ໃນໂອກາດດັ່ງກ່າວ, ທ່ານລັດຖະມົນຕີ ໄດ້ສະແດງຄວາມຍິນດີຕ້ອນຮັບ ທ່ານທູດຮົງກາຣີ ພ້ອມດ້ວຍຄະນະ ແລະ ສະແດງຄວາມຮູ້ບຸນຄຸນຕໍ່ການຊ່ວຍເຫຼືອອັນລ້ຳຄ່າຂອງລັດຖະບານ ແລະ ປະຊາຊົນ ຮົງກາຣີ ຕະຫຼອດໄລຍະຜ່ານມາ. ນອກນັ້ນ, ສອງຝ່າຍ ຍັງໄດ້ຕີລາຄາສູງ ຕໍ່ການພົວພັນ ແລະ ການຮ່ວມມືອັນດີທີ່ມີມູນເຊື້ອມາແຕ່ດົນນານ ລະຫວ່າງ ສປປ ລາວ ກັບຮົງກາຣີບົນພື້ນຖານການເປັນຄູ່ຮ່ວມມືຍຸດທະສາດ ພ້ອມທັງສະແດງຄວາມຍິນດີທີ່ຈະສືບຕໍ່ເຮັດວຽກຮ່ວມກັນ ເພື່ອຊຸກຍູ້ສົ່ງເສີມການພົວພັນຮ່ວມມື ລະຫວ່າງ ສປປ ລາວ ກັບຮົງກາຣີໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.
ໃນໂອກາດດຽວກັນນີ້, ທ່ານທູດ ຮົງກາຣີ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ພ້ອມທັງສະແດງຄວາມຢືນຢັນທີ່ຈະເຮັດສຸດຄວາມສາມາດໃນການເປັນຂົວຕໍ່ປະກອບສ່ວນເຂົ້າໃນການສືບຕໍ່ເສີມຂະຫຍາຍການພົວພັນຮ່ວມມື ລະຫວ່າງ ສປປ ລາວ ກັບຮົງກາຣີໂດຍສະເພາະແມ່ນການແລກປ່ຽນການຢ້ຽມຢາມຊຶ່ງກັນ ແລະ ກັນ, ການພົວພັນຮ່ວມມືໃນດ້ານຕ່າງໆ ທີ່ສອງຝ່າຍມີທ່າແຮງຮ່ວມກັນເປັນຕົ້ນແມ່ນດ້ານການສຶກສາ, ກະສິກຳ, ການທ່ອງທ່ຽວ ແລະ ອື່ນໆ. ພ້ອມດຽວກັນນີ້, ສອງຝ່າຍ ເຫັນດີສືບຕໍ່ສຶກສາຄວາມເປັນໄປໄດ້ເພື່ອເສີມຂະຫຍາຍການຮ່ວມມືດ້ານເສດຖະກິດ ແລະ ການຄ້າ ໃຫ້ຫຼາຍຂຶ້ນກວ່າເກົ່າ.
ສປປ ລາວ ສ້າງຕັ້ງສາຍພົວພັນການທູດກັບ ຮົງກາຣີ ໃນວັນທີ 12 ກັນຍາ 1962.
(ຂ່າວ: ກຕທ)
ຄໍາເຫັນ