ກອງປະຊຸມຜັນຂະຫຍາຍເນື້ອໃນຈິດໃຈກອງປະຊຸມວຽກງານກວດກາທົ່ວປະເທດ ຄັ້ງທີ V ຢູ່ແຂວງຄໍາມ່ວນ ໃນວັນທີ 23 ກັນຍາ 2026, ທ່ານ ໄຊຊະນະ ໂຄດພູທອນ ໄດ້ມີຄໍາເຫັນໂອ້ລົມວ່າ: ຕະຫຼອດໄລຍະ 5 ປີຜ່ານມາ, ຄະນະພັກ, ອົງການປົກຄອງ ແລະ ຄະນະກວດກາແຕ່ລະຂັ້ນຂອງແຂວງ ໄດ້ເອົາໃຈໃສ່ນໍາພາ ແລະ ຈັດຕັ້ງວຽກງານກວດກາຕາມຂອບເຂດ ແລະ ພາລະບົດບາດຂອງຕົນ ປະກອບມີ ການຕິດຕາມ-ກວດກາພາຍໃນພັກ, ກວດກາການຄຸ້ມຄອງ-ບໍລິຫານລັດ, ການສະກັດກັ້ນ-ຕ້ານການສໍ້ລາດບັງຫຼວງ, ກວດກາຕາມຄໍາສັ່ງ ແລະ ກວດກາຕາມຜົນການກວດສອບ; ພ້ອມທັງສຸມໃສ່ການຕິດຕາມ-ກວດກາໂຄງການລົງທຶນຂອງລັດ, ກວດກາການຄຸ້ມຄອງຂອງບັນດາພະແນກການ ແລະ ລັດວິສາຫະກິດ, ຕິດຕາມການຈັດຕັ້ງຄໍາສັ່ງ ເລກທີ 15/ນຍ ກ່ຽວກັບການຂຸດຄົ້ນ-ເຄື່ອນຍ້າຍໄມ້ ແລະ ທຸລະກິດໄມ້, ສືບສວນ-ສອບສວນບຸກຄົນ ແລະ ເປົ້າໝາຍທີ່ມີພຶດຕິກໍາສໍ້ລາດບັງຫຼວງ ລວມເຖິງການຮັບ ແລະ ຄົ້ນຄວ້າຄໍາຮ້ອງ-ຄໍາສະເໜີຂອງສະມາຊິກພັກ, ພະນັກງານ ແລະ ພົນລະເມືອງ ຊຶ່ງຜ່ານການຕິດຕາມ-ກວດກາ ສາມາດເຫັນໄດ້ທັງດ້ານດີ, ຜົນສໍາເລັດ ແລະ ດ້ານອ່ອນ-ຂໍ້ຄົງຄ້າງໃນການນໍາພາຂອງຄະນະພັກ ແລະ ການຄຸ້ມຄອງຂອງອົງການປົກຄອງແຕ່ລະຂັ້ນ, ການກວດກາພົບການລະເມີດກົດໝາຍ-ລະບຽບການ ທີ່ກໍ່ໃຫ້ເກີດຄວາມເສຍຫາຍຕໍ່ວັດຖຸ ແລະ ຊັບສິນຂອງລັດ, ພ້ອມທັງມີການເກັບກູ້ຄືນບາງສ່ວນ, ມີການສືບສວນ-ສອບສວນພະນັກງານ ແລະ ບໍລິສັດບາງແຫ່ງທີ່ມີພຶດຕິກໍາສໍ້ລາດບັງຫຼວງ ແລະ ດໍາເນີນການສຶກສາອົບຮົມ, ລົງວິໄນທາງບໍລິຫານ ຫຼື ດໍາເນີນຄະດີຕາມກົດໝາຍ. ຜົນດັ່ງກ່າວ ໄດ້ປະກອບສ່ວນໃຫ້ການນໍາພາຂອງພັກ ແລະ ການຄຸ້ມຄອງລັດຂັ້ນຕ່າງໆສືບຕໍ່ມີສະຖຽນລະພາບ, ສັງຄົມມີຄວາມສະຫງົບ ແລະ ປະຊາຊົນມີສະຕິເຄົາລົບລະບຽບກົດໝາຍຫຼາຍຂຶ້ນ.
ທ່ານ ໄຊຊະນະ ໂຄດພູທອນ ໄດ້ເນັ້ນວ່າ ວຽກງານກວດກາຍັງມີດ້ານອ່ອນ ແລະ ຂໍ້ຄົງຄ້າງຈໍານວນໜຶ່ງ ມີທັງການສວຍໃຊ້ໜ້າທີ່ຕໍາແໜ່ງ, ການລະເມີດລະບຽບການ ແລະ ການສໍ້ລາດບັງຫຼວງ, ບາງບ່ອນການແກ້ໄຂຜົນການກວດກາຍັງຊັກຊ້າ ຫຼື ບໍ່ເດັດຂາດ, ການຄຸ້ມຄອງ-ຕິດຕາມໂຄງການລົງທຶນກໍ່ສ້າງບາງສ່ວນຍັງບໍ່ສອດຄ່ອງຕາມຂັ້ນຕອນ, ການແກ້ໄຂພະນັກງານທີ່ມີພຶດຕິກໍາອາດຍາສິດ ແລະ ສໍ້ລາດບັງຫຼວງຍັງບໍ່ທັນເຂັ້ມງວດ, ການເກັບກູ້ຄືນຊັບສິນ ແລະ ເງິນທີ່ກວດກາພົບຍັງເຮັດໄດ້ໜ້ອຍ. ນອກນັ້ນ ການແກ້ໄຂຄໍາຮ້ອງ-ຄໍາສະເໜີຂອງພົນລະເມືອງບາງກໍລະນີຍັງຊັກຊ້າ ແລະ ການປະສານງານລະຫວ່າງຂະແໜງການບາງສ່ວນຍັງບໍ່ກົມກຽວ.
