ຫຼາຍພາກສ່ວນມອບເງິນຊ່ວຍເຫຼືອແກ້ໄຂຄວາມທຸກຍາກ ແລະ ຜົນກະທົບຈາກພາຍຸໝາກເຫັບ

ພາກສ່ວນທີ່ນຳເງິນມາມອບຊ່ວຍເຫຼືອແກ້ໄຂຄວາມທຸກຍາກຂອງປະຊາຊົນຢູ່ແຂວງຄຳມ່ວນ ເພື່ອສົມທົບທຶນສ້າງເຮືອນໃຫ້ປະຊາຊົນຢູ່ ບ້ານລະກາ ເມືອງນາກາຍ ແລະ ບ້ານຕະລົວ ເມືອງບົວລະພາ ປະກອບມີ:ກຸ່ມບໍລິສັດ ພົງຊັບທະວີ ຈຳກັດຜູ້ດຽວ ຈຳນວນ 2.8 ຕື້ກີບ, ກຸ່ມບໍລິສັດນິກສັນ ພັດທະນາແຮ່ທາດ ຈໍາກັດ, ກຸ່ມບໍລິສັດ PPST, ທະນາຄານ JDB ມະຫາຊົນ ແລະ ບໍລິສັດ ຄຳມ່ວນການລົງທຶນ ຈຳກັດຜູ້ດຽວ ພາກສ່ວນລະ 1 ຕື້ກີບ ລວມເປັນມູນຄ່າທັງໝົດ 6.8 ຕື້ກີບ ຕາງໜ້າຮັບໂດຍ ທ່ານ ໄຊຊະນະ ໂຄດພູທອນ ເລຂາພັກແຂວງຄໍາມ່ວນ. ພ້ອມນັ້ນ, ຍັງມີບໍລິສັດ ຈະເລີນຊັບ ຍິ່ງຈະເລີນ ມາຍນິ້ງ ຈຳກັດຜູ້ດຽວ ແລະ ບໍລິສັດ ເຈພີຊີ ມາຍນິ້ງ ຈຳກັດ ມອບເງິນ ບໍລິສັດລະ 1 ຕື້ກີບ ເພື່ອແກ້ໄຂຜົນກະທົບຈາກພາຍຸໝາກເຫັບ ຢູ່ນະຄອນຫຼວງວຽງຈັນ, ຕາງໜ້າຮັບໂດຍ ທ່ານ ສິລີລາດທົງສິນ ທອງເພັງ ປະທານຄະນະກຳມະການປົກຄອງນະຄອນຫຼວງວຽງຈັນ.

ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດ ໄດ້ສະແດງຄວາມຂອບໃຈ ແລະ ຊົມເຊີຍ ຕໍ່ພາກສ່ວນຕ່າງໆ ທີ່ໄດ້ມີຈິດໃຈໂອບເອື້ອອາລີ, ເອື້ອເຟື້ອເຜື່ອແຜ່, ເສຍສະລະ, ເປັນຫ່ວງເປັນໃຍ ນຳເອົາເງິນຈຳນວນດັ່ງກ່າວມາມອບໃຫ້ໃນຄັ້ງນີ້ຊຶ່ງເປັນການໃຫ້ກຳລັງໃຈຊຶ່ງກັນ ແລະ ກັນ ໃນເວລາທີ່ພົບກັບຄວາມຫຍຸ້ງຍາກຊຶ່ງການຊ່ວຍເຫຼືອດັ່ງກ່າວ ແມ່ນສອດຄ່ອງກັບຄວາມຮຽກຮ້ອງຕ້ອງການ ຂອງສະພາບ ການຕົວຈິງ, ປະກອບສ່ວນເຂົ້າໃນການແກ້ໄຂຄວາມທຸກຍາກ ແລະ ຟື້ນຟູຊີວິດການເປັນຢູ່ຂອງປະຊາຊົນ ຜູ້ທີ່ປະສົບໄພທໍາມະຊາດ ໃຫ້ກັບຄືນສູ່ສະພາບປົກກະຕິໂດຍໄວ. ພ້ອມກັນນັ້ນ, ກໍໄດ້ຢືນຢັນວ່າ ຈະນຳເອົາການຊ່ວຍເຫຼືອດັ່ງກ່າວ ໄປມອບໃຫ້ພາກສ່ວນກ່ຽວຂ້ອງນຳໃຊ້ ດ້ວຍຄວາມໂປ່ງໃສ ແລະ ເຖິງເປົ້າໝາຍ ຢ່າງແທ້ຈິງ.

ຂ່າວ-ພາບ: ກົມປະຊາສຳພັນ ຫສນຍ