ຂ່າວສານຊີອາໄອລາຍງານວ່າ: ໃນທ້າຍອາທິດຜ່ານມາ, ອາຊຽນໄດ້ຈັດກອງປະຊຸມລັດຖະມົນຕີຕ່າງປະເທດສະ ໄໝພິເສດເພື່ອແລກປ່ຽນຄວາມເຫັນກ່ຽວກັບການເພີ່ມທະວີຂຶ້ນຂອງສະຖານະການຢູ່ເຂດຕາເວັນອອກກາງໃນປັດຈຸບັນ ກໍຄື ຜົນກະທົບຕໍ່ພາກພື້ນ. ກອງປະຊຸມໄດ້ອອກຖະແຫຼງການໂດຍສະແດງຄວາມເປັນຫ່ວງຢ່າງຍິ່ງຕໍ່ການປະທະກັນຢູ່ພາກພື້ນຕາເວັນອອກກາງຮຸນແຮງຂຶ້ນຕື່ມ, ພ້ອມທັງຮຽກຮ້ອງໃຫ້ຝ່າຍຕ່າງໆທີ່ກ່ຽວຂ້ອງຢຸດຕິການເຄື່ອນໄຫວທີ່ເປັນປໍລະປັກກັນໃນທັນທີ, ແກ້ໄຂຂໍ້ຂັດແຍ້ງກັນດ້ວຍການສົນທະນາ ແລະ ວິທີທາງການທູດ.
ຂ່າວລະບຸວ່າ: ບັນດາລັດຖະມົນຕີການຕ່າງປະເທດໄດ້ປຶກສາຫາລືກ່ຽວກັບການປະທະກັນທີ່ສົ່ງຜົນກະທົບອອກເປັນວົງກວ້າງ, ໂດຍສຸມໃສ່ບັນຫາກ່ຽວກັບສະຖຽນລະພາບດ້ານຕ່ອງໂສ້ການໜອງພະລັງງານ, ການເໜັງຕີງຂອງລາຄາສິນຄ້າທີ່ຊື້-ຂາຍກັນໃນຈຳນວນຫຼວງຫຼາຍ, ຄວາມໝັ້ນຄົງດ້ານເສດຖະກິດມະຫາພາກ, ການປ້ອງກັນຄວາມປອດໄພດ້ານຮ່າງກາຍຂອງພົນລະເມືອງອາຊຽນທີ່ຢູ່ເຂດປະທະກັນ ແລະ ອື່ນໆ.
ຜູ້ຕາງໜ້າປະເທດປະທານໝູນວຽນອາຊຽນໄດ້ກ່າວຢືນຢັນຫຼັງກອງປະຊຸມວ່າ: ພາລະກິດເຄັ່ງຮ້ອນທີ່ສຸດໃນປັດຈຸບັນຄື: ຊຸກຍູ້ໃຫ້ບັນດາຝ່າຍຢຸດຍິງໃນທັນທີ, ຄວາມສາມັກຄີ ແລະ ການເຄື່ອນໄຫວແບບລວມໝູ່ເປັນວິທີຮັບມືທີ່ມີປະສິດທິຜົນທີ່ສຸດຂອງອາຊຽນ.
ຄໍາເຫັນ