ສຳຜັດກັບການທ່ອງທ່ຽວທີ່ສວນໝີແພນດ້າເມືອງເສິງຕູ່

ໃນສວນດັ່ງກ່າວມີໝີແພນດ້າ ທັງໝົດ 270ໂຕ ເຊິ່ງໄດ້ມາຈາກຫຼາຍປະເທດທົ່ວໂລກເພື່ອມາອະນຸລັກໃນສະຖານທີ່ນີ້ເພື່ອຂະຫຍາຍພັນ ນອກນັ້ນຍັງໄດ້ສົ່ງອອກໄປບາງປະເທດເພື່ອການແລກປ່ຽນກັນ,ແພນດ້າມີອາຍຸຫຼາຍກວ່າ 20ປີຂຶ້ນໄປ ແລະເກີດລູກປີລະຄັ້ງ ໄລຍະການຖືພາມານຂອງແພັນດ້າປະມານ 6 ຫາ 7ເດືອນຈຶ່ງເກີດ ບາງປີກໍ່ບໍ່ມີລູກ ເຊິ່ງອາດເວົ້າໄດ້ວ່າເປັນສັດທີ່ແຜ່ຂະຫຍາຍພັນໄດ້ຍາກ.

ສຳລັບການເຂົ້າຊົມດັ່ງກ່າວແມ່ນມີຄ່າໃຊ້ຈ່າຍທີແຕກຕ່າງກັນຄື; ຜູ້ອາຍຸສູງ 60ປີຂຶ້ນໄປແມ່ນເຂົ້າຊົມແບບບໍ່ເສຍຄ່າ ແລະ ເດັກນ້ອຍຕ່ຳກວ່າ 1.20ແມັດ ແລະ ນັກຮຽນ ແມ່ນ 27ຢວນຕໍ່ຄົນ ສ່ວນຄົນທົ່ວໄປ ແລະ ໄວກາງຄົນ ແມ່ນ 55 ຢວນຕໍ່ຄົນ ແລະ ແຕ່ລະມື້ມີຄົນເຂົ້າຊົມປະມານ 80.000ຄົນ/ມື້

ເມື່ອເຂົ້າສູ່ພື້ນທີ່ຂອງສວນ ຄວາມຮູ້ສຶກອັນດັບທໍາອິດກໍ່ຄືຄວາມຊຸ່ມຊື່ນຂອງທໍາມະຊາດ. ທາງຍ່າງຊົມສວນແສນສະດວກສະດວກສະບາຍ, ສຽງຂອງຜູ້ຄົນທີ່ຢ່າງຊົມສວນແພນດ້າປະສົມປະສານກັບສາຍລົມເບົາໆ ທໍາໃຫ້ຜູ້ມາທ່ອງທ່ຽວຮູ້ສຶກວ່າໄດ້ເຂົ້າໄປຢູ່ໃນໂລກອີກໃບໜຶ່ງນັ້ນກໍຄືໂລກຂອງໝີແພນດ້າ.

ໝີແພນດ້າເປັນສັດທີ່ມີນິໃສອ່ອນໂຍນ ແລະ ບໍອັນຕະລາຍເໝືອນສັດອື່ນໆມັກຢູ່ແບບສະຫງົບແລະ ບໍ່ຢອກໃຍກັນ. ມັນກຳລັງນັ່ງກິນໄມ້ໄຜ່ແບບຊ້າໆ ດ້ວຍທ່າທາງອັນສະບາຍ ຄືວ່າບໍ່ມີສິ່ງໃດໃນໂລກທີ່ຈະຕ້ອງເຮັດໃຫ້ມັນສັບສົນວຸ້ນວາຍເມື່ອໄດ້ມາເຫັນແລ້ວຮູ້ສຶກວ່າໄດ້ພົບຄວາມສັນຕິພາບຢ່າງແທ້ຈິງເຊິ່ງເຮັດໃຫ້ຫົວໃຈຂອງຜູ້ມາຢ້ຽມຊົມຄົນອ່ອນລົງໂດຍບໍ່ຮູ້ຕົວ ຍ້ອນວ່າຄວາມໜ້າຮັກຂອງແພນດ້າທີ່ບໍ່ອາດຕ້ານທານໄດ້.

