 |
ທ່ານ ນາງ ອິນລາວັນ ແກ້ວບຸນພັນ ໄດ້ໃຫ້ຮູ້ນິຕິກຳທີ່ເປັນບ່ອນອີງ, ຄວາມໝາຍ-ຄວາມສໍາຄັນການສະເຫຼີມສະຫຼອງວັນສ້າງຕັ້ງແນວລາວສ້າງຊາດເນື້ອແທ້, ແມ່ນການທົບທວນຫວນຄືນ, ການລົງເລິກຮຽນຮູ້. ການເສີມສ້າງມູນເຊື້ອອັນສະຫງ່າງາມ, ສັນລະເສີນ ແລະ ເສີມຂະຫຍາຍຜົນງານອັນໃຫຍ່ຫຼວງຂອງແນວລາວອິດສະຫຼະ, ແນວລາວຮັກຊາດໃນເມື່ອກ່ອນ ກໍຄືແນວລາວສ້າງຊາດໃນປັດຈຸບັນ ໃຫ້ໂດດເດັ່ນຂຶ້ນຕື່ມ, ຍາມໃດກໍເຫັນວ່າແນວລາວສ້າງຊາດດໍາລົງບົດບາດເປັນບ່ອນສຶກສາອົບຮົມ, ເປັນຫຼັກແຫຼ່ງເຕົ້າໂຮມກຳລັງແຮງ ແລະ ຄວາມສາມັກຄີປອງດອງຂອງປະຊາຊົນລາວບັນດາເຜົ່າ, ຊັ້ນຄົນ, ເພດໄວ ແລະ ສາສະໜາ ເຂົ້າໃນພາລະກິດຕໍ່ສູ້ປົດປ່ອຍປະເທດຊາດໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາປະເທດຊາດໃນປັດຈຸບັນ. ໃນທ່າມກາງການກ້າວເດີນຂອງປະເທດເຮົາພາຍໃຕ້ການນໍາພາຂອງພັກໃນປັດຈຸບັນ ຊຶ່ງສະພາບແວດລ້ອມສາກົນ, ພາກພື້ນ ແລະ ພາຍໃນປະເທດມີທັງຂໍ້ສະດວກ, ສິ່ງອໍານວຍ ແລະ ມີຂໍ້ຫຍຸ້ງຍາກທ້າທາຍຫຼາຍປະການນັ້ນ. ການເພີ່ມທະວີວຽກງານແນວໂຮມຂອງພັກແມ່ນເປັນປັດໄຈສໍາຄັນໃນການຈັດຕັ້ງແຜນນະໂຍບາຍຂອງພັກ ແລະ ແຜນພັດທະນາປະເທດຂອງລັດ, ການປະກອບສ່ວນຂອງແນວລາວສ້າງຊາດໄດ້ດີເທົ່າໃດ ກໍຈະກະທົບຢ່າງຕັ້ງໜ້າຕໍ່ໝາກຜົນຂອງການຜັນຂະຫຍາຍແຜນນະໂຍບາຍຂອງພັກເຂົ້າສູ່ພາກປະຊາຊົນຢ່າງເປັນຂະບວນກວ້າງຂວາງ ແລະ ຖືກແທດຕົວຈິງກວ່າເກົ່າ.
