ເລັ່ງຈັດຕັ້ງຜັນຂະຫຍາຍທິດຊີ້ນຳຂອງລັດຖະບານ ໃນການກໍ່ສ້າງ ແລະ ສ້ອມແປງເສັ້ນທາງ

ກອງປະຊຸມ ໄດ້ພ້ອມກັນລົງເລິກຄົ້ນຄວ້າ ແລະ ປຶກສາຫາລື ຕໍ່ບັນດາທິດຊີ້ນຳ ຂອງລັດຖະບານ ໃນການກໍ່ສ້າງ ແລະ ປັບປຸງເສັ້ນທາງ ເພື່ອຈັດຕັ້ງຜັນຂະຫຍາຍສູ່ວຽກງານຕົວຈິງ ໃຫ້ເປັນແຜນການ-ແຜນງານ ແລະ ໂຄງການລະອຽດ ໃນແຕ່ດ້ານຢ່າງວ່ອງໄວ ບົນພື້ນຖານສອດຄ່ອງກັບທ່າແຮງ ແລະ ຄວາມສາມາດຕົວຈິງຂອງປະເທດເຮົາ ເພື່ອຕອບສະໜອງຄວາມຮຽກຮ້ອງຕ້ອງການ ທາງດ້ານໂຄງລ່າງພື້ນຖານ ໃຫ້ແກ່ການພັດທະນາເສດຖະກິດ-ສັງຄົມແຫ່ງຊາດ ກໍຄືການໄປມາ ແລະ ດຳລົງຊີວິດຂອງປະຊາຊົນ ມີຄວາມສະດວກ, ໄດ້ຮັບການປັບປຸງ ແລະ ຍົກລະດັບດີຂຶ້ນເປັນກ້າວໆຕາມຄຳເຫັນຊີ້ນຳຂອງທ່ານນາຍົກລັດຖະມົນຕີ ຈຳນວນ 8 ຂໍ້ ກໍຄືແຈ້ງການຂອງຫ້ອງວ່າການສໍານັກງານນາຍົກລັດຖະ ມົນຕີ ສະບັບເລກທີ 1514/ຫສນຍ, ລົງວັນທີ 28 ຕຸລາ 2026 ໃຫ້ປະກົດຜົນເປັນຈິງ.

ຜ່ານການປຶກສາຫາລື, ສອງຝ່າຍເຫັນດີ ສ້າງກົນໄກການປະສານງານເຊິ່ງກັນ ແລະ ກັນ ໃຫ້ມີຄວາມໂລ່ງລ່ຽນ, ວ່ອງໄວ ແລະ ທັນການກວ່າເກົ່າ; ໃຫ້ມີການຈັດກອງປະຊຸມປຶກສາຫາລືຮ່ວມກັນ ປະຈຳ 3 ເດືອນ, 6 ເດືອນ ຢ່າງເປັນປົກກະຕິ ເພື່ອທົບທວນຄືນການຈັດຕັ້ງປະຕິບັດວຽກງານ ໂດຍມອບໃຫ້ບັນດາກົມທີ່ກ່ຽວຂ້ອງ ພົວພັນ-ປະສານງານໃນການຕິດຕາມ, ກວດກາ, ຊຸກຍູ້ ແລະ ລາຍງານ ຜົນການຈັດຕັ້ງຜັນຂະຫຍາຍທິດຊີ້ນຳຂອງລັດຖະບານຢ່າງເປັນປົກກະຕິເພື່ອຮ່ວມກັນຄົ້ນຄວ້າວາງທິດທາງແຜນການ ໃຫ້ສອດຄ່ອງ, ມີປະສິດທິພາບ, ປະສິດທິຜົນ ແລະ ເປັນເອກະພາບສູງໃນການຈັດຕັ້ງປະຕິບັດ ແລະ ລາຍງານລັດຖະບານ ໃນແຕ່ລະໄລຍະ. (ຂ່າວ-ພາບ: ກົມປະຊາສຳພັນ ຫສນຍ)