ລັດວິສາຫະກິດຍັງບໍ່ທັນເຂັ້ມແຂງ ເກີດຈາກຫຼາຍປັດໄຈ

ສ່ວນກຸ່ມລັດຖືຮຸ້ນແຕ່ 51%-99% ມີຄວາມພົ້ນເດັ່ນຄື ເຖິງວ່າຈະມີຈໍານວນຫົວໜ່ວຍໜ້ອຍທີ່ສຸດ (ພຽງ 13 ຫົວໜ່ວຍ) ແຕ່ມີການຈ້າງງານສູງ ເຖິງ 8,564 ຄົນ (ສະເລ່ຍ 659 ຄົນຕໍ່ຫົວໜ່ວຍ) ແລະ ຍັງສາມາດສ້າງກຳໄລໄດ້ດີ, ສະແດງໃຫ້ເຫັນວ່າເປັນກຸ່ມວິສາຫະກິດຂະໜາດໃຫຍ່ ທີ່ມີການບໍລິຫານຈັດການແຮງງານຈໍານວນຫຼາຍໄດ້ຢ່າງສົມເຫດສົມຜົນ. ໃນຂະນະທີ່ ກຸ່ມລັດຖືຮຸ້ນໜ້ອຍກວ່າ 51% ມີພະນັກງານ 7,991 ຄົນ (ໃກ້ຄຽງກັບກຸ່ມທີ 2) ແຕ່ກັບສາມາດ ສ້າງກໍາໄລໄດ້ສູງສຸດເຖິງ 4,044.79 ຕື້ກີບ. ດັ່ງນັ້ນ, ຈຶ່ງເຫັນໄດ້ວ່າ ລັດວິສາຫະກິດ 100% ຍັງເນັ້ນໜັກ ບົດບາດທາງສັງຄົມໃນການສ້າງວຽກເຮັດງານທໍາ ສົ່ງຜົນໃຫ້ລາຍຈ່າຍເງິນເດືອນກວມເອົາສ່ວນແບ່ງລາຍຮັບ ໄປຢ່າງຫຼວງຫຼາຍ, ສະນັ້ນ, ຈໍາເປັນຕ້ອງໄດ້ປັບປຸງປະສິດທິພາບໃນການນໍາໃຊ້ແຮງງານ ໃຫ້ສາມາດສ້າງມູນຄ່າເພີ່ມ ແລະ ຜົນກຳໄລທີ່ສູງຂຶ້ນໃຫ້ສົມຄູ່ກັບຈໍານວນຄົນ ຄືກັບກຸ່ມຮ່ວມທຶນ;

