2025 ບັນລຸໄດ້ 977 ລ້ານໂດລາເທົ່າກັບ 65% ຂອງແຜນການປີ (ຈຸດສຸມທີ 1);ການເກັບລາຍຮັບໄດ້ເກີນແຜນເປັນປີທີ 4 ຕິດຕໍ່ກັນສາມາດມີເງິນຊໍາລະໜີ້ສິນຕ່າງປະເທດໄດ້ຕາມສັນຍາ ແລະ ລາຍຮັບພາຍໃນສາມາດກຸ້ມລາຍຈ່າຍບໍລິຫານປົກກະຕິ ສາມາດເພີ່ມເງິນອຸດໜູນໃຫ້ພະນັກງານ-ລັດຖະກອນ, ທະຫານ, ຕຳຫຼວດຕໍ່າສຸດໄດ້ 2,200,000ກີບຕໍ່ຄົນຕໍ່ເດືອນ (ຈຸດສຸມທີ 2);ໄດ້ປັບປຸງກົນໄກການຄຸ້ມຄອງລາຍຈ່າຍງົບປະມານຮັດກຸມກວ່າເກົ່າໂດຍສະເພາະການໂອນລາຍຮັບງົບປະມານຂອງຫົວໜ່ວຍງົບປະມານຕ່າງໆເຂົ້າບັນຊີລວມສູນຄັງເງິນແຫ່ງຊາດຢູ່ ທະນາຄານແຫ່ງ ສປປ ລາວ ຈໍານວນເງິນທຽບເປັນເງິນກີບທັງໝົດ 26,822 ຕື້ກີບ ເພີ່ມຂຶ້ນ 6,996 ຕື້ກີບ ຫຼື 35.29% ທຽບໃສ່ປີຜ່ານມາ (ເມື່ອກ່ອນຫົວໜ່ວຍງົບປະມານຕ່າງໆເປີດຢູ່ທະນາຄານທຸລະກິດ) ຫັນການຊຳລະສະສາງງົບປະມານຂອງລັດຜ່ານທະນາຄານຫຼາຍຂຶ້ນເປັນແຕ່ລະປີ (ຈຸດສຸມທີ 3);ສາມາດຄວບຄຸມອັດຕາແລກປ່ຽນໃຫ້ມີຄວາມສະຖຽນກວ່າເກົ່າ. ອັດຕາແລກປ່ຽນໃນລະບົບທະນາຄານ ແລະ ນອກລະບົບຍັບໃກ້ເຂົ້າຫາກັນເມື່ອທຽບໃສ່ເມື່ອກ່ອນສາມາດແກ້ໄຂບັນຫາການລັກລອບແລກປ່ຽນເພື່ອເກງກຳໄລ, ຄວບຄຸມອັດຕາເງິນເຟີ້ຫຼຸດລົງເປັນແຕ່ລະເດືອນ (ເງິນເຟີ້ເດືອນມັງກອນ 2025 ຢູ່ໃນລະດັບ 15.5% ເດືອນກຸມພາ 12.7% ເດືອນມີນາ 11.2% ແລະ ໃນເດືອນເມສາ 2025 ຢູ່ໃນລະດັບ 11.1% ໃນເດືອນພຶດສະພາຢູ່ໃນລະດັບ 8.3%) ສັງລວມແລ້ວອັດຕາເງິນເຟີ້ສະເລ່ຍ 5 ເດືອນຕົ້ນປີຢູ່ໃນລະດັບ 11.76% (ຫຼຸດລົງຫຼາຍຖ້າທຽບໃສ່ໄລຍະດຽວກັນຂອງປີ 2024 ຢູ່ໃນລະດັບ 24.77%).ຄາດວ່າໝົດປີອັດຕາເງິນເຟີ້ຈະຢູ່ໃນລະດັບບໍ່ເກີນ 1 ຕົວເລກຕາມຄາດໝາຍທີ່ວາລະແຫ່ງຊາດກໍານົດແມ່ນບໍ່ເກີນ 9% (ຈຸດສຸມທີ 4).
ແນວໃດກໍຕາມ ລັດຖະບານກໍເຫັນວ່າຍັງມີວຽກຈຸດສຸມຈຳນວນໜຶ່ງທີ່ປະຕິບັດບໍ່ທັນໄດ້ດີເປັນຕົ້ນ ການຜະລິດເພື່ອທົດແທນການນໍາເຂົ້າຍັງບໍ່ທັນແຂງແຮງໂດຍສະເພາະການຜະລິດປຸຍ, ແນວພັນພືດ, ສັດ ຍັງບໍ່ທັນພຽງພໍການຈຳກັດການນໍາເຂົ້າສິນຄ້າຟຸມເຟືອຍ ແລະ ສິນຄ້າທີ່ພາຍໃນຜະລິດໄດ້ແລ້ວຍັງເຮັດບໍ່ໄດ້ດີໂດຍສະເພາະຜະລິດຕະພັນເຄື່ອງດື່ມທີ່ມີທາດເຫຼົ້າ, ເບຍ, ນໍ້າດື່ມ, ຊີ້ນ,ພືດຜັກຕ່າງໆ ຍັງນໍາເຂົ້າມາຕາມດ່ານທ້ອງຖິ່ນ, ດ່ານປະເພນີ ແລະ ຈຸດຂ້າມລອຍ, ລາຄາສິນຄ້າຕົວຈິງໃນທ້ອງຕະຫຼາດຍັງບໍ່ທັນຫຼຸດລົງຕາມອັດຕາເງິນເຟີ້. ສະນັ້ນ, ແຕ່ນີ້ຮອດໝົດປີ 2025 ລັດຖະບານຈະໄດ້ສຸມໃສ່ປະຕິບັດມາດຕະການຕ່າງໆເພື່ອແກ້ໄຂບັນດາຂໍ້ຄົງຄ້າງດັ່ງກ່າວ ແລະ ສືບຕໍ່ແກ້ໄຂຕາມວຽກຈຸດສຸມທີ່ໄດ້ກຳນົດໃນມະຕິ 111/ສພຊ ລົງວັນທີ 21 ພະຈິກ 2023.
(ຂ່າວ: ວັນເພັງ)
ຄໍາເຫັນ