ເລີ່ມກໍ່ສ້າງທາງເຂົ້າວັດປ່າພິລາວົງບຸດກັດສະກາຣາມບ້ານຈຳປາ ແລະ ບ້ານປັກແຮດ

ພິທີວາງສີລາລືກໂຄງການກໍ່ສ້າງທາງເຂົ້າວັດປ່າສ້າງມັກຄາສູ່ສະຫວັນຕາມຮອຍປະນິທານອົງພະຍອດແກ້ວມະຫາງອນ ດຳລົງບຸນ ທີ່ວັດປ່າພິລາວົງບຸດກັດສະກາຣາມບ້ານຈຳປາ ເມືອງສີໂຄດຕະບອງ ແລະ ບ້ານປັກແຮດ ເມືອງນາຊາຍທອງ ນະຄອນຫຼວງວຽງຈັນ ໄດ້ຈັດຂຶ້ນໃນວັນທີ 12 ພຶດສະພາຜ່ານມາ ມີພະເຖລານຸເຖລະ ພະອາຈານໃຫຍ່ມະຫາບຸນມາ ສິມມາພົມ ປະທານອົງການພຸດທະສາສະໜາສຳພັນລາວ, ທ່ານນາງ ອິນລາວັນ ແກ້ວບຸນພັນ ຮອງປະທານສູນກາງແນວລາວສ້າງຊາດ,ທ່ານນາງ ນາລີ ສີສຸລິດ ພັນລະຍາປະທານປະເທດ ພ້ອມດ້ວຍບັນດາການນໍາພັກ-ລັດ, ຄອບຄົວການນໍາ, ອະດີດການນໍາ, ເຈົ້າພາບເຈົ້າສັດທາ, ນັກທຸລະກິດ ແລະ ອອກຕົນຍາດໂຍມເຂົ້າຮ່ວມ.
    ພະອາຈານ ດໍາລົງ ພິມມະຈັກ ເຈົ້າອະທິການວັດປ່າພິລາວົງບຸດກັດສະກາຣາມ ໄດ້ລາຍງານໂຄງການສ້າງວັດ ແລະ ສ້າງທາງເບຕົງວ່າ:ວັດປ່າພິລາວົງບຸດກັດສະກາຣາມໄດ້ສ້າງຂຶ້ນດ້ວຍແຮງເຫຼື້ອມໃສສັດທາຂອງຜູ້ມີບຸນຕັ້ງແຕ່ປີ 2017 ເປັນຕົ້ນທ່ານ ສີພາ ແລະ ນາງ ອິນຊ້ອຍ ພິລາວົງ, ທ່ານ ສົມສະຫງວນ ແລະ ນາງ ສົມພັນ ພິລາວົງ ໄດ້ມອບດິນຂອງຕົນ 10,65 ເຮັກຕາໃຫ້ພະອາຈານໃຫຍ່ອົງພະຍອດແກ້ວມະຫາງອນ ດຳລົງບຸນ ສ້າງເປັນສັງຄາຮາມໃນພະພຸດທະສາສະໜາ, ປີ 2019 ທ່ານ ກຽດຕິສັກ ບຸດກັດສະກາ ໄດ້ມອບດິນຂອງຕົນ 8 ເຮັດຕາ ແລະ ປີ 2022 ຄະນະພັກອົງການປົກຄອງນະຄອນຫຼວງວຽງຈັນມອບດິນດ່ານຈຳປາ 5 ເຮັກຕາໃຫ້ຕື່ມອີກ ໂດຍການສ້າງສາພັດທະນາວັດໄດ້ເຮັດຕາມລໍາດັບມາເລື້ອຍໆ ຕັ້ງແຕ່ພະອາຈານ ປາໂມດ ປະໂມທິໂຕ ເປັນຕົ້ນມາ, ປີ 2022 ພະອາຈານ ດຳລົງ ພິມມະຈັກ ໄດ້ຍ້າຍຈາກວັດທາດຫຼວງເໜືອເຂົ້າມາຢູ່ວັດແຫ່ງນີ້ໄດ້ນໍາພາອອກຕົນຍາດໂຍມພັດທະນາວັດເລື້ອຍໆຈົນຮອດທຸກວັນນີ້ ຊຶ່ງການສ້າງສາພັດທະນາວັດປ່າແຫ່ງນີ້ມີຫຼາຍຢ່າງໃນນັ້ນວຽກບຸລິມະສິດສຳຄັນອັນດັບໜຶ່ງຄືສ້າງຫົນທາງເຂົ້າມາວັດ ໂດຍໄລຍະເຂົ້າມາແຕ່ຖະໜົນເບຕົງໜອງແຕ່ງ-ຕາດມູນບ້ານໃໝ່ເຂົ້າມາເຖິງໜ້າວັດມີຄວາມຍາວ 1.250 ແມັດ ແລະ ຫົນທາງຕັດຜ່ານກາງວັດ 850 ແມັດ ລວມເປັນໄລຍະທາງຍາວ 2.100 ແມັດ ເປັນທາງດິນແດງໃນຍາມຝົນຫົນທາງມີຄວາມລຳບາກຫຼາຍທັງປະຊາຊົນຊາວບ້ານ ອອກຕົນຍາດໂຍມ ແລະ ພະສົງທຽວໄປມາກໍລຳບາກຍ້ອນທາງເປັນຂຸມ ແລະ ຍາມແລ້ງມີຂີ້ຝຸ່ນ. ດັ່ງນັ້ນ, ຈຶ່ງເຫັນວ່າຄວນສ້າງເປັນທາງເບຕົງ ໂດຍວັດປ່າໄດ້ປຶກສາຫາລືກັບອຳນາດການປົກຄອງບ້ານ ເຖົ້າແກ່ແນວໂຮມບ້ານຈຳປາ, ບ້ານປັກແຮດ ເຫັນດີເຫັນພ້ອມກັນ ຈຶ່ງໄດ້ເລີ່ມລົງມືກໍ່ສ້າງຫົນທາງເປັນທາງເບຕົງມີຄວາມຍາວທັງໝົດ 2.100 ແມັດ, ກວ້າງ 8 ແມັດ, ຄວາມໜາ 20 ຊັງຕີແມັດມູນຄ່າ 5 ຕື້ກວ່າກີບ.ສຳລັບເສັ້ນທາງຜ່ານບ້ານສ່ວນໃນເຂດວັດມີຄວາມໜາ 15 ຊັງຕີແມັດ ການສ້າງທາງເບຕົງເບື້ອງຕົ້ນສ້າງໄປແລ້ວ 250 ແມັດ ມູນຄ່າ 900 ລ້ານກີບ ສ່ວນທີ່ເຫຼືອນັ້ນແມ່ນສືບຕໍ່ສ້າງເຖິງຄ້ອຍໜ້າວັດ ແລະ ຫ້ວຍຈຳປາໃຫ້ສຳເລັດກ່ອນເຂົ້າພັນສາປີ 2024 ຈາກນັ້ນກໍສືບຕໍ່ສ້າງແຕ່ຫ້ວຍຈໍາປາຫາທາງເບຕົງໜອງແຕ່ງ-ຕາດມູນ.
    ໃນພິທີຜູ້ເຂົ້າຮ່ວມໄດ້ມອບເງິນສົມທົບທຶນກໍ່ສ້າງເສັ້ນທາງດັ່ງກ່າວເປັນຈຳນວນຫຼວງຫຼາຍ ຮັບໂດຍພະອານໃຫຍ່ມະຫາບຸນມາ ສິມມາພົມ.
ຂ່າວ-ພາບ: ສົມສະຫວັນ