ໄດ້ຕ້ອນຮັບການເຂົ້າຢ້ຽມຂໍ່ານັບຂອງບັນດາທູດຕ່າງປະເທດ ປະກອບດ້ວຍ ສະຫາຍ ຣິ ຢົງ ຈົນ (Ri Yong Chol)ເອກອັກຄະລັດຖະທູດ ແຫ່ງ ສປປ ເກົາຫຼີ ປະຈໍາ ສປປ ລາວ ແລະ ທ່ານ ເອດີ ອີວານ ບິນ ມາມູດ (Edi Irwan Bin Mahmud)ເອກອັກຄະລັດຖະທູດ ແຫ່ງ ມາເລເຊຍ ປະຈໍາ ສປປ ລາວ.
ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບອັນອົບອຸ່ນມາຍັງ ທ່ານເອກອັກຄະລັດຖະທູດ ສປປ ເກົາຫຼີ ແລະ ທ່ານເອກອັກຄະລັດຖະທູດ ມາເລເຊຍ ໃນການມາຢ້ຽມຂໍ່ານັບໃນຄັ້ງນີ້, ທັງໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງ ສປປ ລາວ ກັບທັງສອງປະເທດ ແລະ ສະແດງຄວາມຍິນດີທີ່ຈະສືບຕໍ່ເຮັດວຽກຮ່ວມກັນກັບທັງສອງປະເທດຢ່າງໃກ້ຊິດ ເພື່ອເສີມຂະຫຍາຍການພົວພັນຮ່ວມມື ລະຫວ່າງ ສປປ ລາວ ກັບ ສປປ ເກົາຫຼີ ແລະ ມາເລເຊຍ ໃຫ້ໄດ້ຮັບການພັດທະນາຍິ່ງໆຂຶ້ນໃນຕໍ່ໜ້າ, ລວມທັງຈະສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອ ຊຶ່ງກັນ ແລະ ກັນ ໃນຕໍ່ໜ້າ, ໂດຍສະເພາະ ຈະໃຫ້ການສະໜັບສະໜູນການເປັນປະທານອາຊຽນ ຂອງ ມາເລເຊຍ ປີ 2025.
ໃນໂອກາດດັ່ງກ່າວ, ເອກອັກຄະລັດຖະທູດທັງ 2 ປະເທດ ຕ່າງກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ສະແດງຄວາມຊົມເຊີຍທ່ານ ທອງສະຫວັນ ພົມວິຫານ ໃນໂອກາດໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຄົນໃໝ່, ພ້ອມທັງຢືນຢັນຈະສືບຕໍ່ປະຕິບັດໜ້າທີ່ສຸດຄວາມສາມາດໃນການປະກອບສ່ວນເຂົ້າໃນການເສີມຂະຫຍາຍການພົວພັນຮ່ວມມືອັນດີລະຫວ່າງປະເທດຂອງຕົນກັບ ສປປ ລາວ, ໂດຍສະເພາະຊຸກຍູ້ການແລກປ່ຽນການຢ້ຽມຢາມຂອງການນຳຂັ້ນສູງໃນຊຸມປີຕໍ່ໜ້າ,ສົ່ງເສີມການພົວພັນຮ່ວມມືລະຫວ່າງສອງປະເທດໃນດ້ານຕ່າງໆທີ່ສອງຝ່າຍມີທ່າແຮງຮ່ວມກັນ ໃຫ້ແຕກດອກອອກຜົນຂຶ້ນໄປເລື່ອຍໆ.
ສປປ ລາວ ແລະ ສປປ ເກົາຫຼີ ສ້າງຕັ້ງສາຍພົວພັນການທູດນໍາກັນ ໃນວັນທີ 24 ມິຖຸນາ 1974
ສປປ ລາວ ແລະ ມາເລເຊຍ ສ້າງຕັ້ງສາຍພົວພັນການທູດນໍາກັນ ໃນວັນທີ 1 ກໍລະກົດ1966
ຂ່າວ: ກະຊວງການຕ່າງປະເທດ
ຄໍາເຫັນ