ສໍາລັບໄລຍະຕໍ່ໜ້າ, ທ່ານ ໄຊຊະນະ ໂຄດພູທອນ ໄດ້ຮຽກຮ້ອງໃຫ້ທຸກຂັ້ນເພີ່ມທະວີວຽກງານຕິດຕາມ-ກວດກາ ແລະ ສະກັດກັ້ນ-ຕ້ານການສໍ້ລາດບັງຫຼວງ ໃຫ້ແຂງແຮງ, ທົ່ວເຖິງ ແລະ ແທດເຖິງຕົວຈິງ. ໃນນັ້ນ ເນັ້ນໃຫ້ຄົ້ນຄວ້າ-ເຊື່ອມຊຶມແນວທາງຂອງພັກ ແລະ ນະໂຍບາຍຂອງລັດກ່ຽວກັບວຽກງານກວດກາ, ຕິດຕາມການຜັນຂະຫຍາຍມະຕິ, ການກໍ່ສ້າງໜ່ວຍພັກປອດໃສ, ເຂັ້ມແຂງແລະ ໜັກແໜ້ນ, ແບບແຜນນໍາພາ-ວິທີເຮັດວຽກຂອງຄະນະພັກ ແລະ ຜູ້ນໍາຂັ້ນຕ່າງໆ. ພ້ອມກັນນີ້ ໃຫ້ເອົາໃຈໃສ່ຕິດຕາມ-ກວດກາການບໍລິຫານລັດ, ການປະຕິບັດມະຕິ, ຄໍາສັ່ງ, ກົດໝາຍ ແລະ ລະບຽບການ, ສືບຕໍ່ກວດກາໂຄງການລົງທຶນຂອງລັດແຕ່ຫົວທີ ແລະ ຕິດຕາມການແກ້ໄຂຜົນການກວດກາ, ເພີ່ມທະວີການສຶກສາອົບຮົມສະມາຊິກພັກ-ພະນັກງານ, ທະຫານ-ຕໍາຫຼວດ ແລະ ປະຊາຊົນ ໃຫ້ຮັບຮູ້ເຖິງໄພອັນຕະລາຍຂອງການສໍ້ລາດບັງຫຼວງ, ເອົາໃຈໃສ່ແກ້ໄຂຄໍາຮ້ອງ-ຄໍາສະເໜີຂອງສະມາຊິກພັກ, ພະນັກງານ ແລະ ພົນລະເມືອງຢ່າງຈິງຈັງ, ຖືກຕ້ອງຕາມພາລະບົດບາດ ແລະ ກົດໝາຍ, ສືບຕໍ່ພົວພັນຮ່ວມມື ແລະ ແລກປ່ຽນບົດຮຽນວຽກງານກວດກາກັບບັນດາແຂວງ, ປະເທດເພື່ອນມິດ ແລະ ປະເທດໃກ້ຄຽງ ເພື່ອຄົ້ນຄວ້າຖອດຖອນບົດຮຽນມາໝູນໃຊ້ໃຫ້ເໝາະສົມກັບຈຸດພິເສດ ແລະ ເງື່ອນໄຂຕົວຈິງຂອງແຂວງ, ເອົາໃຈໃສ່ປັບປຸງກົງຈັກ ແລະ ບໍາລຸງກໍ່ສ້າງພະນັກງານກວດກາໃນແຕ່ລະຂັ້ນ ລວມເຖິງຂັ້ນຕາແສງ, ໃຫ້ມີຄວາມຮູ້, ຄວາມສາມາດ ແລະ ປະສົບການພຽງພໍຕໍ່ໜ້າວຽກ, ພ້ອມທັງຝຶກອົບຮົມທັງດ້ານວຽກງານກວດກາ, ວິຊາສະເພາະ ແລະ ທິດສະດີການເມືອງ-ການປົກຄອງຢ່າງຕໍ່ເນື່ອງ, ຄະນະພັກ ແລະ ການນໍາແຕ່ລະຂັ້ນ ຕ້ອງເພີ່ມທະວີການນໍາພາ-ຊີ້ນໍາຢ່າງເລິກເຊິ່ງ ຕໍ່ວຽກງານຕິດຕາມ-ກວດກາ, ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ດ້ວຍການຕິດຕາມ-ກວດກາ ເປັນປົກກະຕິ ຕໍ່ການຈັດຕັ້ງ, ສະມາຊິກພັກ-ພະນັກງານ ຕາມຂັ້ນຄຸ້ມຄອງຂອງຕົນ, ສິ່ງສໍາຄັນ ບັນຫາເກີດຂຶ້ນຢູ່ບ່ອນໃດແມ່ນ ຄະນະພັກ ແລະ ການນໍາຢູ່ບ່ອນນັ້ນ ຕ້ອງເປັນເຈົ້າການແກ້ໄຂຢ່າງທັນການ ແລະ ຂາດຕົວ.
ຂ່າວ: ກອງຄໍາ
ຄໍາເຫັນ