ລັດຖະມົນຕີກະຊວງການເງິນເນັ້ນໃຫ້ຂະແໜງສ່ວຍສາອາກອນຄຸ້ມຄອງການເງິນເປັນທັນສະໄໝ

ກອງປະຊຸມຄັ້ງນີ້, ຈັດຂຶ້ນເພື່ອສະຫຼຸບການເຄື່ອນໄຫວວຽກງານປະຈຳປີ 2025 ແລະ ວາງທິດທາງແຜນການປີ 2026, ພ້ອມນັ້ນບັນດາພະແນກການທີ່ເຂົ້າຮ່ວມໄດ້ປະກອບຄຳເຫັນແນະນຳມາດຕະການຈັດຕັ້ງປະຕິບັດວຽກງານ ແລະ ແຜນວຽກຈຸດສຸມໃນຕໍ່ໜ້າ ເພື່ອປະຕິຮູບກົນໄກການເຮັດວຽກ, ກົນໄກບໍລິການຜູ້ເສຍອາກອນ ແລະ ສ້າງຄວາມເຂັ້ມແຂງໃຫ້ພະນັກງານເຮັດວຽກວິຊາສະເພາະ; ຫັນເອົາວຽກພັດທະນາລະບົບທັນສະ ໄໝເພີ່ມປະສິດທິພາບເກັບລາຍຮັບຊຸກຍູ້ການຮ່ວມມືສາກົນ, ພາກລັດ ແລະ ເອກະຊົນ, ສ້າງຄວາມໂປ່ງໃສໃຫ້ຜູ້ເສຍອາກອນ; ສືບຕໍ່ປະຕິບັດວາລະແຫ່ງຊາດວ່າດ້ວຍການສ້າງເສດຖະກິດເອກະລາດເປັນເຈົ້າເອງ, ຍົກສູງສະຕິຊາດ, ເສີມຂະຫຍາຍສະຕິປັນຍາ, ກໍາລັງແຮງ ແລະ ຄວາມສາມາດຂອງບຸກຄະລາກອນ ເພື່ອຂຸດຄົ້ນທ່າແຮງບົ່ມຊ້ອນສາມາດເກັບລາຍຮັບໄດ້ບັນລຸລື່ນແຜນການ.

ໂອກາດນີ້, ທ່ານ ສັນຕິພາບ ພົມວິຫານ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຄະນະນຳກົມສ່ວຍສາອາກອນຍາດມາໄດ້ຕະຫຼອດໄລຍະຜ່ານມາ. ພ້ອມທັງເນັ້ນໜັກໃຫ້ພະນັກງານຫຼັກແຫຼ່ງຍົກສູງຄວາມເປັນເຈົ້າການຈັດຕັ້ງຜັນຂະຫຍາຍບັນດາມາດຕະການທີ່ສະພາແຫ່ງຊາດໄດ້ກໍານົດ, ເປັນເຈົ້າການຈັດຕັ້ງຜັນຂະຫຍາຍມະຕິກົມການເມືອງສູນກາງພັກ, ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ຢ່າງເຂັ້ມງວດ, ຮັບປະກັນໃຫ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດປະຈໍາປີ 2026 ໃຫ້ສໍາເລັດຕາມຄໍາຂວັນຂອງກະຊວງການເງິນທີ່ວ່າ: “ຍົກສູງບົດບາດຄວາມສາມາດນໍາພາຂອງຄະນະພັກ, ຕັ້ງໜ້າເປັນເຈົ້າຕົນເອງ ບຸກທະລຸຄຸ້ມຄອງການເງິນເປັນທັນສະໄໝ, ຍູ້ແຮງການພັດທະນາເສດຖະກິດ-ສັງຄົມແຫ່ງຊາດໃຫ້ມີຄວາມເຂັ້ມແຂງ, ສີຂຽວ ແລະ ຍືນຍົງ”; ຄະນະນຳແຕ່ລະຂັ້ນຕ້ອງເພີ່ມທະວີວຽກສຶກສາອົບຮົມການເມືອງແນວຄິດໃຫ້ພະນັກງານ-ລັດຖະກອນຢ່າງຕໍ່ເນື່ອງ, ກໍາແໜ້ນ ແລະ ນໍາພາແນວຄິດພະນັກງານໃຫ້ໂລ່ງລ່ຽນ, ມີຄວາມຫ້າວຫັນ, ມີຄວາມສັດຊື່-ບໍລິສຸດ, ມີຈັນຍາບັນໃນການປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ; ປັບປຸງແບບແຜນວິທີເຮັດວຽກຂອງຄະນະນຳແຕ່ລະຂັ້ນໃນການນຳພາ-ຊີ້ນຳຕໍ່ສະມາຊິກພັກ-ພະນັກງານ, ລັດຖະກອນທີ່ຍັງບໍ່ທັນແທດເໝາະກັບສະພາບການເຄັ່ງຮ້ອນຂອງເສດຖະກິດໃນປັດຈຸບັນໃຫ້ມີຄວາມກົມກຽວທັນສະພາບກວ່າເກົ່າ; ຄະນະພັກ, ຄະນະນຳຂະແໜງສ່ວຍສາອາກອນແຕ່ລະຂັ້ນຕ້ອງຮີບຮ້ອນນຳເອົາເນື້ອໃນຈິດໃຈຂອງກອງປະຊຸມໄປຈັດຕັ້ງປະຕິບັດໂດຍແບ່ງຄວາມຮັບຜິດຊອບຢ່າງຊັດເຈນມີການກຳນົດແຜນຄົນ, ແຜນງານລະອຽດ ໃນການປະຕິບັດວຽກວິຊາສະເພາະ ໂດຍມີຕົວຊີ້ວັດໃນການຈັດຕັ້ງປະຕິບັດ, ກໍານົດເປົ້າໝາຍ ແລະ ມີຈຸດສຸມຊັດເຈນ;ຕິດຕາມ, ກວດກາ ການປະຕິບັດໜ້າທີ່ຂອງພະນັກງານ-ລັດຖະກອນ, ກວດກາ ແລະ ຕ້ານບັນດາປະກົດການຫຍໍ້ທໍ້ຕ່າງໆ ໃນຖັນແຖວພະນັກງານຂະແໜງສ່ວຍສາອາກອນຂອງຕົນຢ່າງຈິງຈັງ ແລະ ປະຕິບັດວິໄນຢ່າງເຂັ້ມງວດຕໍ່ຜູ້ທີ່ລະເມີດລະບຽບກົດໝາຍ ແລະ 10 ຂໍ້ຫ້າມຂອງພະນັກງານຂະແໜງການເງິນ;ເອົາໃຈໃສ່ພັດທະນາບຸກຄະລາກອນດ້ວຍການບຳລຸງສ້າງ ແລະ ຍົກລະດັບຄວາມຮູ້ດ້ານວິຊາສະເພາະໃຫ້ພະນັກງານຢູ່ແຕ່ລະຂັ້ນຢ່າງຮອບດ້ານ.

ຂ່າວ-ພາບ: ບຸນອູ້ມ