ລມຕ ກະຊວງກະສິກໍາ ແລະ ປ່າໄມ້ ຢ້ຽມຢາມ ແລະ ເຮັດວຽກຢູ່ເມືອງຫົງສາ

ໃນວັນທີ 19 ທັນວານີ້, ພາຍຫຼັງການຢ້ຽມຢາມເມືອງຈອມເພັດ ແຂວງຫຼວງພະບາງແລ້ວ, ທ່ານ ເພັດ ພົມພີພັກ ລັດຖະມົນຕີກະຊວງກະສິກໍາ ແລະ ປ່າໄມ້ ພ້ອມດ້ວຍຄະນະນຳ ໄດ້ເຄື່ອນໄຫວຢ້ຽມຍາມ ແລະ ເຮັດວຽກຢູ່ເມືອງຫົງສາ ແຂວງໄຊຍະບູລີ ເປັນກຽດຕ້ອນຮັບຄັ້ງນີ້ໂດຍທ່ານ ຄຳຫຼ້າ ຜີວວັນນາ ເລຂາພັກເມືອງ ເຈົ້າເມືອງຫົງສາໂດຍມີຄະນະການນຳຂອງເມືອງຫົງສາ, ຫົວໜ້າ-ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງຫົງສາ ແລະ ເມືອງຊຽງຮ່ອນເຂົ້າຮ່ວມ. ພ້ອມນັ້ນ ກໍໄດ້ນຳພາເຄື່ອນໄຫວເຂົ້າຢ້ຽມຊົມໂຮງງານຜະລິດແຜ່ນຍິບຊຳ, ໂຮງງານຜະລິດດິນບ໋ອກເບົາ ພ້ອມທັງຮັບຟັງການອະທິບາຍຂັ້ນຕອນການຜະລິດຈົນເຖິງຂອດການສົ່ງອອກ. ຈາກນັ້ນ ກໍໄດ້ເຂົ້າຢ້ຽມກຸ່ມສະຫະກອນສົ່ງເສີມກະສິກຳ ຢູ່ທີ່ ຫ້ອງການບໍລິຫານສະຫະກອນ ພະແນກພັດທະນາສັງຄົມ ບໍລິສັດໄຟຟ້າຫົງສາ ຈຳກັດ ພ້ອມທັງຮັບຟັງການລາຍງານສະພາບລວມຂອງເມືອງຫົງສາ ແລະ ການຈັດຕັ້ງປະຕິບັດຂອງສະຫະກອນ ສົ່ງເສີມກະສິກຳ. ຊຶ່ງສະຫະກອນ ສົ່ງເສີມກະສິກຳ ແຕ່ກ່ອນແມ່ນໄດ້ຈັດຕັ້ງຕາມກຸ່ມອາຊີບ ໃນປີ 2015 (ຮູບແບບສະຫະກອນ), ປະກອບມີ 10 ກຸ່ມອາຊີບຄື: ກຸ່ມຜະລິດກະສິກຳ 3 ກຸ່ມ, ກຸ່ມປຸງແຕ່ງຜົນຜະລິດກະສິກໍາ 2 ກຸ່ມ, ຕັດຫຍິບ 2 ກຸ່ມ, ລ້ຽງສັດ 2 ກຸ່ມ, ຫັດຖະກໍາຈັກສານ 1 ກຸ່ມ ແລະ ຮວບຮວມຜົນຜະລິດ 1 ກຸ່ມ. ມີສະມາຊິກທັງໝົດ 96 ຄອບຄົວ, ໂດຍໄດ້ຮັບທຶນສະໜັບສະໜູນຈາກບໍລິສັດ ໄຟຟ້າຫົງສາ ຈໍາກັດ. ປີ 2018 ໄດ້ຈັດຕັ້ງເປັນສະຫະກອນສົ່ງເສີມກະສິກຳເມືອງຫົງສາຢ່າງເປັນທາງການ, ໂດຍມີສະມາຊິກທັງໝົດ 137 ຄອບຄົວ, ໃນນັ້ນ ມີຄະນະບໍລິຫານ 7 ທ່ານ ແລະ ກວດກາ 3 ທ່ານ. ມາຮອດປັດຈຸບັນມີ 11 ກຸ່ມ (ເພີ່ມໃໝ່ກຸ່ມລ້ຽງເຜິ້ງ), ມີສະມາຊິກທັງໝົດ 145 ຄອບຄົວ. ຜ່ານການຈັດຕັ້ງປະຕິບັດເຫັນໄດ້ວ່າ: ຜົນຜະລິດ ແລະ ຜະລິດຕະພັນຂອງສະຫະກອນ ແມ່ນມີຄຸນນະພາບ ແລະ ເປັນສິນຄ້າປອດສານພິດ ເຮັດໃຫ້ເປັນທີ່ຍອມຮັບຂອງສັງຄົມ. 
