(2nd Joint Working Committee Meeting) ແລະກອງປະຊຸມກ່ຽວຂ້ອງ, ພ້ອມທັງຢ້ຽມຢາມພື້ນຖານການຜະລິດຂອງບຣູໄນດາຣູຊາລາມຈຳນວນໜຶ່ງ. ການຈັ້ດຕັ້ງປະຕິບັດວຽກງານດັ່ງກ່າວນີ້ແມ່ນເປັນການສືບຕໍ່ກົນໄກການຮ່ວມມືສອງຝ່າຍໃນຂະແໜງກະສິກຳຂອງສອງປະເທດສປປລາວແລະບຣູໄນດາຣູຊາລາມ.
ໃນການຢ້ຽມຢາມຄັ້ງນີ້, ທ່ານລັດຖະມົນຕີກະຊວງກະສິກຳແລະປ່າໄມ້ພ້ອມດ້ວຍທ່ານເອກອັກຄະລັດຖະທູດແຫ່ງສປປລາວປະຈຳບຣູໄນດາຣູຊາລາມແລະຄະນະຕິດຕາມຈຳນວນໜຶ່ງໄດ້ເຂົ້າຢ້ຽມຂ່ຳນັບສົມເດັດຊຸນຕານຮາຈິຮັດຊານານໂບນເກຍແຫ່ງບຣູໄນດາຣຸຊາລາມເພື່ອສະແດງຄວາມເຄົາລົບແລະລາຍງານຈຸດປະສົງການເຄື່ອນໄຫວຢ້ຽມຢາມ, ພ້ອມທັງໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນຈາກພະນະທ່ານປະທານປະເທດ, ພະນະທ່ານນາຍົກລັດຖະມົນຕີ, ລັດຖະບານແລະປະຊາຊົນລາວເຖິງສົມເດັດຊຸນຕານຮາຈິຮັດຊານານໂບນເກຍ.
ທ່ານລັດຖະມົນຕີໄດ້ນຳພາຄະນະຜູ້ແທນຝ່າຍລາວພົບປະສອງຝ່າຍກັບທ່ານ ດາໂຕ ເຊີຣີ ເຊເທຍ ດຣ. ຮາຈິ ອັບດຸນ ມານາຟ ບິນ ຮາຈິ ເມຕຸດຊິນ (Dato Seri Setia Dr. Haji Abdul Manaf bin Haji Metussin) ລັດຖະມົນຕີກະຊວງຊັບພະຍາກອນແລະທ່ອງທ່ຽວແຫ່ງບຣູໄນດາຣຸຊາລາມພ້ອມຄະນະແລະໄດ້ປຶກສາຫາລືແລະທົບທວນການຮ່ວມມືລະຫວ່າງສອງກະຊວງໃນໄລຍະຜ່ານມາແລະການຮ່ວມມືສອງຝ່າຍໃນຕໍ່ໜ້າໂດຍສະເພາະແມ່ນການຮັບຮອງເອົາຜົນກອງປະຊຸມJWC ຄັ້ງທີ 2 ເພື່ອຊຸກຍູ້ສົ່ງເສີມວຽກງານການລົງທຶນ-ການຄ້າດ້ານກະສິກຳໂດຍການມີສ່ວນຮ່ວມຂອງຜູ້ປະກອບການ.
ນອກຈາກນີ້, ຄະນະຜູ້ແທນຝ່າຍລາວໄດ້ເຂົ້າຮ່ວມກອງປະຊຸມຄະນະກຳມາທິການຮ່ວມມືສອງຝ່າຍລາວ-ບຣູໄນດາຣຸຊາລາມຄັ້ງທີ2 (2nd Joint Working Committee) ໂດຍການເປັນປະທານຮ່ວມຂອງທ່ານບຸນເດດສຸດທະວິໄລຫົວໜ້າກົມແຜນການແລະການຮ່ວມມືແລະທ່ານນາງຢັງ ມູເລຍ ດາຢັງ ນໍຣາລິນດາ ບິນຕິ ຮາຈິ ອິບຣາຮິມ (Yang Mulia Dayang Noralinda Binti Haji Ibrahim)ຮອງຫົວໜ້າຫ້ອງການກະຊວງຊັບພະຍາກອນແລະທ່ອງທ່ຽວ ຊຶ່ງກອງປະຊຸມຄັ້ງທີ 1 ໄດ້ຈັດຂຶ້ນໃນເດືອນກໍລະກົດ 2023 ຢູ່ສປປລາວ. ກອງປະຊຸມດັ່ງກ່າວໄດ້ເຫັນດີເປັນເອກະພາບໃນການນຳສົ່ງຜະລິດຕະພັນກະສິກຳໂດຍສະເພາະແມ່ນເຂົ້າ, ກາເຟ, ໝາກໄມ້ແລະພືດອົບແຫ້ງໄປບຣູໄນດາຣູຊາລາມໃນຂັ້ນເລີ່ມຕົ້ນ (50 ໂຕນ) ແລະພ້ອມທັງສຶກສາຄວາມເປັນໄປໄດ້ໃນການສົ່ງອອກວັດຖຸດິບອາຫານສັດ (ສາລີແລະມັນຕົ້ນ) ໄປບຣູໄນດາຣູຊາລາມໃນຕໍ່ໜ້າ.
ຄະນະຜູ້ແທນຝ່າຍລາວໄດ້ນຳພາພາກທຸລະກິດເຂົ້າຮ່ວມກອງປະຊຸມພົບປະພາກທຸລະກິດລາວ-ບຣູໄນໂດຍການເປັນປະທານຂອງທ່ານສີປະໄພໄຊສົງຄາມຫົວໜ້າຫ້ອງການກະຊວງກະສິກຳແລະປ່າໄມ້ສປປລາວ, ໂດຍມີຜູ້ປະກອບການຂອງທັງສອງຝ່າຍເຂົ້າຮ່ວມ (ຜູ້ປະກອບການຝ່າຍລາວປະກອບມີໂຮງສີເຂົ້າຈຳປາຫອມ, ໂຮງສີເຂົ້າສະຫວັນນະເຂດຂອງກຸ່ມບໍລິສັດໂຊກໄຊແລະທະນາຄານພັດທະນາລາວ) ແລະໄດ້ປຶກສາຫາລືຊ່ອງທາງໃນການດຳເນີນທຸລະກິດຮ່ວມກັນໃນຕໍ່ໜ້າໂດຍສະເພາະແມ່ນການສົ່ງອອກຜະລິດຕະພັນກະສິກຳຈາກສປປລາວໄປບຣູໄນດາຣູຊາລາມໂດຍມີການສະໜັບສະໜູນແລະອຳນວຍຄວາມສະດວກຈາກພາກລັດຂອງທັງສອງປະເທດ.
ນອກຈາກນີ້, ຄະນະຜູ້ແທນຍັງໄດ້ຢ້ຽມຢາມພື້ນຖານການຜະລິດທີ່ສຳຄັນຈຳນວນໜຶ່ງຂອງບຣູໄນດາຣູຊາລາມໂດຍສະເພາະຟາມປູກພືດຜັກໂດຍນຳໃຊ້ລະບົບໄຮໂດໂພນິສ (Hydroponis)ແລະຟາມລ້ຽງສັດນ້ຳ (ກຸ້ງແລະປາ) ອີກດ້ວຍ.
(ຂ່າວ-ພາບ: ກະຊວງ ກປ)
ຄໍາເຫັນ