 |
ໂອກາດນີ້ ທ່ານ ໄຊແກ້ວ ທະວີໃຈ ຫົວໜ້າພະແນກ ໂຍທາທິການ ແລະ ຂົນສົ່ງ ໄດ້ລາຍງານວ່າ: ໂຄງການກໍ່ສ້າງພັດທະນາແຄມນ້ຳຂອງ-ແຄມນ້ຳຄານ ເປັນການຈັດຕັ້ງປະຕິບັດ ໂຄງການຄຸ້ມຄອງໄພພິບັດທຳມະຊາດ ເຂດອາຊີຕາເວັນອອກສ່ຽງໃຕ້ ເພື່ອປ້ອງກັນຕາຝັ່ງເຈື່ອນ ເພາະໄລຍະຜ່ານມາເຂດແຄມນ້ຳຄານ ແລະ ແຄມນ້ຳຂອງ ໄດ້ຮັບຜົນກະທົບຈາກໄພພິບັດທຳມະຊາດຫຼາຍສົມຄວນ ແລະ ມີຄວາມສ່ຽງ ຕໍ່ການເຊາະເຈື່ອນໃນອະນາຄົດ ຈື່ງມີຄວາມຈຳເປັນຕ້ອງກໍ່ສ້າງລະບົບປ້ອງກັນຕາຝັ່ງເຈື່ອນ, ເຊິ່ງແຜນກິດຈະກຳໄລຍະທີ່ 1 ໄດ້ຮັບທຶນສະໜັບສະໜູນຈາກ ທະນາຄານໂລກ ໄດ້ດຳເນີນການກໍ່ສ້າງຕາຝັ່ງເຈື່ອນ ແລະ ສວນສາທາລະນະເຂດປາກນ້ຳຄານ ຫາເຂດຕີນພະທາດຈອມສີ ມີຄວາມຍາວ 1,103 ແມັດ ແລະ ການກໍ່ສ້າງຕາຝັ່ງເຈື່ອນເບື້ອບ້ານໂພນສະອາດ ຫາບ້ານພັນຫຼວງມີຄວາມຍາວປະມານ 900 ແມັດ, ມີການວາງທໍ່ລະບາຍນ້ຳ 12 ຈຸດ, ຮາງລະບາຍນ້ຳແບບຄອງ 3 ຈຸດ, ກໍ່ສ້າງຂັ້ນໄດທັງສອງຝັ່ງ 22 ຈຸດ ເລີ້ມກໍ່ສ້າງມາແຕ່ເດືອນພຶດສະພາ 2023 ມາຮອດເດືອນທັນວາ 2025 ໄດ້ສຳເລັດ 100%, ປັດຈຸບັນພວມສືບຕໍ່ໄລຍະທີ່ 2 ໂດຍຈະມີການສືບຕໍ່ກໍ່ສ້າງປ້ອງກັນຕາຝັ່ງເຈື່ອນ ເບື້ງບ້ານພັນຫຼວງ ແລະ ສຶກສາສຳຫຼວດ-ອອກແບບ ເຂດປ້ອງກັນຕາຝັ່ງເຈື່ອນຄວາມຍາວປະມານ 8 ກິໂລແມັດ ແຕ່ສົ້ນຂົວນ້ຳຄານແຫ່ງທີ່ 2 ເຂດບ້ານເມືອງງາ ຫາຂົວນ້ຳຄານແຫ່ງທີ່ 3 ເຂດບ້ານວັງເງິນ ແລະ ມີແຜນຈະສືບຕໍ່ດຳເນີີວຽກງານໃນໄລຍະທີ່ 3 ຕື່ມອີກ.
 |
ໂອກາດນີ້ ທ່ານ ທອງລູນ ສີສຸລິດ ພ້ອມຄະນ ໄດ້ທ່ຽວຊົມສວນສາທາລະນະທີ່ກໍ່ສ້າງສຳເລັດ, ພ້ອມທັງຮ່ວມ ປ່ອຍປາລົງສູ່ແມ່ນ້ຳຂອງ ຫຼາຍກວ່າ 10,000 ໂຕ ທີ່ບໍລິເວນທ່າເຮືອວັດຊຽງທອງ ນະຄອນ ຫຼວງພະບາງ ເຊິ່ງປະກອບມີປາປາກ, ປາໄນ, ປາອີນເດຍ ເພື່ອເປັນການອະນຸລັກ ແລະເພີ່ມພູນຄູນສ້າງຊັບພະຍາກອນສັດນ້ຳ ໃນແມ່ນ້ຳຂອງໃຫ້ມີຄວາມອຸດົມສົມບູນ ແລະ ຍືນຍົງຕະຫຼອດໄປ.
ນອກຈາກເຄື່ອນໄຫວເຮັດວຽກຢູ່ນະຄອນຫລວງພະບາງ ທ່ານ ທອງລຸນ ສີສຸລິດ ແລະຄະນະ ໄດ້ໄປຢ້ຽມຢາມ ແລະເຮັດວຽກຢູ່ເມືອງປາກອູ ຕື່ມອີກ.
ຂ່າວ: ອາພຸດເດດ ບຸບຜາ, ພາບ: ທະນູສີນ ອິດທິພົນ
ຄໍາເຫັນ