ໂຮງແຮມ ຮໍລີເດ ອິນ ແອນ ສະຫວີທສວຽງຈັນຮ່ວມລົງນາມຄັ້ງນີ້ ລະຫວ່າງ ທ່ານ ນາງ ພອນປະເສີດ ໄຊຍະມຸງຄຸນ ຫົວໜ້າກົມອະນາໄມ ແລະ ສົ່ງເສີມສຸຂະພາບ, ກະຊວງ ສທ ແລະ ທ່ານ ລຸກ ເອັຟສຫົວໜ້າອົງການຊ່ວຍເຫຼືອເດັກສາກົນປະຈໍາ ສປປ ລາວ ໂດຍການເຂົ້າຮ່ວມເປັນສັກຂີພິຍານຂອງທ່ານບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ; ທ່ານ ທິມໂມຕີ ອາມສະຕຣອງຜູ້ຕາງໜ້າອົງການອະນາໄມໂລກ ປະຈຳ ສປປ ລາວ ພ້ອມດ້ວຍບັນດາຮອງເຈົ້າແຂວງ ຈາກ 7 ແຂວງເປົ້າໝາຍ ຄື:ແຂວງຫຼວງພະບາງ, ແຂວງຫຼວງນໍ້າທາ, ຜົ້ງສາລີ, ອຸດົມໄຊ, ສາລະວັນ, ຄໍາມ່ວນ, ເຊກອງ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນແຝງ ພູມມະໄລສິດ ໄດ້ກ່າວວ່າ: ສະພາບຕົວຈິງຂອງການການປ່ຽນແປງສະພາບດິນຟ້າອາກາດໃນໄລຍະທີ່ຜ່ານມາຮອດປັດຈຸບັນ ໃນສປປ ລາວ ເຫັນວ່າເກີດມີສະພາບອຸນນະພູມທີ່ເພີ່ມສູງຂຶ້ນ, ເກີດມີໄພພີບັດທຳມະຊາດ ນໍ້າຖ້ວມ ສະພາບມົນລະພິດ PM 2.5 ແລະ ອື່ນໆ. ສິ່ງດັ່ງກ່າວໄດ້ສົ່ງກະທົບຕໍ່ສຸຂະພາບຂອງປະຊາຊົນລາວໃນຂອບເຂດທົ່ວປະເທດ ແລະ ໃນຕໍ່ໜ້າຖ້າເຫດການຄວາມຮຸນແຮງຂອງສະພາບການປ່ຽນແປງດິນຟ້າອາກາດມີຄວາມຖີ່ ແລະ ຄວາມຮຸນແຮງເພີ່ມຂຶ້ນເລື້ອຍໆກໍຈະສົ່ງຜົນກະທົບຕໍ່ກັບຂະແໜງສາທາລະນະສຸກໂດຍກົງ ຊຶ່ງຈະສ້າງຄວາມເສຍຫາຍໃຫ້ແກ່ພື້ນຖານໂຄງລ່າງຂອງຂະແໜງສາທາລະນະສຸກ ລວມເຖິງການບໍລິການນໍ້າສະອາດ, ສຸຂາພິບານ ແລະ ອະນາໄມ. ສຳລັບຜົນກະທົບທາງອ້ອມອາດຈະສ້າງສະພາບເອື້ອອຳນວຍໃຫ້ແກ່ການແຜ່ພັນຂອງແມງໄມ້ທີ່ເປັນພາຫະນຳເຊື້ອພະຍາດ ແລະ ການຂະຫຍາຍໂຕຂອງເຊື້ອພະຍາດບາງຊະນິດ ໂດຍສະເພາະອາດມີການລະບາດຂອງໄຂ້ຍຸງລາຍ, ພະຍາດຖອກທ້ອງ ແລະພະຍາດອື່ນໆ ຕາມມາ. ໃນນາມຕາງໜ້າຂອງລັດຖະບານແຫ່ງ ສປປ ລາວ ແລະ ກະຊວງສາທາລະນະສຸກ ຂ້າພະເຈົ້າ ແມ່ນມີຄວາມຍິນດີເປັນຢ່າງຍິ່ງຕໍ່ການລິເລີ່ມຈັດຕັ້ງໂຄງການການສ້າງຄວາມເຂັ້ມແຂງໃຫ້ແກ່ລະບົບສາທາລະນະສຸກ ຂອງ ສປປ ລາວ ໃຫ້ທົນທານຕໍ່ກັບສະພາບການປ່ຽນແປງດິນຟ້າອາກາດ ໂດຍໄດ້ຮັບທຶນສະໜັບສະໜູນຈາກ ກອງທຶນສີຂຽວທາງດ້ານການປ່ຽນແປງດິນຟ້າອາກາດຫຼື GCF ໃນຄັ້ງນີ້ແລະ ມີຄວາມພາກພູມໃຈທີ່ສຸດ ທີ່ ສປປ ລາວ ແມ່ນເປັນປະເທດທຳອິດຂອງໂລກທີ່ໄດ້ຮັບການສະໜັບສະໜູນທຶນຈາກ GCF ສໍາລັບໂຄງການທີ່ສຸມໃສ່ວຽກງານດ້ານສາທາລະນະສຸກຢ່າງເຕັມສ່ວນ.