ການສະເຫຼີມສະຫຼອງ 75 ປີ ວັນສ້າງຕັ້ງແນວລາວສ້າງຊາດ ແມ່ນຂະບວນການປັບປຸງບູລະນະອົງການແນວລາວສ້າງຊາດທຸກຂັ້ນ, ແມ່ນການປັບປຸງພັນທະພາບລະຫວ່າງຊົນຊັ້ນກຳມະກອນ, ຊາວກະສິກອນ, ປັນຍາຊົນ-ຊັ້ນຄົນ ແລະ ບັນດາອົງການພາຄີພາຍໃຕ້ການນໍາພາຂອງພັກ ແລະ ເປັນການເພີ່ມທະວີການປະສານສົມທົບ, ຮັດແໜ້ນສາຍພົວພັນລະຫວ່າງພັກ, ລັດ, ການຈັດຕັ້ງສັງຄົມກັບຄະນະກຳມະການແນວລາວສ້າງຊາດ ໃຫ້ເຂັ້ມແຂງກ້າວໜຶ່ງແມ່ນການປັບປຸງ ແລະ ຍົກສູງລະດັບການເຄື່ອນໄຫວ, ແບບແຜນວິທີເຮັດວຽກ ແລະ ຄວາມຮັບຜິດຊອບການເມືອງບັ້ນໃຫຍ່ໜຶ່ງ ຂອງທົ່ວຄະນະກຳມະການແນວລາວສ້າງຊາດທຸກຂັ້ນ, ທຸກທ່ານ ແລະ ຜູ້ສະໜັບສະໜູນທຸກຄົນມີການຫັນປ່ຽນໃໝ່ ບົນຈິດໃຈເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງໃຫ້ແຂງແຮງກວ່າເກົ່າ.
ສໍາລັບຈຸດປະສົງ-ຄາດໝາຍ ເພື່ອທົບທວນຫວນຄືນມູນເຊື້ອອັນສະຫງ່າງາມ ແລະ ຜົນງານອັນໃຫຍ່ຫຼວງ ໃນພາລະກິດຕໍ່ສູ້ປົດປ່ອຍຊາດ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດທີ່ພັກ, ລັດ, ແນວລາວສ້າງຊາດ ແລະ ປະຊາຊົນບັນດາ ເຜົ່າຍາດມາໄດ້ຕະຫຼອດໄລຍະ 75 ປີ ຜ່ານມາ; ເພື່ອຍົກສູງບົດບາດການນໍາພາຂອງພັກ, ລັດທຸກຂັ້ນ, ອົງການພາຄີທຸກຂັ້ນ ຕໍ່ວຽກງານແນວໂຮມ, ແນໃສ່ສ້າງກ້ອນກໍາລັງມະຫາສາມັກຄີຂອງທົ່ວປວງຊົນ ເພື່ອປົກປັກຮັກສາ ແລະ ສ້າງສາພັດທະ ນາປະເທດຊາດໃນໄລຍະໃໝ່; ສ້າງໃຫ້ເກີດມີຂະບວນການແຂ່ງຂັນຮັກຊາດ ແລະ ພັດທະນາດ້ານຕ່າງໆຢ່າງກວ້າງຂວາງ ເຮັດໃຫ້ການສະເຫຼີມສະຫຼອງວັນສ້າງຕັ້ງແນວລາວສ້າງຊາດຕິດພັນກັບການສະເຫຼີມ ສະຫຼອງ 3 ວັນປະຫວັດສາດ ແລະ ເຮັດໃຫ້ກາຍເປັນປາງບຸນໜຶ່ງຂອງທົ່ວປວງຊົນ, ມີບັນຍາກາດເບີກບານມ່ວນຊື່ນ, ມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ, ເປັນການປຸກລະດົມ ແລະ ປະກອບສ່ວນເຂົ້າໃນການກະກຽມກອງປະຊຸມໃຫຍ່ 3 ຂັ້ນ, ກອງປະຊຸມໃຫຍ່ຄັ້ງທີ XII ຂອງພັກ ແລະ ກອງປະຊຸມໃຫຍ່ຄັ້ງທີ XII ຂອງຜູ້ແທນແນວລາວສ້າງຊາດທົ່ວປະເທດ; ຖືໂອກາດ 75 ປີ ເປັນການບໍາລຸງສ້າງຄວາມຮັບຮູ້ຕໍ່ມະຕິ 108 ຂອງກົມການເມືອງສູນກາງພັກ ແລະ ມະຕິອື່ນຂອງພັກ ເປັນການປຸກລະດົມ, ສ້າງມະນາຈິດປະຕິວັດຂອງພະນັກງານ, ສະມາຊິກພັກຜູ້ເຮັດວຽກງານແນວໂຮມທຸກພາກ ສ່ວນ ໂດຍສະເພາະເພື່ອສ້າງຄວາມເຂັ້ມແຂງໃຫ້ອົງການແນວລາວສ້າງຊາດແຕ່ລະຂັ້ນ ໃນໄລຍະໃໝ່ສູງຂຶ້ນກວ່າເກົ່າ ບົນຈິດໃຈ 4 ເສີມສ້າງ: ເສີມສ້າງຄຸນງານຄວາມດີ, ເສີມສ້າງຄວາມສາມັກຄີ, ເສີມສ້າງຄຸນວຸດທິ ແລະ ເສີມສ້າງຄຸນນະທໍາ ຂອງພະນັກງານແນວລາວສ້າງຊາດທຸກທ່ານ, ທຸກຂັ້ນ. ພ້ອມດຽວກັນນັ້ນ, ກໍເປັນເວລາທີ່ພວກເຮົາຕ້ອງຕັ້ງໜ້າຊອກຄົ້ນ, ຖອດຖອນບົດຮຽນວຽກງານແນວໂຮມໃນໄລຍະໃໝ່ ແລະ ທັງເປັນການຍົກສູງບົດບາດຂອງແນວລາວສ້າງຊາດທຸກຂັ້ນ ໃຫ້ສູງຂຶ້ນຕື່ມ. ພ້ອມນັ້ນ, ຍັງໄດ້ໃຫ້ຮູ້ດ້ານເນື້ອໃນ, ຮູບການລວມຂອງການສະເຫຼີມສະຫຼອງວັນດັ່ງກ່າວ.
ທ່ານ ນາງ ອິນລາວັນ ແກ້ວບຸນພັນ ກ່າວຕື່ມວ່າ: ສໍາລັບກິດຈະກໍາທົ່ວໄປ: 1) ຈັດຕັ້ງປາຖະກະ ຖາມູນເຊື້ອ ແລະ ຜົນງານຂອງແນວລາວສ້າງຊາດຕະຫຼອດໄລຍະ 75 ປີ; 2) ຈັດຕັ້ງຢ້ຽມຢາມ, ອວຍ ພອນ ແລະ ມອບຂອງຂວັນໃຫ້ຄອບຄົວອະດີດການນຳແນວລາວສ້າງຊາດ ລຸ້ນທີ 1, 2 ແລະ ຂັ້ນທ້ອງຖິ່ນ; 3) ຈັດງານວາງສະແດງ ວັດທະນະທຳຊົນເຜົ່າ (ທີ່ສວນພຶກສາ); 4) ບູລະນະສ້ອມແປງຫໍມູນເຊື້ອ ແລະ ຖໍ້າແນວລາວຮັກຊາດ ຢູ່ແຂວງຫົວພັນ; 5) ຊຸກຍູ້ຂະບວນການລົບລ້າງຄວາມທຸກຍາກ ແລະ ສ້າງບ້ານປອດຢາເສບຕິດ; 6) ຊຸກຍູ້ຂະບວນການ 9 ຂໍ້ແຂ່ງຂັນຮັກຊາດ ແລະ ພັດທະນາຂອງອົງການແນວລາວສ້າງຊາດ; 7) ບັນດາແຂວງໃຫ້ຈັດກິດຈະກຳໃດໜຶ່ງ ທີ່ສະແດງເຖິງມູນເຊື້ອຂອງແນວລາວສ້າງຊາດ; 