 |
ການມອບເຄື່ອງຄັ້ງນີ້ປະກອບມີເງິນສົດ ແລະ ເຄື່ອງອຸປະໂພກ-ບໍລິໂພກ ລວມມູນຄ່າ 300 ລ້ານກີບ ເປັນການສະໜັບສະໜູນຈາກ ບໍລິສັດ ລາວຄາຍຢວນ ບໍ່ແຮ່ ຈຳກັດ ເພື່ອນຳໄປແຈກຢາຍໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມໃນຊ່ວງຕົ້ນເດືອນກໍລະກົດຜ່ານມາ.
ຈາກນັ້ນ ຄະນະໄດ້ລົງຕິດຕາມກວດກາຄວາມເສຍຫາຍຂອງຄອງຊົນລະປະທານ ບ້ານນາກາງ ທີ່ໄດ້ຮັບຄວາມເສຍຫາຍຈາກພາຍຸໄມ້ສັກ ເປັນໄລຍະປະມານ 85 ແມັດ ເພື່ອຊຸກຍູ້ໃຫ້ພາກສ່ວນກ່ຽວຂ້ອງເລັ່ງສໍາຫຼວດ, ຈັດສັນງົບປະມານ ແລະ ດຳເນີນການສ້ອມແປງໃຫ້ກັບຄືນສູ່ສະພາບປົກກະຕິໂດຍໄວ ເພື່ອຮອງຮັບການຜະລິດກະສິກຳຂອງປະຊາຊົນ.
ໂອກາດດຽວກັນ ຄະນະໄດ້ເດີນທາງໄປຢ້ຽມຢາມ ແລະ ຊຸກຍູ້ການດຳເນີນທຸລະກິດຂອງ ບໍລິສັດ ລ້ານຊ້າງ ຊີມັງ ຈຳກັດ ທີ່ຕັ້ງຢູ່ບ້ານຄູນເງິນໂດຍຕາງໜ້າບໍລິສັດໄດ້ລາຍງານສະພາບໂດຍລວມການດໍາເນີນທຸລະກິດໃນຜ່ານມາ ລວມເຖິງການຈ້າງງານ ພ້ອມທັງສະເໜີບັນຫາ ແລະ ຂໍ້ຫຍຸ້ງຍາກບາງດ້ານທີ່ຕິດພັນກັບການດໍາເນີນທຸລະກິດ ເພື່ອຂໍໃຫ້ການນຳແຂວງພິຈາລະນາຊ່ວຍແກ້ໄຂ.
ໂອກາດນີ້ ທ່ານ ໄຊຊະນະ ໂຄດພູທອນ ໄດ້ມີຄໍາເຫັນແລກປ່ຽນ ທັງຍິນດີຮັບເອົາການສະເໜີຂອງບໍລິສັດ ໄປຄົ້ນຄວ້າ ເພື່ອສ້າງສິ່ງອໍານວຍຄວາມສະດວກຮອບດ້ານແກ່ການດຳເນີນທຸລະກິດ, ພ້ອມທັງຊີ້ນຳໃຫ້ບໍລິສັດສືບຕໍ່ສົ່ງເສີມສີມືແຮງງານລາວໃຫ້ຫຼາຍຂຶ້ນ, ຍົກລະດັບທັກສະວິຊາຊີບໃຫ້ພະນັກງານລາວເພື່ອສ້າງກຳລັງແຮງງານທີ່ມີຄຸນນະພາບ. ພ້ອມກັນນັ້ນ ໃຫ້ສືບຕໍ່ປະກອບສ່ວນຮັບຜິດຊອບຕໍ່ສັງຄົມ ດ້ວຍການຊ່ວຍພັດທະນາຊຸມຊົນ, ສະໜັບສະໜູນໂຮງໝໍ, ສຸກສາລາ, ໂຮງຮຽນ ແລະ ວຽກງານສາທາລະນະປະໂຫຍດທີ່ຈຳເປັນ. ສິ່ງສໍາຄັນໃຫ້ເພີ່ມທະວີສົ່ງເສີມຖ່າຍທອດເຕັກນິກການຜະລິດ, ການປູກຝັງ ແລະ ການລ້ຽງສັດແບບທັນສະໄໝໃຫ້ແກ່ປະຊາຊົນ, ເພື່ອປະກອບສ່ວນຍົກລະດັບຄຸນນະພາບຊີວິດ, ຂັບເຄື່ອນການພັດທະນາເສດຖະກິດ-ສັງຄົມຂອງແຂວງຄຳມ່ວນໃຫ້ເຕີບໂຕຢ່າງໜັ້ນຄົງ ແລະ ຍືນຍົງ.
ຂ່າວ : ມະນີວັນ
ຄໍາເຫັນ