ລັດຖະມົນຕີ ສສກ ພົບປະພະນັກງານຫຼັກແຫຼ່ງຂົງເຂດການສຶກສາສາ ແລະ ກິລາ ແຂວງວຽງຈັນ.

ທ່ານ ຄຳ ຂັນທະວີວອນ ໄດ້ລາຍງານຫຍໍ້ການຈັດຕັ້ງປະຕິບັດວຽກງານການສຶກສາໃນໄລຍະໜຶ່ງປີຜ່ານມີ ຊຶ່ງທ່ານໄດ້ຍົກໃຫ້ເຫັນບາງຕອນວ່າ: ໃນສົກສຶກສາ 2025-2026 ທົ່ວແຂວງວຽງຈັນ ມີຜູ້ບໍລິຫານ ແລະ ຄູສອນທັງ ພາກລັດ-ເອກະຊົນ ທັງໝົດ 5,631 ຄົນ ຍິງ 3,237 ຄົນ. ໃນນີ້, ມີຄູສອນ ແລະ ຜູ້ອຳນວຍການໂຮງຮຽນຈຳນວນ 5,185 ຄົນ ຍິງ 3,028 ຄົນ, ມີຜູ້ບໍລິຫານ ແລະ ພະນັກງານຫ້ອງການສຶກສາເມືອງ ແລະ ສຶກສາແຂວງ ຈໍານວນ 446 ຄົນ ຍິງ 209 ຄົນ, ມີໂຮງຮຽນທັງໝົດ 700 ແຫ່ງ, ມີນັກຮຽນທັງໝົດ 104,727 ຄົນ ຍິງ 51,390 ຄົນ. ນັກຮຽນສົງ 230 ອົງ ແລະ ສາມັນກິນນອນຊົນເຜົ່າ 666 ຄົນ ຍິງ 248 ຄົນ. ຜ່ານການຈັດຕັ້ງປະຕິບັດບັນດາວຽກຈຸມສຸມ, ນະໂຍບາຍ ແລະ ຍຸດທະສາດຕ່າງໆ ທີ່ກໍານົດໄວ້ໃນສົກຮຽນ 2025-2026 ໂດຍການຜັນຂະຫຍາຍ ແລະ ທຽບໃສ່ 12 ຄາດໝາຍທີ່ສະພາປະຊົນຊົນແຂວງ ກໍານົດ ສາມາດບັນລຸໄດ້ 8 ຄາດໝາຍ; ຄາດໝາຍຫຼັກທີ່ບໍ່ບັນລຸ ມີ 2 ຄາດໝາຍ ແລະ ຄາດໝາຍທີ່ສືບຕໍ່ເກັບກໍາ ມີ 2 ຄາດ ໝາຍ. ນອກຈາກ 12 ຄາດໝາຍຫຼັກ ຍັງໄດ້ຈັດຕັ້ງປະຕິບັດບັນດາຄາດໝາຍຂອງການສຶກສາຕ່າງໆ ຄື: ຊັ້ນການສຶກສາກ່ອນໄວຮຽນ ອັດຕາເຂົ້າຮຽນຂອງເດັກ 0-2 ປີ ປະຕິບັດໄດ້ 8.1%; ອັດຕາເຂົ້າຮຽນຂອງເດັກ 3-4 ປີ ປະຕິບັດໄດ້ 60.6%; ອັດຕາເຂົ້າຮຽນຂອງເດັກ 3-5 ປີ ປະຕິບັດໄດ້ 69.2%; ຈໍານວນນັກຮຽນ ເພີ່ມຂຶ້ນຈາກ 15,823 ຄົນ ເປັນ 16,369 ຄົນ. ອັດຕາເຂົ້າຮຽນລວມຊັ້ນປະຖົມສຶກສາ ປະຕິບັດໄດ້ 100.7%; ອັດຕາຫຼອດເຫຼືອຮອດ ປ5 ປະຕິບັດໄດ້ 88.3%; ອັດຕາຈົບ ປ5 ປະຕິບັດໄດ້ 85.2%; ຈໍານວນນັກຮຽນເພີ່ມຂຶ້ນຈາກ 46,577 ຄົນ ເປັນ 47,171 ຄົນ. ອັດຕາເຂົ້າຮຽນລວມຊັ້ນ ມໍ ຕົ້ນ ປະຕິບັດໄດ້ 84.4%; ອັດຕາເຂົ້າຮຽນລວມຊັ້ນ ມໍ ປາຍ ປະຕິບັດໄດ້ 47.3%. ພ້ອມນີ້ທ່ານຍັງຍົກໃຫ້ເຫັນບັນດາຈຸດອ່ອນຂໍ້ຄົງຄ້າງ, ສິ່ງທ້າທາຍ, ວິທີແກ້ໄຂ ແລະ ທິດທາງແຜນການທີ່ຈະໄດ້ສືບຕໍ່ປະຕິບັດໃນຕໍ່ໜ້າ.

