ເລີ່ມປັບປຸງ ແລະ ສ້ອມແປງເສັ້ນທາງເລກ 13 ເໜືອໄລຍະແຕ່ສີໄຄຫາສີເກີດ

ພິທີລົງນາມສັນຍາໂຄງການປັບປຸງ ແລະ ສ້ອມແປງເສັ້ນທາງເລກ 13 ເໜືອ ໄລຍະສາມແຍກໄຟແດງສີໄຄເມືອງສີໂຄດຕະບອງ-ສີ່ແຍກໄຟແດງສີເກີດເມືອງນາຊາຍທອງ ນະຄອນຫຼວງວຽງຈັນໄດ້ຈັດຂຶ້ນເມື່ອບໍ່ດົນມານີ້ທີ່ໂຮງແຮມລາວພລາຊາ ນະຄອນຫຼວງວຽງຈັນ ຮ່ວມລົງນາມຄັ້ງນີ້ລະຫວ່າງທ່ານ ລັດສະໝີ ອະລິຍະວົງສິງ ຫົວໜ້າໂຄງການປັບປຸງ ແລະ ສ້ອມແປງທາງເລກ 13 ເໜືອ ໄລຍະນະຄອນຫຼວງວຽງຈັນຫາໂພນໂຮງ ແຂວງວຽງຈັນ ແລະ ທ່ານ ຮົວ ແສງອາລຸນ ປະທານກຸ່ມບໍລິສັດ ຕັງຈະເລີນ ຈໍາກັດຜູ້ດຽວ ແລະ ລົງນາມເປັນພະຍານໂດຍທ່ານ ລິດຕາ ຂັດທິຍະ ຫົວໜ້າກົມຂົວ-ທາງ ກະຊວງໂຍທາທິການ ແລະ ຂົນສົ່ງ (ຍທຂ) ແລະ ທ່ານ ຄໍາໄຕ ແກ້ວດວງດີ ຮອງປະທານກຸ່ມບໍລິສັດ ຕັງຈະເລີນ ຈໍາກັດຜູ້ດຽວ ໂດຍມີທ່ານ ງາມປະສົງ ເມືອງມະນີ ລັດຖະມົນຕີກະຊວງ ຍທຂ ພ້ອມດ້ວຍຫົວໜ້າຫ້ອງການ,ກົມ, ພະແນກການ, ເຈົ້າເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
    ທ່ານ ລັດສະໝີ ອະລິຍະວົງສິງ ກ່າວວ່າ: ໂຄງການປັບປຸງ ແລະ ສ້ອມແປງເສັ້ນທາງເລກ 13 ເໜືອ ໄລຍະສີໄຄຫາສີເກີດ ມີລວງຍາວ 6 ກິໂລແມັດ ເປັນໂຄງການສືບຕໍ່ຈາກໄລຍະທາງສີເກີດຫາໂພນໂຮງ (ລວງຍາວ 58 ກິໂລແມັດ) ທີ່ສຳເລັດການກໍ່ສ້າງກາງປີ 2023 ໂດຍໄດ້ຮັບເງິນກູ້ດອກເບ້ຍຕໍ່າຈາກທະນາຄານໂລກ (WB),ທະນາຄານການລົງທຶນໂຄງລ່າງພື້ນຖານອາຊີ (AIB) ກອງທຶນຂອງກຸ່ມປະເທດນໍດິກ ເພື່ອການພັດທະນາ (NDF) ແລະ ທຶນສົມທົບຂອງລັດຖະບານລາວ ຜູ້ໃຫ້ທຶນໄດ້ອະນຸມັດສືບຕໍ່ສັນຍາກູ້ຢືມອອກໄປອີກ 22 ເດືອນຈາກວັນທີ 31 ພຶດສະພາ 2023 ທີ່ເປັນວັນໝົດອາຍຸເບື້ອງຕົ້ນຮອດວັນທີ 31 ມີນາ 