ລັດວິສາຫະກິດບໍ່ທັນເຂັ້ມແຂງເກີດຈາກຫຼາຍໄປໄຈ ຄື: ຍັງບໍ່ມີແຜນຍຸດທະສາດການປະຕິຮູບ ແລະ ພັດທະນາລັດວິສາຫະກິດ ທີ່ຊັດເຈນເທື່ອ ເພື່ອກໍານົດເປົ້າໝາຍ, ຄາດໝາຍ, ວຽກງານຈຸດສຸມທີ່ຊັດເຈນ, ຍັງບໍ່ໄດ້ກຳນົດໜ້າທີ່, ເປົ້າໝາຍ ແລະ ຈຸດປະສົງຂອງກຸ່ມລັດວິສາຫະກິດໃຫ້ຊັດເຈນ, ສົ່ງຜົນເຮັດໃຫ້ການຄຸ້ມຄອງຜ່ານມາ ແມ່ນຍັງມີລັກສະນະບໍ່ສອດຄ່ອງເໝາະສົມຕາມຈຸດພິເສດສະເພາະຂອງແຕ່ລະກຸ່ມ, ການຄຸ້ມຄອງ ຍັງບໍ່ທັນຮັດກຸມເປັນລະບົບ, ບໍ່ທັນສະໄໝ, ກົນໄກການຄຸ້ມຄອງລະດັບມະຫາພາກຍັງບໍ່ຈະແຈ້ງ ແລະ ມີຫຼາຍອັນຊໍ້າຊ້ອນກັນ, ນິຕິກຳ ແລະ ລະບຽບການຄຸ້ມຄອງ ຍັງບໍ່ເປັນລະບົບຄົບຊຸດ ແລະ ຍັງບໍ່ເປັນການສົ່ງເສີມການດໍາເນີນທຸລະກິດເທົ່າທີ່ຄວນ, ໂຄງຮ່າງການຈັດຕັ້ງບາງຫົວໜ່ວຍມີລັກສະນະໃຫຍ່ໂຕເກີນຄວາມຈໍາເປັນ ຜູ້ບໍລິຫານ (ສະພາບໍລິຫານ ແລະ ຄະນະອໍານວຍການ) ສ່ວນຫຼາຍແມ່ນຂາດບົດຮຽນ-ປະສົບປະການ ແລະ ບໍ່ເປັນມືອາຊີບ, ການແຕ່ງຕັ້ງພະນັກງານຂອງລັດໄປບໍລິຫານຄຸ້ມຄອງທຸລະກິດ ສ່ວນຫຼາຍຍັງມີຄຸນສົມບັດ ແລະ ຄວາມສາມາດທີ່ບໍ່ແທດເໝາະ ແລະ ບໍ່ມີເງື່ອນໄຂຄົບຖ້ວນ, ການຕິດຕາມ, ກວດກາ, ປະເມີນຜົນລັດວິສາຫະກິດ ແມ່ນເຮັດບໍ່ໄດ້ດີ, ບໍ່ຕໍ່ເນື່ອງ, ບໍ່ມີລະບົບ ແລະ ກົນໄກທີ່ຈະແຈ້ງ, ປະປ່ອຍໃຫ້ບັນຫາໃນລັດວິສາຫະກິດຊຳເຮື້ອ ແລະ ບໍ່ມີວິທີແກ້ໄຂໃຫ້ທັນການ, ການຕິດຕາມເກັບກຳ ແລະ ຄຸ້ມຄອງຂໍ້ມູນວິສາຫະກິດລັດລົງທຶນ ຍັງບໍ່ເປັນລະບົບ ແລະ ຂາດຂໍ້ມູນໃນການວິເຄາະ-ວິໄຈບັນຫາ, ການດໍາເນີນທຸລະກິດບາງລັດວິສາຫະກິດ ຍັງບໍ່ເປັນໄປຕາມກົນໄກເສດຖະກິດຕະຫຼາດ, ມີຕົ້ນທຶນສູງ, ບໍ່ສາມາດແຂ່ງຂັນໄດ້ ແລະ ມີໜີ້ສິນຄຸມເຄືອ ແລະ 10. ການປະຕິບັດລະບຽບກົດໝາຍ ຕໍ່ຜູ້ລະເມີດວິໄນທາງການເງິນ ແລະ ກະທໍາຄວາມເສຍຫາຍໃຫ້ແກ່ວິສາຫະກິດລັດລົງທຶນ ທີ່ສົ່ງຜົນກະທົບໃຫ້ລັດຖະບານຕ້ອງໄດ້ແບກຫາບພາລະໜີ້ສິນຜ່ານມາຍັງປະຕິບັດບໍ່ທັນເດັດຂາດ ເຮັດໃຫ້ພະນັກງານຈໍານວນໜຶ່ງ ບໍ່ຢ້ານກົວ-ບໍ່ເຄົາລົບລະບຽບກົດ ໝາຍ ແລະ ວຽກງານອື່ນ.

ມາດຕະການຈັດຕັ້ງປະຕິບັດໃນຕໍ່ໜ້າ ຄະນະປະຕິຮູບແຕ່ລະຂັ້ນ, ສະພາບບໍລິຫານ, ຄະນະອໍານວຍການ ເຊື່ອມຊຶມບັນດານະໂຍບາຍ, ນິຕິກຳ ແລະ ແຜນວຽກຈຸດສຸມຕ່າງໆ ເພື່ອນໍາໄປຜັນຂະຫຍາຍເຂົ້າໃນແຜນດໍາເນີນງານຕົວຈິງຂອງລັດວິສາຫະກິດທີ່ຕົນເອງຮັບຜິດຊອບ ແລະ ນໍາພາການຈັດຕັ້ງປະຕິບັດຢ່າງຕັ້ງໜ້າ; ຄະນະປະຕິຮູບແຕ່ລະຂັ້ນລົງຊຸກຍູ້ຕິດຕາມໃນການຈັດຕັ້ງປະຕິບັດຢ່າງເປັນປະຈຳ; ຜ່ານການຈັດຕັ້ງປະຕິບັດຕ້ອງມີການສະຫຼຸບລາຍງານ ແລະ ປະເມີນຜົນເປັນແຕ່ລະໄລຍະ.