ໂອກາດນີ້, ທ່ານ ທອງສະລິດ ມັງໜໍ່ເມກ ໄດ້ກ່າວສະແດງຄວາມຊົມເຊີຍບັນດາຜົນງານຂົງເຂດວຽກງານການສຶກສາ-ກິລາທີ່ແຂວງວຽງຈັນ ສາມາດປະຕິບັດສຳເລັດຫຼາຍດ້ານຕາມແຜນການທີ່ວາງໄວ້. ພ້ອມກັນນີ້, ທ່ານຍັງໄດ້ເນັ້ນບາງບັນຫາໃຫ້ສືບຕໍ່ເອົາໃຈໃສ່ຈັດຕັ້ງປະຕິບັດ ເປັນຕົ້ນແມ່ນ ໃຫ້ຄະນະພັກ, ຄະນະນຳທຸກຂັ້ນຖືເອົາວຽກງານສຶກສາອົບຮົມການເມືອງ-ແນວຄິດໃຫ້ຜູ້ບໍລິຫານການສຶກສາ-ກິລາ, ຄູອາຈານ ເປັນກົກ, ພັດທະນາຄວາມຮູ້ຄວາມສາມາດໃຫ້ຄູອາຈານໃຫ້ມີຄວາມເຂັ້ມແຂງ, ຕ້ອງຫັນປ່ຽນວຽກງານສຶກສາ-ກິລາໃຫ້ມີບາດກ້າວໃໝ່, ພັດທະນາແຕ່ລະໂຮງຮຽນໃຫ້ກາຍເປັນໂຮງຮຽນຕົວແບບໃນດ້ານຕ່າງໆ, ໃຫ້ຮີບຮ້ອນເກັບກ່ຽວຜົນການສອບເສັງນັກຮຽນເກັ່ງໃນທົ່ວແຂວງ ເພື່ອເປັນການຍູ້ໜູນໃຫ້ມີອາຈານສອນດີ-ສອນເກັ່ງ ແລະ ນັກຮຽນເກັ່ງ ໃຫ້ຫຼາຍຂຶ້ນ, ສືບຕໍ່ປະຕິບັດບັນດາຕົວຊີ້ວັດທີ່ເຫັນວ່າຍັງບໍ່ທັນບັນລຸໃຫ້ສຳເລັດຕາມແຜນການທີ່ວາງໄວ້.

ໃນໂອກາດທີ່ທ່ານ ລັດຖະມົນຕີ ກະຊວງສຶກສາທິການ ແລະ ກິລາ, ພ້ອມດ້ວຍຄະນະ ລົງມາຢ້ຽມຢາມຄັ້ງນີ້ ຍັງໄດ້ນຳເອົາຄອມພິວເຕີຕັ້ງໂຕະ ຈຳນວນ 5 ຊຸດ, ບານເຕະ 15 ໜ່ວຍ ແລະ ບານສົ່ງ 15 ໜ່ວຍ ມາມອບໃຫ້ກັບບັນດາໂຮງຮຽນທີ່ຢູ່ບ້ານແຈ້ງ ເມືອງທຸລະຄົມ ແຂວງວຽງຈັນ ຕື່ມອີກ.

(ແຫຼ່ງຂ່າວ: ແຂວງວຽງຈັນ)