ໃນໂອກາດນີ້ ທ່ານລັດຖະມົນຕີ ໄດ້ມີຄຳເຫັນເນັ້ນໜັກ ໃຫ້ເອົາໃຈໃສ່ຕື່ມບາງດ້ານຄື: ໃຫ້ສືບຕໍ່ສຸມໃສ່ຜະລິດກະສິກຳ ເພື່ອທົດແທນການນໍາເຂົ້າ ແລະ ສົ່ງອອກເປັນສິນຄ້າໃຫ້ຫຼາຍເທົ່າທີ່ຈະຫຼາຍໄດ້. ໂດຍສະເພາະ ເລັ່ງໃສ່ບັນດາສິນຄ້າທີ່ມີທ່າແຮງ ແລະ ມີຕະຫຼາດຮອງຮັບ ດ້ວຍການດຳເນີນມາດຕະການສົ່ງເສີມ ແລະ ປົກປ້ອງຜູ້ຜະລິດພາຍໃນ ໃຫ້ເຂັ້ມແຂງ ແລະ ໝັ້ນຄົງ, ຊຸກຍູ້ສົ່ງເສີມ ແລະ ສ້າງເງື່ອນໄຂ ອຳນວຍຄວາມສະດວກຢ່າງເປັນຮູບປະທຳ, ຕັດຂັ້ນຂອດທີ່ເປັນອຸປະສັກໃຫ້ແກ່ພາກທຸລະກິດ ແລະ ຜູ້ລົງທຶນພາຍໃນ ແລະ ຕ່າງປະເທດ; ໃຫ້ຂະແໜງກະສິກຳ ແລະ ປ່າໄມ້ ສົມທົບກັບບັນດາຂະແໜງການກ່ຽວຂ້ອງ ສຸມໃສ່ຈັດຕັ້ງປະຕິບັດ ນະໂຍບາຍແຫ່ງຊາດ ວ່າດ້ວຍການສົ່ງເສີມການລ້ຽງສັດ-ສັດນໍ້າ ແລະ ການສົ່ງເສີມການປູກພືດໃຫ້ແຂງແຮງ, ເປັນຮູບປະທໍາ ແລະ ມີປະສິດທິຜົນຕົວຈິງ; ສຸມໃສ່ຈັດຕັ້ງຜັນຂະຫຍາຍບັນດາມະຕິ, ຄຳສັ່ງ, ຂໍ້ຕົກລົງຂອງພັກ ແລະ ລັດຖະບານ ກ່ຽວກັບວຽກງານກະສິກຳ ແລະ ປ່າໄມ້ ຄຽງຄູ່ກັບການກວດກາ, ປັບປຸງຄືນນະໂຍບາຍ-ຍຸດທະສາດ ການຜະລິດກະສິກຳເປັນສິນຄ້າ ໂດຍເນັ້ນໃສ່ກະສິກຳສະອາດ, ປອດສານພິດ ຕິດພັນກັບການປຸງແຕ່ງ, ທັງຄົ້ນຄວ້າກຳນົດບູລິມະສິດ ການຜະລິດປະເພດສິນຄ້າເພື່ອສົ່ງອອກ, ມີການຈັດສັນເຂດການຜະລິດແຕ່ລະປະເພດຢ່າງຄັກແນ່; ພາກລັດ ຕ້ອງໄດ້ຫັນປ່ຽນທັດສະນະແນວຄິດ ຈາກທີ່ຊິນເຄີຍເປັນຜູ້ຄວບຄຸມແຕ່ດ້ານດຽວ ມາເປັນຜູ້ບໍລິຫານຈັດການ, ອັນສໍາຄັນແມ່ນເຮັດໜ້າທີ່ບໍລິການຮັບໃຊ້ປະຊາຊົນ. (ພາບ-ຂ່າວ: ກິດຕິສັກ ບົວໄລ) 23096800