ພິທີລົງນາມດັ່ງກ່າວ ໄດ້ຈັດຂຶ້ນໃນວັນທີ 16 ກັນຍາ 2ນີ້ ທີ່ນະຄອນຫຼວງວຽງຈັນ ລະຫວ່າງ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ແຫ່ງ ສປປ ລາວ, ທ່ານ ກາວ ກິມ ຮຸນ ເລຂາທິການໃຫຍ່ອາຊຽນຊຶ່ງມີບັນດາທ່ານລັດຖະມົນຕີເສດຖະກິດອາຊຽນພ້ອມດ້ວຍຄະນະທີ່ກ່ຽວຂ້ອງ ແລະ ເຂົ້າຮ່ວມ.
ການລົງນາມອະນຸສັນຍາທີ 5 ເພື່ອປັບປຸງສັນຍາການລົງທຶນຮອບດ້ານອາຊຽນ (ACIA) ໃນກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 56 ແລະ ກອງປະຊຸມສະພາເຂດການລົງທຶນອາຊຽນ ຄັ້ງທີ 27 ແມ່ນຂໍ້ຕົກລົງສຳຄັນລະຫວ່າງບັນດາປະເທດສະມາຊິກອາຊຽນ ຊຶ່ງສະແດງເຖິງຄວາມໝາຍໝັ້ນຢ່າງຕໍ່ເນື່ອງຕໍ່ກັບນັກລົງທຶນ ແລະ ພາກເອກະຊົນເປັນຈໍານວນຫຼວງຫຼາຍ, ເພື່ອເປັນການໃຫ້ຄວາມແນ່ນອນ, ຊັດເຈນ ແລະ ຄວາມໂປ່ງໃສຫຼາຍຂຶ້ນກ່ຽວກັບລະບົບການລົງທຶນໃນອາຊຽນ, ພ້ອມທັງຮັບປະກັນວ່າ: ສັນຍາການລົງທຶນພາຍໃນຂອງອາຊຽນ ຍັງຄົງມີຄວາມກ່ຽວຂ້ອງກັບບັນດາສັນຍາພາຍນອກຂອງອາຊຽນ, ທັນສະໄໝ, ມີວິໄສທັດ ແລະ ປັບຕົວເຂົ້າກັບທຸລະກິດ. ຈະເປັນການປູທາງໃຫ້ແກ່ບັນດານະໂຍບາຍ ແລະ ການລົງທຶນຂອງບັນດາປະເທດສະມາຊິກອາຊຽນຢ່າງເຂັ້ມແຂງ, ຈະດຶງດູດການລົງທຶນຈາກທົ່ວໂລກໄດ້ດີຂຶ້ນແລະແໜ້ນແຟ້ນກວ່າເກົ່າອີກ.
ອະນຸສັນຍານີ້ໃຫ້ 3 ລັກສະນະສຳຄັນຄື: ການປະຕິບັດການຫັນປ່ຽນບັນຊີລາຍການຈອງເອກະສານຊ້ອນທ້າຍດຽວຂອງການລົງທຶນຮອບດ້ານອາຊຽນໃນປັດຈຸບັນໄປຫາບັນຊີລາຍຊື່ລົບສອງເອກະສານຊ້ອນທ້າຍ, ລວມທັງການຈອງຕໍ່ກັບພັນທະກ່ຽວກັບການຫ້າມການປະຕິບັດຄວາມຕ້ອງການພາຍໃຕ້ອະນຸສັນຍາທີ 4 ເພື່ອແກ້ໄຂການລົງທຶນຮອບດ້ານອາຊຽນ; ຕໍ່ມາແມ່ນການຂະຫຍາຍຂອບເຂດຂອງການລົງທຶນຮອບດ້ານອາຊຽນ ເກີນຂອບເຂດທີ່ມີຢູ່ແລ້ວຂອງການຜະລິດ, ການກະສິກໍາ, ການປະມົງ, ປ່າໄມ້, ການຂຸດຄົ້ນບໍ່ແຮ່ ແລະ ການບໍລິການເສີມ; ອີກສິ່ງໜຶ່ງຄືການນຳໃຊ້ກົນໄກຮັດແຄບ ຈະຖືກນຳໃຊ້ກັບບາງປະເທດສະມາຊິກອາຊຽນ ຊຶ່ງອາຊຽນຍັງຄົງມີຄວາມຫວັງວ່າ: ປະເທດສະມາຊິກທີ່ຍັງເຫຼືອຈະສາມາດເຮັດໄດ້ເຊັ່ນດຽວກັນພາຍໃນປີນີ້. ສັນຍາສະບັບນີ້ ເມື່ອໄດ້ຮັບລາຍເຊັນບັນດາປະເທດສະມາຊິກທັງໝົດ, ບັນຊີລາຍຊື່ການຈອງ ການລົງທຶນຮອບດ້ານຂອງອາຊຽນ ສະບັບປັບປຸງຈະສໍາເລັດພາຍໃນ 180 ວັນ.
(ຂ່າວ: ຍຸພິນທອງພາບ: ແສງຈັນ)
ຄໍາເຫັນ