ຂ່າວລະບຸວ່າ: ລາຍງານຈາກນະຄອນຫຼວງປາຣີ ປະເທດຝຣັ່ງ ເມື່ອບໍ່ດົນມານີ້ວ່າ, ຈໍານວນຜູ້ເສຍຊີວິດໃນເວລາເກີດຄື້ນຄວາມຮ້ອນໄດ້ຖືກປະເມີນຕໍ່າເກີນໄປ ເນື່ອງຈາກສາເຫດຂອງການເສຍຊີວິດທີ່ບັນທຶກໄວ້ໃນໂຮງໝໍມັກຈະເປັນບັນຫາດ້ານຫົວໃຈ, ລະບົບຫາຍໃຈ ຫຼືບັນຫາສຸຂະພາບອື່ນໆ ທີ່ສົ່ງຜົນກະທົບຕໍ່ຜູ້ອາຍຸສູງໂດຍສະເພາະເມື່ອອຸນຫະພູມທີ່ເພີ່ມສູງຂຶ້ນ.
ນັກຄົ້ນຄວ້າໄດ້ນໍາໃຊ້ຕົວແບບສະພາບອາກາດເພື່ອຄາດຄະເນວ່າພາວະໂລກຮ້ອນເຮັດໃຫ້ອຸນຫະພູມສະເລ່ຍໃນ 854 ເມືອງໃນເອີຣົບ ລະຫວ່າງເດືອນມິຖຸນາ - ສິງຫາ ຮ້ອນຂຶ້ນ 2.2 ອົງສາ, ຊີ້ໃຫ້ເຫັນວ່າອາດຈະເຮັດໃຫ້ອັດຕາການເສຍຊີວິດສູງຂຶ້ນ. ໂດຍມີການຄາດຄະເນວ່າຈະມີຜູ້ເສຍຊີວິດເກີນກວ່າ 24,400 ຄົນໃນໄລຍະດັ່ງກ່າວ ຖ້າຫາກບໍ່ມີການປ່ຽນແປງຂອງດິນຟ້າອາກາດທີ່ເຮັດໃຫ້ໂລກຮ້ອນຂຶ້ນ 1.3 ອົງສາ.
ການສຶກສາໂດຍນັກວິທະຍາສາດຂອງImperial College London ແລະນັກລະບາດວິທະຍາຈາກວິທະຍາໄລອະນາໄມ ແລະ ການແພດເຂດຮ້ອນ ແຫ່ງນະຄອນຫຼວງລອນດອນ ພົບວ່າ: ການປ່ຽນແປງຂອງດິນຟ້າອາກາດສາມາດເຮັດໃຫ້ມີຜູ້ເສຍຊີວິດຍ້ອນຄວາມຮ້ອນເພີ່ມຂຶ້ນເປັນສາມເທົ່າໃນລະດູຮ້ອນນີ້.
ການສຶກສາລະບຸວ່າ: ນະຄອນຫຼວງໂຣມ ປະເທດອີຕາລີ, ມີຈໍານວນຜູ້ເສຍຊີວິດຈາກການປ່ຽນແປງຂອງດິນຟ້າອາກາດຫຼາຍທີ່ສຸດ, ໂດຍມີຜູ້ເສຍຊີວິດຢ່າງໜ້ອຍ 835 ຄົນ, ຮອງລົງມາແມ່ນນະຄອນຫຼວງເອເທນ ປະເທດເກຼັກ 630 ຄົນແລະ ນະຄອນຫຼວງປາຣີປະເທດຝຣັ່ງ409 ຄົນ ຊຶ່ງໃນຈໍານວນຄາດຄະເນນີ້, 85% ມີອາຍຸ 65 ປີຂຶ້ນໄປ.
ຢ່າງໃດກໍຕາມ, ນັກຄົ້ນຄວ້າໄດ້ເນັ້ນໜັກວ່າການສຶກສານີ້ບໍ່ໄດ້ກວມເອົາທັງໝົດຂອງເອີຣົບ, ຍ້ອນວ່າບາງພື້ນທີ່ເຊັ່ນ: ແຫຼມບອລຂ່ານບໍ່ໄດ້ຖືກລວມເຂົ້າໃນການສຶກສານີ້. ແຕ່ພວກເຂົາເຈົ້າເຕືອນວ່າ ອຸນຫະພູມຄື້ນຄວາມຮ້ອນທີ່ເພີ່ມຂຶ້ນພຽງ2-4 ອົງສາ ອາດສ້າງຄວາມແຕກຕ່າງລະຫວ່າງຊີວິດ ແລະຄວາມຕາຍຂອງຫຼາຍພັນຄົນ.
ຄໍາເຫັນ