ໃນສ່ວນດັ່ງກ່າວນັກທ່ອງທ່ຽວຈະເຫັນໝີ ໂຕນ້ອຍ ແລະ ໂຕໃຫຍ່ ທີ່ກຳລັງຫຼິ້ນແລະກິນອາຫານກັບໝູ່ຂອງມັນ ແລະ ບາງໂຕກໍປີນຂຶ້ນຕົ້ນໄມ້ສູງ. ຄວາມຕະຫລົກແລະບໍລິສຸດຂອງມັນເຮັດໃຫ້ຄົນທີ່ເບິ່ງຢູ່ຕ້ອງໄດ້ທັກທາຍແລະຢິ້ມໃນໃຈແບບມີຄວາມສຸກໂດຍບໍ່ມີສິ່ງໃດມາປຽບເປີຍໄດ້. ມັນບໍ່ເປັນພຽງແຕ່ສັດປ່າທີ່ໜ້າຮັກເທົ່ານັ້ນ ແຕ່ເປັນສັນຍາລັກຂອງຄວາມອ່ອນໂຍນ ແລະ ການຢູ່ຮ່ວມກັນຢ່າງສັນຕິ.

ຫຼາຍຄົນອາດບໍ່ຮູ້ວ່າ ການດູແລເບິ່ງແຍງໝີແພນດ້ານັ້ນຍາກກວ່າທີ່ຄິດ. ໃນສວນແພນດ້າເສິງຕູ່ ທຸກຂັ້ນຕອນການລ້ຽງແມ່ນໄດ້ດູແລຢ່າງລະອຽດ: ອາຫານທີ່ແພັນດ້າກິນແມ່ນ ໜໍ່ໄມ້,ໃບໃຜ່,ລຳໄມ້ໃຜ່,ອ້ອຍ, ຫົວກ່າລົດ ແລະ ພືດຜັກ ຕ່າງໆ ແລະ ຕ້ອງມີການຝຶກໃຫ້ມັນຮູ້ຈັກປັບຕົວໃນທໍາມະຊາດ. ນັກວິທະຍາສາດ ແລະຜູ້ດູແລໝີແພນດ້າທີ່ນີ້ມີຄວາມທຸ່ມເທແລະເອົາຫົວໃຈໃສ່ແທ້ໆ ທີ່ຈະຮັກສາສັດຊະນິດນີ້ໃຫ້ຢູ່ຄູ່ໂລກໄດ້ອີກດົນນານ. ສວນແພນດ້າບໍ່ແມ່ນພຽງສະຖານທີ່ທ່ອງທ່ຽວ ແຕ່ເປັນສູນຮຽນຮູ້ການອະນຸລັກທໍາມະຊາດທີ່ມີຊີວິດຊີວາ. ນັກທ່ອງທ່ຽວສາມາດຮຽນຮູ້ກ່ຽວກັບວົງຈອນຊີວິດຂອງໝີແພນດ້າ, ການດູແລແລະການຜະລິດອາຫານຈາກໄມ້ໄຜ່, ລວມທັງບົດຮຽນກ່ຽວກັບການຮັກສາສັດປ່າທົ່ວໂລກ. ສິ່ງເຫຼົ່ານີ້ຊ່ວຍປູກຝັງຄວາມຮູ້ສຶກຮັກທໍາມະຊາດໃຫ້ແກ່ຜູ້ມາຢ້ຽມຊົມທຸກຄົນແລະການເຫັນຄຸນຄ່າຂອງສິ່ງມີຊີວິດທຸກຊະນິດ. ຖ້າຫາວ່າຜູ້ໃດທີ່ມີເງື່ອນໄຂໃນການເດີນທາງມາທ່ອງທ່ຽວຢາກໃຫ້ມາສຳຜັດເພື່ອປະສົບການໃໝ່ຂອງຊີວິດ.