ລັດຖະມົນຕີ ຮສສ ມອບເຄື່ອງບັນເທົາທຸກສຸກເສີນໃຫ້ປະຊາຊົນຜູ້ໄດ້ຮັບຜົນກະທົບຈາກພາຍຸໝາກເຫັບຕົກຢູ່ເມືອງສີໂຄດຕະບອງ

ປະຊາຊົນທີ່ໄດ້ຮັບຜົນກະທົບຈາກພາຍຸໝາກເຫັບຕົກ ຢູ່ເມືອງສີໂຄດຕະບອງ ໃນຄັ້ງນີ້, ຕາມຂໍ້ມູນເບື້ອງຕົ້ນ ໄດ້ຮັບຜົນກະທົບ 5 ບ້ານ, ເຮືອນປະຊາຊົນເສຍຫາຍ 2,000 ກວ່າຄອບຄົວ, ໂຮງຮຽນ 4 ແຫ່ງ, ວັດ 1 ແຫ່ງ ແລະ ຫ້ອງການບ້ານ 1 ຫຼັງ ໄດ້ຮັບຄວາມເສຍຫາຍ. ໃນນັ້ນ, ບ້ານວຽງຄຳ ແລະ ບ້ານຈັນສະຫວ່າງ ໄດ້ຮັບຜົນກະທົບໜັກທີ່ສຸດ ໂດຍມີເຮືອນປະຊາຊົນເສຍຫາຍບ້ານລະ 1,000 ກວ່າຄອບຄົວ, ບ້ານໂພນສົມບູນ 100 ກວ່າຄອບຄົວ, ບ້ານໜອງດາ ແລະ ບ້ານຕາດທອງ ບ້ານລະ 6 ຄອບຄົວ.

ໂອກາດນີ້, ທ່ານ ໂພໄຊ ໄຊຍະສອນ ໄດ້ມອບເຄື່ອງບັນເທົາທຸກສຸກເສີນ ເປັນຕົ້ນ ເຂົ້າສານ 20 ໂຕນ, ເຄື່ອງໃຊ້ຄົວເຮືອນ, ເຄື່ອງສຸຂະອະນາໄມ, ມຸ້ງ 1,000 ຜືນ ແລະ ສາດຢາງ 1,000 ຜືນ, ລວມມູນຄ່າການຊ່ວຍເຫຼືອ 1,4 ຕື້ກວ່າກີບ. ພ້ອມນີ້, ທ່ານລັດຖະມົນຕີ ຍັງໄດ້ເນັ້ນໜັກໃຫ້ກອງເລຂາ ຄພສ ປະສານງານກັບອົງການຄູ່ຮ່ວມພັດທະນາ ເພື່ອລະດົມທຶນຈັດຫາວັດຖຸອຸປະກອນກໍ່ສ້າງ ເຊັ່ນ: ຕະປູ ແລະ ສັງກະສີ ເພື່ອສ້ອມແປງທີ່ຢູ່ອາໄສໃຫ້ປະຊາຊົນໂດຍໄວ.

ສໍາລັບໄລຍະຍາວ, ກົມສັງຄົມສົງເຄາະຈະຮ່ວມກັບທ້ອງຖິ່ນ ວາງແຜນຟື້ນຟູຊີວິດການເປັນຢູ່ໃຫ້ກັບສູ່ສະພາບປົກກະຕິ ໂດຍເນັ້ນໃສ່ການຊ່ວຍເຫຼືອແຕ່ລະຄອບຄົວ.

ຂ່າວ-ພາບ: ກະຊວງ ຮສສ