2025. ເພື່ອກວມເອົາວຽກປັບປຸງ ແລະ ສ້ອມແປງເສັ້ນທາງເລກ 13 ເໜືອໄລຍະສີໄຄຫາສີເກີດໃຫ້ໄດ້ຮັບການກໍ່ສ້າງສໍາເລັດທັງໝົດໃນຕົ້ນປີ 2025, ການກໍ່ສ້າງທາງໄລຍະສີໄຄຫາສີເກີດຈະໃຊ້ເວລາ 18 ເດືອນ ແລະ ໄລຍະສ້ອມແປງບຳລຸງຮັກສາ 36 ເດືອນ ລວມໄລຍະສັນຍາ 54 ເດືອນ ຊຶ່ງເປັນສັນຍາແບບມອບເໝົາ (OPBRC) ຈ່າຍຕາມຜົນສໍາເລັດຂອງຕອນທາງຍ່ອຍທີ່ເຮັດແລ້ວໄດ້ຕາມແຜນການທີ່ອະນຸມັດ ແລະ ຕາມມາດຕະຖານເຕັນນິກທີ່ກຳນົດໄວ້ ສັນຍາມອບເໝົາດັ່ງກ່າວເປັນເອກະສານປະມູນມາດຕະຖານຂອງຜູ້ໃຫ້ທຶນທີ່ອະນຸມັດໃຫ້ນໍາໃຊ້ໃນໂຄງການນີ້. ການແກ້ໄຂສິ່ງກີດຂວາງຕາມແລວທາງສອງຂ້າງ ແລະ ຄ່າຊົດເຊີຍໃຫ້ຜູ້ໄດ້ຮັບຜົນກະທົບໄດ້ດຳເນີນແຕ່ເດືອນມີນາ 2023 ເປັນຕົ້ນມາ; ໂດຍມີຜູ້ໄດ້ຮັບຜົນກະທົບ 588 ຄອບຄົວ, ປັດຈຸບັນຈ່າຍຊົດເຊີຍແລ້ວ 392 ຄອບຄົວ ຄາດວ່າອີກ 2 ອາທິດຂ້າງໜ້າຈະຈ່າຍອີກ 532 ຄອບຄົວ ແລະ ຈະສືບຕໍ່ຈ່າຍຄ່າຊົດເຊີຍໃຫ້ສຳເລັດທັງໝົດ ກ່ອນມອບສະໜາມກໍ່ສ້າງໃຫ້ຜູ້ຮັບເໝົາໃນເດືອນຕຸລາ 2023. 
    ການປັບປຸງເສັ້ນທາງ 6 ກິໂລແມັດນີ້ ເປັນການຂະຫຍາຍໜ້າທາງຕາມແລວທາງເກົ່າໃຫ້ກວ້າງອອກ ຈາກໜ້າທາງເກົ່າ 7-8 ແມັດ ປູຢາງສອງຊັ້ນມີ 2 ຊ່ອງຈະລາຈອນໄປ-ກັບ ມາເປັນໜ້າທາງກວ້າງ 20-23 ແມັດ, ປູດ້ວຍເບຕົງຊີມັງເສີມເຫຼັກມີ 4 ຊ່ອງຈະລາຈອນໄປ-ກັບ, ມີດອນກາງທາງ, ໄຟເຍືອງທາງ, ປ້າຍຈະລາຈອນ, ຂີດເສັ້ນໜ້າທາງ, ລະບົບໄຟອຳນາດຂອງທາງແຍກ, ລະບົບໄຟທາງຄົນຍ່າງຂ້າມທາງ, ທາງມ້າລາຍ, ລະບົບການລະບາຍນໍ້າອອກຈາກແລວທາງ ແລະ ທາງຍ່າງທັງສອງເບື້ອງ. ສໍາລັບການປະມູນແມ່ນໄດ້ແຂ່ງຂັນເປີດກວ້າງແບບສາກົນຕາມລະບຽບການຂອງຜູ້ໃຫ້ທຶນ ໂດຍມີບໍລິສັດສົນໃຈເຂົ້າຮ່ວມຊື້ຊອງປະມູນ 42 ບໍລິສັດ (ລາວ 