ລມຕ ກະຊວງການຕ່າງປະເທດ ສຳເລັດການຢ້ຽມຢາມ ສະຫະພັນຣັດເຊຍ ຢ່າງເປັນທາງການ

ໃນວັນທີ 26 ມິຖຸນາ 2025 ທີ່ເຮືອນຮັບຮອງຂອງ ກະຊວງການຕ່າງປະເທດ ແຫ່ງ ສະຫະພັນ ຣັດເຊຍ, ພະນະທ່ານ ທອງສະຫວັນ ພົມວິຫານລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ພົບປະສອງຝ່າຍກັບ ພະນະທ່ານ ເຊີຣເກ ລາວະຣົບລັດຖະມົນຕີກະຊວງການຕ່າງປະເທດ ແຫ່ງ ສ ຣັດເຊຍຊຶ່ງເປັນການຢ້ຽມຢາມ ສ ຣັດເຊຍ ຄັ້ງທໍາອິດ ພາຍຫຼັງ ທີ່ ພະນະທ່ານ ທອງສະຫວັນ ພົມວິຫານ ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນ ລັດຖະມົນຕີຕ່າງປະເທດ. ການພົບປະຄັ້ງນີ້ ຖືວ່າ ເປັນນິມິດໝາຍອັນດີ ໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມ ລະຫວ່າງ ລາວ ແລະ ຣັດເຊຍ ໃຫ້ສືບຕໍ່ແໜ້ນແຟ້ນຍິ່ງຂຶ້ນ ບົນພື້ນຖານການເປັນຄູ່ຮ່ວມມືຍຸດທະສາດດ້ານຄວາມໝັ້ນຄົງ ໃນຂົງເຂດ ອາຊີ-ປາຊີຟິກ.

ສອງຝ່າຍ ໄດ້ທົບທວນຄືນ ແລະ ຕີລາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດ ທັງໃນຂອບການຮ່ວມມືສອງຝ່າຍ ແລະ ຫຼາຍຝ່າຍ ໃນໄລຍະຜ່ານມາ ຊຶ່ງໄດ້ເພີ່ມທະວີຮັດແໜ້ນ ຢ່າງຕໍ່ເນື່ອງບົນພື້ນຖານຄວາມເຂົ້າອົກເຂົ້າໃຈ ແລະ ການຊ່ວຍເຫຼືອຊຶ່ງກັນ ແລະ ກັນ, ການພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອມາແຕ່ດົນນານ. ບົນຈິດໃຈດັ່ງກ່າວ, ສອງຝ່າຍ ໄດ້ເຫັນດີໃຫ້ເພີ່ມທະວີການພົວພັນສອງຝ່າຍໃນຫຼາຍຂົງເຂດໃນອະນາຄົດ ເຊັ່ນ: ການຮ່ວມມືດ້ານເສດຖະກິດ-ການຄ້າ, ການລົງທຶນ, ພະລັງງານ, ການສຶກສາ, ການທະຫານ, ວັດທະນະທຳ, ການທ່ອງທ່ຽວ, ແລະ ອື່ນໆ ທີ່ສອງຝ່າຍມີທ່າແຮງ ເພື່ອຜົນປະໂຫຍດຮ່ວມກັນ.

ໃນຂອບການພົວພັນຫຼາຍຝ່າຍ, ສປປລາວ ແລະ ສ ຣັດເຊຍ ໄດ້ຕີລາຄາສູງ ແລະ ສືບຕໍ່ຮ່ວມມືກັນ ແລະ ສະໜັບສະໜູນຊຶ່ງກັນ ແລະ ກັນ ໃນເວທີພາກພື້ນ ແລະ ສາກົນ ເພື່ອຮັບປະກັນການສົ່ງເສີມສັນຕິພາບ ແລະ ສະຖຽນລະພາບ ໃນທົ່ວໂລກ.

ໃນຕອນທ້າຍ, ທ່ານລັດຖະມົນຕີ ໄດ້ຕາງຫນ້າໃຫ້ລັດຖະບານລາວ ສະແດງຄວາມຊົມເຊີຍລັດຖະບານ ແລະ ປະຊາຊົນ ຣັດເຊຍ ທີ່ປະສົບຜົນສໍາເລັດຢ່າງຈົບງາມ ໃນການສະເຫຼີມສະຫຼອງວັນມະຫາສົງຄາມ ຄົບຮອບ 80 ປີ ແຫ່ງໄຊຊະນະປົກປ້ອງປິຕຸພູມ ຂອງ ສະຫະພາບໂຊວຽດ ໃນວັນທີ 9 ພຶດສະພາ 2025 ຜ່ານມາ. ພ້ອມນັ້ນ, ທ່ານຍັງໄດ້ຢືນຢັນວ່າ ໃນໄລຍະທ້າຍປີ 2025 ນີ້, ສປປ ລາວ ແລະ ສ ຣັດເຊຍ ຈະໄດ້ສືບຕໍ່ຈັດກິດຈະກຳຮ່ວມກັນ ເພື່ອສະເຫຼີມສະຫຼອງ ຄົບຮອບ 65 ປີ ແຫ່ງການສ້າງຕັ້ງສາຍພົວພັນການທູດ ລາວ-ຣັດເຊຍ ແລະ ຄົບຮອບ 60 ປີ ແຫ່ງການສ້າງຕັ້ງສະມາຄົມມິດຕະພາບ ລາວ-ຣັດເຊຍ.

(ຂ່າວ: ກຕທ)