ໂຄງການນີ້ ແມ່ນຈະດຳເນີນເປັນເວລາ 5 ປີ ຊຶ່ງຈະສະໜັບສະໜູນ ລັດຖະບານ ແຫ່ງ ສປປ ລາວເພື່ອປະຕິບັດແຜນດຳເນີນງານແຫ່ງຊາດດ້ານການປ່ຽນແປງດິນຟ້າອາກາດທີ່ເປັນບຸລິມະສິດກໍຄືແຜນດຳເນີນງານດ້ານການປັບຕົວຂອງຂະແໜງການສາທາລະນະສຸກລວມທັງບັນດາຄໍາໝັ້ນສັນຍາຕ່າງໆ. ໂຄງການຈະເພີ່ມຄວາມທົນທານຂອງລະບົບສາທາລະນະສຸກຕໍ່ກັບການປ່ຽນແປງສະພາບດິນຟ້າອາກາດ ພ້ອມກັບສ້າງຄວາມເຂັ້ມແຂງໃຫ້ແກ່ຊຸມຊົນ ເພື່ອຫຼຸດຜ່ອນຜົນກະທົບດ້ານສຸຂະພາບທີ່ມີໃນປັດຈຸບັນ ແລະ ທີ່ອາດຈະເກີດຂຶ້ນໃນອະນາຄົດ ອັນເນື່ອງມາຈາກການປ່ຽນແປງດິນຟ້າອາກາດ. ໂຄງການດັ່ງກ່າວບໍ່ພຽງແຕ່ຈະສ້າງຄວາມເຂັ້ມແຂງໃຫ້ກັບລະບົບສາທາລະນະສຸກໃຫ້ສາມາດຮັບມືກັບຜົນກະທົບຈາກການປ່ຽນແປງດິນຟ້າອາກາດເທົ່ານັ້ນແຕ່ຍັງຈະເປັນຕົວແບບໃຫ້ກັບກຸ່ມບັນດາປະເທດໃນອາຊຽນ ສະແດງໃຫ້ເຫັນວິທີທີ່ໂຄງການສາມາດສ້າງລະບົບສາທາລະນະສຸກໃຫ້ມີຄວາມທົນທານໃນທົ່ວພາກພື້ນ.ໃນໄລຍະ 5 ປີຂ້າງໜ້າ, ໂຄງການຈະໃຫ້ການສະໜັບສະໜູນ ສະຖານທີ່ບໍລິການສາທາລະນະສຸກຈໍານວນ100 ແຫ່ງ ແລະ ຊຸມຊົນຈໍານວນ250 ແຫ່ງ ໃນ 25 ເມືອງ ຂອງ7 ແຂວງ.ໂດຍຈະເສີມສ້າງຄວາມສາມາດຂອງພະນັກງານສາທາລະນະສຸກໃນການແກ້ໄຂຄວາມສ່ຽງດ້ານສຸຂະພາບທີ່ກ່ຽວຂ້ອງກັບການປ່ຽນແປງດິນຟ້າອາກາດ, ປັບປຸງພື້ນຖານໂຄງລ່າງດ້ານສາທາລະນະສຸກໃຫ້ມີຄວາມທົນທານຕໍ່ການປ່ຽນແປງດິນຟ້າອາກາດ ແລະ ປະຢັດພະລັງງານ ໃນສະຖານທີ່ບໍລິການສາທາລະນະສຸກຈໍານວນ79 ແຫ່ງ. ເພີ່ມຄວາມຮັບຮູ້ຂອງຊຸມຊົນກ່ຽວກັບຜົນກະທົບຂອງການປ່ຽນແປງດິນຟ້າອາກາດຕໍ່ສຸຂະພາບ. ພ້ອມກັນນັ້ນ, ໂຄງການຈະສ້າງຄວາມເຂັ້ມແຂງໃຫ້ແກ່ຊຸມຊົນໃນການກໍານົດບຸລິມະສິດດ້ານສຸຂະພາບ ທີ່ກ່ຽວພັນກັບການປ່ຽນແປງດິນຟ້າອາກາດ, ຂະຫຍາຍລະບົບເຕືອນໄພລ່ວງໜ້າແລະ ປັບປຸງການເຂົ້າເຖິງການບໍລິການດ້ານສຸຂະພາບໃຫ້ແກ່ປະຊາຊົນຫຼາຍກວ່າ 2.3ລ້ານຄົນໃນເຂດຊົນນະບົດທີ່ມີຄວາມສ່ຽງສູງຕໍ່ການປ່ຽນແປງດິນຟ້າອາກາດ.
ຂ່າວ: ຍຸພິນທອງ
ຄໍາເຫັນ