ໃນວັນທີ 15 ທັນວາຜ່ານມາ,ຫຼາຍຂະແໜງການພາກລັດຮ່ວມກັບບໍລິສັດ ຊີໂນ-ອາກຣີ ໂປຕາສ ຕັ້ງຢູ່ບ້ານດົງໃຕ້ ເມືອງທ່າແຂກ ແຂວງຄຳມ່ວນ ໄດ້ຈັດກອງປະຊຸມປຶກສາຫາລືການຂຶ້ນທະບຽນແຮງງານທັງພາຍໃນ ແລະ ແຮງງານຕ່າງປະເທດ ພາຍໃນບໍລິສັດຊີໂນ-ອາກຣີ ໂປຣຕາສ ຈຳກັດ ໂດຍມີທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງໆຄຳມ່ວນ, ມີທ່ານ ໂຈ ຈີຫັນ ຜູ້ຊ່ວຍອຳນວຍການໃຫຍ່ ບໍລິສັດຊີໂນ-ອາກຣີ ໂປຕາສ, ທ່ານ ຫຼີວ ເຟີຍຫຼົງ ອຳນວຍການຝ່າຍບໍລິຫານ ບໍລິສັດຊີໂນ-ອາກຣີ ໂປຣຕາສ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມໄດ້ຮັບຟັງການນໍາສະເໜີບາງມາດຕາຂອງກົດໝາຍ, ລະບຽບການທີ່ກ່ຽວຂ້ອງ ແລະ ເອກະສານຄູ່ມືຂັ້ນຕອນການຂຶ້ນທະບຽນລະຫັດ ID ໃຫ້ຜູ້ອອກແຮງງານຈາກຄະນະກຳມະການ.
ໂອກາດນີ້, ທ່ານ ແກ້ວອຸດອນ ບຸດສິງຂອນ ໄດ້ໃຫ້ກຽດມີຄຳເຫັນເນັ້ນບາງບັນຫາທີ່ສຳຄັນກ່ຽວກັບວຽກງານຂຶ້ນທະບຽນແຮງງານ ແລະ ວຽກງານຄຸ້ມຄອງແຮງງານພາຍໃນ ແລະ ຕ່າງປະເທດ, ວຽກງານປະກັນສັງຄົມ, ບັນຫາສິ່ງແວດລ້ອມ, ການຮັກສາຄວາມປອດໄພ ລວມເຖິງບັນຫາການຄຸ້ມຄອງສະຖານທີ່ບັນເທີງ ແລະ ບັນຫາສິ່ງເສບຕິດໃນຂອບເຂດໂຄງການ. ຜ່ານການປຶກສາລືຢ່າງກົງໄປກົງມາ ໂດຍໄດ້ມອບໝາຍໃຫ້ບໍລິສັດເຜີຍແຜ່ເນື້ອໃນຈິດໃຈວຽກງານການຂຶ້ນທະບຽນແຮງງານໃຫ້ພະນັກງານ, ກຳມະກອນທີ່ເຮັດວຽກນຳບໍລິສັດຂອງຕົນໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ ພ້ອມທັງເປັນເຈົ້າການຂຶ້ນທະບຽນລະຫັດ ID ໃຫ້ຜູ້ອອກແຮງງານ,ສ້າງສັນຍາແຮງງານລະຫວ່າງຜູ້ໃຊ້ແຮງງານ ແລະ ຜູ້ອອກແຮງງານ, ສ້າງກົດລະບຽບພາຍໃນຫົວໜ່ວຍແຮງງານ, ນໍາເອົາຜູ້ອອກແຮງງານ ເຂົ້າເປັນສະມາຊິກປະກັນສັງຄົມ ແລະ ດຳເນີນການກວດສຸຂະພາບປະຈຳປີໃຫ້ຜູ້ອອກແຮງງານລາວ ແລະ ຕ່າງປະເທດທີ່ຢູ່ໃນຄວາມຮັບຜິດຊອບຂອງຕົນ,ແຕ່ງຕັ້ງພະນັກງານຂອງບໍລິສັດຊີໂນ-ອາກຣີ ແລະ ບັນດາບໍລິສັດທີ່ຊັບຄອນແທັກທັງໝົດ ເຮັດວຽກຮ່ວມກັບຄະນະວິຊາການຂຶ້ນທະບຽນແຮງງານ, ຂໍ້ມູນຕຳແໜ່ງງານວ່າງ, ຄວາມຕ້ອງການແຮງງານແຕ່ລະໄລຍະລົງໃນລະບົບໂປແກຣມ, ລາຍງານຂໍ້ມູນການເຂົ້າ-ອອກຂອງຜູ້ອອກແຮງງານ ແລະ ການປ່ຽນແປງເງິນເດືອນຂອງຜູ້ອອກແຮງງານໃນແຕ່ລະເດືອນຢ່າງເປັນປົກະຕິ,ໃຫ້ບໍລິສັດຈັດສະຖານທີ່ໃຫ້ຄະນະວິຊາການຈາກພະແນກແຮງງານ ແລະ ສະຫວັດດີການສັງຄົມແຂວງ ເພື່ອນໍາພາການຈັດຕັ້ງປະຕິບັດຂຶ້ນທະບຽນລະຫັດ ID ແຮງງານລາວ ແລະ ແຮງງານຕ່າງປະເທດໃນແຕ່ລະຂົງເຂດຂອງໂຄງການຈົນສຳເລັດ, ສືບຕໍ່ເອົາໃຈໃສ່ປະຕິບັດຕາມກົດໝາຍແຮງງານ ແລະ ນິຕິກຳກ່ຽວຂ້ອງຢ່າງເຂັ້ມງວດ, ໃນການນໍາໃຊ້ແຮງງານຕ່າງປະເທດຕ້ອງປະກອບເອກະສານໃຫ້ຖືກຕ້ອງ ເປັນຕົ້ນການຂໍອະນຸຍາດນຳເຂົ້າຈາກກະຊວງແຮງງານ ແລະ ສະຫັວດດີການສັງຄົມ, ສະເໜີຂໍອອກວີຊ່າແຮງງານ, ບັດແຮງງານ ແລະ ບັດພັກເຊົາຈາກພາກສ່ວນກ່ຽວຂ້ອງຕາມລະບຽບກົດໝາຍ, ເພີ່ມທະວີເອົາໃຈໃສ່ປະຕິບັດພັນທະອາກອນຕ່າງໆ ຕາມກົດໝາຍວ່າດ້ວຍສ່ວຍສາອາກອນ ແລະ ນິຕິກຳອື່ນໆທີ່ກ່ຽວຂ້ອງຢ່າງເຂັ້ມງວດ.
ຂ່າວ: ກອງຄຳ
ຄໍາເຫັນ