ເລັ່ງດັດແກ້ໃບຕາດິນທີ່ໄດ້ຮັບຜົນກະທົບຈາກໂຄງການທາງລົດໄຟລາວ - ຈີນ ໃຫ້ສໍາເລັດໃນເດືອນສິງຫານີ້

ນະຄອນຫຼວງວຽງຈັນ ໄດ້ຊີ້ແຈງຕໍ່ຂໍ້ຊັກຖາມຂອງສະມາຊິກສະພາປະຊາຊົນ ນະຄອນຫຼວງວຽງຈັນກ່ຽວການດັດແກ້ໃບຕາດິນຂອງໂຄງການທາງລົດໄຟ ລາວ-ຈີນ ມີຄວາມຊັກຊ້າ ວ່າ: ໂຄງການທາງລົດໄຟ ລາວ-ຈີນ ໄດ້ແບ່ງອອກເປັນ 2 ໄລຍະ ມີຄວາມຍາວທັງໝົດ 57.2 ກິໂລແມັດ ຜ່ານ 5 ເມືອງ 49 ບ້ານ ແລະ ມີຕອນດິນທີ່ຖືກໂຄງການທັງໝົດ 1,732 ຕອນ, ໃນນີ້ ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມໄດ້ຮັບໃບຕາດິນທີ່ຖືກໂຄງການມາດັດແກ້ທັງໝົດ 16 ຄັ້ງເປັນຕອນດິນ 1,216 ຕອນ, ດັດແກ້ໄປແລ້ວ 1,200 ຕອນ, ຍັງຄ້າງ 16 ຕອນ. ສາເຫດທີ່ພາໃຫ້ຍັງຄ້າງ 7 ຕອນຍັງບໍ່ທັນໄດ້ຈົດເລີກຖອນຈົດຈໍານອງຄໍ້າປະກັນນໍາທະນາຄານ, ອີກຈໍານວນ 4 ຕອນ ແມ່ນດັດແກ້ໄປແລ້ວຢູ່ໃນຖານຂໍ້ມູນແຕ່ຊອກສໍານວນ ແລະ ໃບຕາດິນບໍ່ເຫັນ ສ່ວນອີກ 5 ຕອນ ແມ່ນຍັງຄາທາງດ້ານເຕັກນິກການວັດແທກ ຊຶ່ງຈໍານວນຍັງຄ້າງທັງໝົດ 16 ຕອນ