ທ່ານສາດສະດາຈານ ແອນດຣູ ສະກອດ ໜຶ່ງໃນຜູ້ຂຽນບົດລາຍງານໄດ້ກ່າວວ່າ: ການລົງທຶນຢ່າງຮີບດ່ວນໃນການພັດທະນາບຸກຄະລາກອນ, ໂດຍສະເພາະໃນດ້ານການຖ່າຍພາບທາງການແພດແມ່ນມີຄວາມສຳຄັນຫຼາຍສຳລັບການປັບປຸງການວິນິດໄສພະຍາດມະເຮັງ ແລະ ຜົນການຮັກສາທາງດ້ານຄລີນິກໃນອົສຕຣາລີ ແລະ ທົ່ວໂລກ.
ບົດລາຍງານຄາດຄະເນວ່າ: ອັດຕາການເປັນມະເຮັງຈະເພີ່ມຂຶ້ນເຖິງ 75%, ໂດຍອາດຈະມີກໍລະນີໃໝ່ປະມານ 35 ລ້ານກໍລະນີຕໍ່ປີພາຍໃນ 25 ປີຂ້າງໜ້າ ແລະ ຫຼາຍກວ່າ 70% ຂອງກໍລະນີໃໝ່ຈະຢູ່ໃນບັນດາປະເທດທີ່ມີລາຍໄດ້ຕໍ່າ ແລະ ປານກາງ. ນອກຈາກນັ້ນ, ປັດຈຸບັນຄົນເຈັບພະຍາດມະເຮັງໜຶ່ງສ່ວນສາມທົ່ວໂລກຍັງບໍ່ທັນໄດ້ຮັບການວິນິດໄສ ຊຶ່ງບາງພື້ນທີ່ຂອງອາຟຣິກາມີອັດຕາຄົນເຈັບທີ່ບໍ່ໄດ້ຮັບການວິນິດໄສເພີ່ມຂຶ້ນຫຼາຍກວ່າ 60%.
ຜົນການສຶກສາດັ່ງກ່າວເຕືອນວ່າ: ຊ່ອງຫວ່າງດ້ານບຸກຄະລາກອນທີ່ໃຫຍ່ທີ່ສຸດຈະຢູ່ໃນບົດບາດດ້ານການພະຍາບານ ແລະ ສຸຂະພາບຊຸມຊົນ, ລວມທັງການບໍລິການດ້ານວິນິດໄສພະຍາດ ຊຶ່ງສ່ຽງທີ່ຈະເຮັດໃຫ້ຄວາມແຕກຕ່າງຂອງອັດຕາການຢູ່ລອດລະຫວ່າງຊຸມຊົນກວ້າງຂວາງຂຶ້ນກວ່າເກົ່າ.
ບົດລາຍງານຄາດຄະເນວ່າ: ອັດຕາການລອດຊີວິດໄລຍະ 5 ປີ ພາຍໃນປີ 2050 ຈະຍັງຄົງຕໍ່າຫຼາຍໃນອາຟຣິກາ (34%) ແລະ ອາຊີ (39%), ເມື່ອທຽບກັບພາກພື້ນທີ່ມີລາຍໄດ້ສູງ ຊຶ່ງຄາດວ່າໂຕເລກຈະສູງກວ່າ 60%.
ທ່ານ ສະກອດ ກ່າວວ່າ: ການລົງທຶນໃນການບໍລິການຖ່າຍພາບວິນິດໄສ ແລະ ຄວາມສາມາດຂອງບຸກຄະລາກອນແມ່ນມີຄວາມສຳຄັນຫຼາຍ, ຍ້ອນວ່າການກວດພົບພະຍາດແຕ່ຫົວທີຜ່ານການຖ່າຍພາບທາງການແພດມີບົດບາດສຳຄັນຕໍ່ປະສິດທິພາບການປິ່ນປົວພະຍາດມະເຮັງ, ໂດຍສະເພາະໃນເຂດຫ່າງໄກສອກຫຼີກທີ່ມັກຈະມີການເຂົ້າເຖິງການບໍລິການເຫຼົ່ານີ້ຢ່າງຈຳກັດ.
ຜູ້ຊ່ຽວຊານໄດ້ຮຽກຮ້ອງໃຫ້ທົ່ວໂລກເລັ່ງການລົງທຶນດ້ານການພັດທະນາບຸກຄະລາກອນ, ນະວັດຕະກຳສຸຂະພາບດີຈີຕອນ ແລະ ການຝຶກອົບຮົມ, ໂດຍຄາດຄະເນວ່າການເພີ່ມຈຳນວນບຸກຄະລາກອນດ້ານການດູແລພະຍາດມະເຮັງສາມາດປ້ອງກັນການເສຍຊີວິດໄດ້ເຖິງ 170 ລ້ານຄົນ ແລະ ສ້າງຜົນປະໂຫຍດທາງເສດຖະກິດຢ່າງຫຼວງຫຼາຍ.
ທັງນີ້, ບົດລາຍງານດັ່ງກ່າວໄດ້ຖືກຕີພິມໃນວາລະສານ The Lancet Oncology ໃນວັນທີ 31 ພຶດສະພາ ຜ່ານມາ.
ຄໍາເຫັນ