21 ບໍລິສັດ; ຈີນ 18 ບໍລິສັດ; ຫວຽດນາມ 1 ບໍລິສັດ; ໄທ 1 ບໍລິສັດ; ຍີ່ປຸ່ນ 1 ບໍລິສັດ) ຮອດເວລາຍື່ນຊອງປະມູນມີ 15 ບໍລິສັດມາຍື່ນຊອງປະມູນ (ລາວ 10 ບໍລິສັດ; ຈີນ 5 ບໍລິສັດ) ໂດຍຜົນການຄັດເລືອກຜູ້ຮັບເໝົາໄດ້ສຳເລັດ ແລະ ໄດ້ຮັບອະນຸມັດຈາກຜູ້ໃຫ້ທຶນວັນທີ 21 ກໍລະກົດ 2023 ແລະ ຈາກກະຊວງ ຍທຂ ວັນທີ 8 ສິງຫາ 2023 ໂດຍຮັບຮອງເອົາກຸ່ມບໍລິສັດ ຕັງຈະເລີນ ຈຳກັດຜູ້ດຽວ, ເປັນຜູ້ຊະນະການປະມູນ ແລະ ເປັນຜູ້ຮັບເໝົາປັບປຸງ ແລະ ສ້ອມແປງໂຄງການ ລວມມູນຄ່າສັນຍາ 10.294.408,44 ໂດລາ.
    ທ່ານ ຮົວ ແສງອາລຸນ ກ່າວວ່າ: ກຸ່ມບໍລິສັດພວກເຮົາມີຄວາມພ້ອມຫຼາຍດ້ານເຊັ່ນ: ດ້ານອຸປະກອນກົນຈັກພະນັກງານວິຊາການ ແລະ ມີປະສົບການຫຼາຍກວ່າ 20 ປີ; ໃນການກໍ່ສ້າງຂົວ-ທາງ ແລະ ລະບົບລະບາຍນ້ຳໃນຕົວເມືອງຫຼາຍໂຄງການ ເປັນຕົ້ນຢູ່ແຂວງຈຳປາສັກ ແລະ ນະຄອນຫຼວງວຽງຈັນ; ສໍາລັບໂຄງການກໍ່ສ້າງທາງສີໄຄຫາສີເກີດ ເປັນໂຄງການໜຶ່ງທີ່ມີຄວາມສຳຄັນໃນການຂັບເຄື່ອນການພັດທະນາພື້ນຖານໂຄງລ່າງເສດຖະກິດ-ສັງຄົມຂອງນະຄອນຫຼວງວຽງຈັນ ເປັນເສັ້ນທາງທີ່ມີການສັນຈອນໜາແໜ້ນ. ປັດຈຸບັນເສັ້ນທາງດັ່ງກ່າວເປ່ເພ ແລະ ຊຸດໂຊມຫຼາຍ ພັກ-ລັດກໍຄືກະຊວງ ຍທຂ ອົງການປົກຄອງນະຄອນຫຼວງວຽງຈັນເຫັນໄດ້ຄວາມສຳຄັນ ແລະ ຫາວິທີແກ້ໄຂ ຈຶ່ງໄດ້ຈັດສັນແຫຼ່ງທຶນສະເພາະ ເຮັດໃຫ້ເສັ້ນທາງດັ່ງກ່າວໄດ້ຮັບການປະມູນແບບເປີດກວ້າງ ແລະ ໄດ້ມີພິທີລົງນາມສັນຍາກໍ່ສ້າງເປັນທາງການ ພວກເຮົາຂໍໃຫ້ສັນຍາວ່າຈະປະຕິບັດໂຄງການນີ້ຢ່າງຕັ້ງໜ້າເຮັດຕາມແບບແຜນ ແລະ ສັນຍາທີ່ລົງນາມກັນ ເພື່ອໃຫ້ໂຄງນີ້ສໍາເລັດຕາມກຳນົດເວລາ ແລະ ຕາມມາດຕະຖານເຕັກນິກໃນສັນຍາທຸກປະການ.
ຂ່າວ: ໜັງສືພິມວຽງຈັນໃໝ່