8) ຈັດຕັ້ງການແຂ່ງຂັນກິລາສິລະປະວັນນະຄະດີ, ຂັບລຳ, ແຕ່ງເພງ, ບົດກະວີ, ຍ່າງ ແລະ ຟ້ອນລຳວົງມະຫາສາມັກຄີ ໂດຍມີຊຸດນຸ່ງ 50 ເຜົ່າ, ເພດໄວ, ຊຸດນຸ່ງທຸກສາສະໜາ ຮ່ວມກັບສູນກາງອົງການພຸດທະສາສະໜາສຳພັນລາວ (ອພສ) ແຫ່ພະໄຕປີດົກ ແລະ ອື່ນໆ; 9) ກິດຈະກຳວາງສະ ແດງຮູບພາບການເຄື່ອນໄຫວ, ສ້າງສາລະຄະດີ 75 ປີ, ສ້າງສະປອດໂຄສະນາຜ່ານສື່, ຕິດປ້າຍໂຄສະ ນາຕາມສຳນັກງານ-ອົງການ, ຄົວເຮືອນຂອງຄະນະກຳມະການແນວລາວສ້າງຊາດທຸກໆທ່ານ, ອົງການພາຄີ ແລະ ທົ່ວປວງຊົນ. ປັດຈຸບັນ ໄດ້ແຕ່ງຕັ້ງຄະນະຮັບຜິດຊອບ ແລະ ໄດ້ແຕ່ງຕັ້ງ 3 ອະນຸກໍາມະການເພື່ອກະກຽມ ເປັນຕົ້ນອະນຸກຳມະການເນື້ອໃນ ແລະ ເສດຖະກິດ; ອະນຸກຳມະການໂຄສະນາ-ຂະບວນການ ແລະ ບຸກຄະລາກອນ-ຍ້ອງຍໍ; ອະນຸກຳມະການພິທີການ, ສະຖານທີ່, ປ້ອງກັນ ແລະ ຮັກສາສຸຂະພາບ.
ທ່ານ ນາງ ອິນລາວັນ ແກ້ວບຸນພັນ ຍັງໄດ້ຕາງໜ້າຄະນະປະຈໍາ ສນຊ ກໍຄືຕາງໜ້າກຳມະການແນວລາວສ້າງຊາດທຸກຂັ້ນທົ່ວປະເທດ ຂໍເຊີນຊວນທຸກພາກສ່ວນການຈັດຕັ້ງພັກ-ລັດ, ອົງການພາຄີ, ການຈັດຕັ້ງສັງຄົມ ແລະ ປະຊາຊົນລາວບັນດາເຜົ່າທັງພາຍໃນ ແລະ ພີ່ນ້ອງເຊື້ອສາຍລາວຢູ່ຕ່າງປະເທດ ປະກອບສ່ວນເຂົ້າໃນການກະກຽມສະເຫຼີມສະຫຼອງ 75 ປີ ວັນສ້າງຕັ້ງແນວລາວສ້າງຊາດ ຕິດພັນກັບ 3 ວັນປະຫວັດສາດ ແລະ ວັນສໍາຄັນອື່ນໆ ຂອງພັກຂອງຊາດ ຄືໄດ້ກ່າວມານັ້ນດ້ວຍການສ້າງຂະບວນການຜະລິດ, ສ້າງຄວາມເຂັ້ມແຂງ, ສ້າງຜົນງານ ແລະ ປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ-ປອດໄພ ເປັນຫູເປັນຕາຊ່ວຍເຈົ້າໜ້າທີ່ ແລະ ການອົງການປົກຄອງເຂດຕົນຢູ່ອາໄສ, ຮັກສາຄວາມສະອາດງາມຕາຕາມສະຖານທີ່ຕ່າງໆ ເພື່ອຂໍ່ານັບຮັບຕ້ອນວັນສໍາຄັນປະຫວັດສາດດັ່ງກ່າວໃນປີ 2025 ນີ້ ໃຫ້ມີເນື້ອໃນ ແລະ ບັນຍາກາດຟົດຟື້ນ.
(ຂ່າວ-ພາບ: ວັນເພັງ)
ຄໍາເຫັນ