 |
ທ່ານ ຫລິວຟູກວາງ ໄດ້ລາຍງານຫຍໍ້ປະຫວັດຄວາມເປັນມາ, ແຜນການກໍ່ສ້າງ, ແຜນພັດທະນາໂຄງການວັງວຽງເຊັນໂທຣພລາຊາ ໃຫ້ຮູ້ວ່າ: ໂຄງການນີ້ ມີມູນຄ່າການລົງທຶນທັງໝົດ 216 ລ້ານໂດລາ, ມີເນື້ອທີ່ກໍ່ສ້າງລວມ 210,000 ຕາແມັດ ແລະ ໄດ້ຮັບການອະນຸມັດຈາກລັດຖະບານລາວ ໃຫ້ເປັນໂຄງການລະດັບຊາດຢ່າງເປັນທາງການ. ບໍລິສັດຈະສ້າງສູນລວມການຄ້າທີ່ຄົບວົງຈອນແຫ່ງທໍາອິດ ຂອງເມືອງວັງວຽງ ທີ່ຮວບຮວມເອົາທັງການທ່ອງທ່ຽວ, ອາຫານການກິນ, ວັດທະນະທຳ, ການເປີດປະສົບການໃໝ່ ແລະ ການພັກຜ່ອນເຂົ້າໄວ້ນໍາກັນ ພາຍໃຕ້ແນວຄິດ “ເມືອງວັງວຽງທີ່ບໍ່ມີວັນຫຼັບໄຫຼ” ຊຶ່ງໃນຕອນກາງເວັນ ຈະເປັນສະຖານທີ່ທ່ອງທ່ຽວອັນສວຍງາມ ແລະ ໃນຕອນກາງຄືນ ຈະເປັນດັ່ງສະຫວັນແຫ່ງການພັກຜ່ອນ. ພາຍຫຼັງທີ່ໂຄງການນີ້ໄດ້ຮັບການກໍ່ສ້າງສໍາເລັດ, ຈະສາມາດສ້າງວຽກເຮັດງານທຳໃຫ້ແກ່ປະຊາຊົນທ້ອງຖິ່ນໄດ້ເຖິງ 4,000 ຫາ 5,000 ຕຳແໜ່ງ, ຊ່ວຍຍົກລະດັບລາຍຮັບ ແລະ ຊີວິດການເປັນຢູ່ຂອງປະຊາຊົນໃຫ້ຮັ່ງມີຜາສຸກ; ໃນຂະນະດຽວກັນ, ກໍຈະຊ່ວຍ ປັບປຸງພື້ນຖານໂຄງລ່າງຂອງຕົວເມືອງໃຫ້ສົມບູນແບບ, ກະຕຸ້ນຂະແໜງການທ່ອງທ່ຽວໃຫ້ມີຄວາມຄຶກຄື້ນ ແລະ ດຶງດູດນັກທ່ຽວ ເຂົ້າມານັບມື້ນັບຫຼາຍຂຶ້ນ; ທັງເປັນການສ້າງລາຍຮັບດ້ານພາສີ-ອາກອນ ໃຫ້ແກ່ລັດຖະບານຢ່າງຕໍ່ເນື່ອງ, ເພື່ອເປັນແຮງຂັບເຄື່ອນ ໃຫ້ເສດຖະກິດຂອງເມືອງວັງວຽງ ຂະຫຍາຍຕົວຢ່າງມີຄຸນນະພາບສູງ.
ທ່ານຍັງກ່າວສະແດງຄວາມຂອບໃຈ ມາຍັງລັດຖະບານ ສປປ ລາວ, ບັນດາທ່ານການນໍາ ແລະ ຄູ່ຮ່ວມມືທຸກພາກສ່ວນ ທີ່ໄດ້ໃຫ້ການສະໜັບສະໜູນຕະຫຼອດມາ. ບໍລິສັດຈະບໍ່ເຮັດໃຫ້ຄວາມໄວ້ເນື້ອເຊື່ອໃຈຂອງບັນດາທ່ານຜິດຫວັງ, ຈະສຸມໃສ່ການກໍ່ສ້າງ ໃຫ້ສໍາເລັດຕາມກຳນົດເວລາ ແລະ ມີຄຸນນະພາບສູງສຸດ ເພື່ອປະກອບສ່ວນເຂົ້າໃນການຍົກລະດັບຕົວເມືອງວັງວຽງ ແລະ ຄວາມວັດທະນາຖາວອນ ຂອງເສດຖະກິດລາວ.
ທ່ານ ພູວົງ ບຸນຊູ ໄດ້ກ່າວວ່າ: ໂຄງການດັ່ງກ່າວ ເປັນໂຄງການທີ່ສໍາຄັນ ຈະຊ່ວຍປະກອບສ່ວນໃນ ການພັດທະນາເສດຖະກິດ-ສັງຄົມ ຂອງແຂວງ ກໍຄື ຂອງເມືອງວັງວຽງ, ໂດຍສະເພາະ ຈະກາຍເປັນສູນກາງ ທາງດ້ານຄ້າ, ການລົງທຶນ, ການທ່ອງທ່ຽວ ແລະ ສິ່ງອໍານວຍຄວາມສະດວກດ້ານຕ່າງໆ, ພ້ອມທັງເປັນການສ້າງວຽກເຮັດງານທໍາ ແລະ ສ້າງລາຍຮັບ ໃຫ້ແກ່ປະຊາຊົນທ້ອງຖິ່ນ, ແຂວງ ແລະ ລັດຖະບານ ແລະ ເຊື່ອໝັ້ນວ່າ ດ້ວຍສັກກະຍະພາບ, ຄວາມຊ່ຽວຊານ, ຄວາມຊຳນານງານ ແລະ ປະສົບການຂອງ ບໍລິສັດ, ໂຄງການດັ່ງກ່າວ ຈະໄດ້ຮັບການຈັດຕັ້ງປະຕິບັດກໍ່ສ້າງໄປຕາມແຜນການ, ແບບ ແລະ ກອບເວລາທີ່ ໄດ້ກຳນົດໄວ້. ຮຽກຮ້ອງໃຫ້ພາກສ່ວນທີ່ກ່ຽວຂ້ອງ ຈົ່ງຊ່ວຍກັນຕິດຕາມ, ກວດກາ, ຊຸກຍູ້ ແລະ ໃຫ້ການຊ່ວຍເຫຼືອແກ່ໂຄງການດັ່ງກ່າວ ຕາມພາລະບົດບາດ ແລະ ຄວາມຮັບຜິດຊອບຂອງໃຜລາວ.
ໃນໂອກາດນີ້, ບັນດາການນຳທີ່ເຂົ້າຮ່ວມຍັງໄດ້ມີການປູກຕົ້ນໄມ້ ຢູ່ທີ່ສະຖານທີ່ດັ່ງກ່າວ ເພື່ອເປັນການສະເຫຼີມສະຫຼອງວັນປູກຕົ້ນໄມ້ແຫ່ງຊາດ 1 ມິຖຸນາ 2026 ຕື່ມອີກ.
ຂ່າວ: ແຂວງວຽງຈັນ
ຄໍາເຫັນ