WMO ລະບຸວ່າ: ເອີຣົບຕາເວັນຕົກໄດ້ປະສົບກັບເດືອນມິຖຸນາ - ກໍລະກົດທີ່ຮ້ອນທີ່ສຸດເທົ່າທີ່ເຄີຍມີມາ, ໂດຍຄື້ນຄວາມຮ້ອນທີ່ຮຸນແຮງຍັງສືບຕໍ່ເກີດຂຶ້ນເຖິງເດືອນສິງຫາ ແລະ ບາງປະເທດກຳລັງປະເຊີນກັບຄື້ນຄວາມຮ້ອນຄັ້ງທີ 4 ນັບຕັ້ງແຕ່ເດືອນພຶດສະພາ. ໃນຂະນະດຽວກັນ, ເດືອນກໍລະກົດຍັງເກີດໄຟໄໝ້ປ່າຮ້າຍແຮງທົ່ວເອີຣົບຕາເວັນຕົກ ຊຶ່ງສົ່ງຜົນກະທົບຢຢ່າງຫຼວງຫຼາຍຕໍ່ທັງພື້ນທີ່ທີ່ຖືກໄຟໄໝ້ ແລະ ປະລິມານມົນລະພິດທາງອາກາດທີ່ປ່ອຍອອກມາ.
ທ່ານ ຈອນ ເຄນເນດີ ຫົວໜ້າຂໍ້ມູນຂ່າວສານດ້ານສະພາບອາກາດຂອງ WMO ກ່າວວ່າ: ເຫດການທີ່ເກີດຂຶ້ນໃນສອງສາມເດືອນທີ່ຜ່ານມາແມ່ນຜົນກະທົບສະສົມຂອງພາວະໂລກຮ້ອນໃນໄລຍະຍາວລວມກັບລະບົບຄວາມກົດດັນອາກາດສູງ ແລະ ຕໍ່າທີ່ສະຫຼັບກັນຢ່າງຕໍ່ເນື່ອງທົ່ວຊີກໂລກເໜືອ. ໂດຍປົກກະຕິແລ້ວ, ລະບົບຄວາມກົດດັນອາກາດສູງແມ່ນກ່ຽວຂ້ອງກັບອຸນຫະພູມສູງ ແລະ ໄພແຫ້ງແລ້ງ, ໃນຂະນະທີ່ລະບົບຄວາມກົດດັນອາກາດຕໍ່າມັກຈະເຮັດໃຫ້ສະພາບອາກາດເຢັນ ແລະ ຊຸ່ມ. ລະບົບຄວາມກົດດັນອາກາດສູງດັ່ງກ່າວສາມາດຢູ່ໄດ້ຫຼາຍມື້ ຫຼື ຫຼາຍອາທິດ ດັ່ງທີ່ໄດ້ເກີດຂຶ້ນໃນປີນີ້.
ຄື້ນຄວາມຮ້ອນທີ່ຮຸນແຮງຍັງສືບຕໍ່ສົ່ງຜົນກະທົບຕໍ່ເອີຣົບຕາເວັນຕົກ. ສະພາບໄພແຫ້ງແລ້ງທີ່ແຜ່ຂະຫຍາຍຢ່າງກວ້າງຂວາງທີ່ເກີດຂຶ້ນໃນລະຫວ່າງເດືອນມີນາ ຫາ ເດືອນມິຖຸນາຍັງຄົງຢູ່ ແລະ ຮຸນແຮງຂຶ້ນ, ໂດຍປະເທດຝຣັ່ງ, ແອັດສະປາຍ, ບາງສ່ວນຂອງເຢຍລະມັນ ແລະ ສະຫະລາຊະອານາຈັກ ລວມທັງພື້ນທີ່ອື່ນໆໃນພາກຕາເວັນອອກ, ມີປະລິມານນ້ຳຝົນ ແລະ ຄວາມຊຸ່ມຂອງດິນຕໍ່າຫຼາຍ ຊຶ່ງຄື້ນຄວາມຮ້ອນ, ຄວາມຊຸ່ມຂອງດິນຕໍ່າ ແລະ ໄພແຫ້ງແລ້ງກຳລັງສ້າງຄວາມເສຍຫາຍຢ່າງຫຼວງຫຼາຍຕໍ່ລະບົບນິເວດ ແລະ ຂະແໜງກະສິກຳ ສົ່ງຜົນໃຫ້ລະດັບນ້ຳໃນແມ່ນ້ຳຫຼຸດລົງ, ການຜະລິດພະລັງງານຢຸດສະງັກ ແລະ ເພີ່ມຄວາມສ່ຽງຂອງໄຟໄໝ້ປ່າ.
ຄໍາເຫັນ