 |
ໃນພິທີ, ທ່ານ ພູວົງ ກິດຕະວົງ ໄດ້ກ່າວວ່າ: ມື້ນີ້ ຄະນະຮັບຜິດຊອບລະດັບຊາດ ພ້ອມດ້ວຍການນໍາຂອງແຂວງຫົວພັນ ແລະ ແຂວງສາລະວັນ ຄະນະອົງການປົກຄອງ ນວ ແລະ 9 ເມືອງ ຕະຫຼອດຮອດປະຊາຊົນ ທຸກຊັ້ນຄົນ ນັກຮຽນທົ່ວເມືອງສີສັດຕະນາກ ໄດ້ມາເຕົ້າໂຮມກັນເຂົ້າຮ່ວມພິທີແຫ່-ແລ່ນທວນໄຟ ເພື່ອເປັນການສະໜັບສະໜູນ ແລະ ເປັນເຈົ້າພາບທີ່ດີຮ່ວມກັນໃຫ້ແກ່ງານມະຫະກໍາກິລາແຫ່ງຊາດ ຄັ້ງທີ XII ທີ່ ນວ ລະຫວ່າງວັນທີ 15-25 ພະຈິກ 2025 ຊຶ່ງຂະບວນແຫ່-ແລ່ນທວນໄຟໃນມື້ນີ້ ເປັນຄັ້ງທີ 5 ທີ່ສືບຕໍ່ຈາກເມືອງສັງທອງ, ເມືອງນາຊາຍທອງ, ເມືອງສີໂຄດຕະບອງ ແລະ ເມືອງຈັນທະບູລີ. ຈຸດປະສົງກໍເພື່ອເປັນການແຈ້ງຂ່າວ ແລະ ປຸກລະດົມ ໃຫ້ທົ່ວສັງຄົມ ປະຊາຊົນ ຊາວນະຄອນຫຼວງວຽງຈັນ ກໍຄື ບັນດາແຂວງໄດ້ຮັບຊາບ ແລະ ເປັນເຈົ້າການຮ່ວມກັນ ເປັນເຈົ້າພາບທີ່ດີ ໃນການຈັດງານແຂ່ງຂັນກິລາຄັ້ງນີ້ ໃຫ້ມີຜົນສໍາເລັດ ຕາມລະດັບຄາດໝາຍ.
ການແຫ່-ແລ່ນທວນໄຟ ຈະກາຍເປັນສັນຍາລັກແຫ່ງຄວາມສາມັກຄີ ມິດຕະພາບອັນເປັນປຶກແຜ່ນ ແລະ ຄວາມເປັນຈິດໜຶ່ງໃຈດຽວ ຂອງຄະນະນໍານັກກິລາ ແລະ ນັກກິລາຈາກບັນດາແຂວງ ໃນທົ່ວປະເທດ ພ້ອມກັນພັດທະນາວຽກງານກິລາ-ກາຍຍະກໍາ ຊຶ່ງເປັນໜຶ່ງໃນ 5 ຫຼັກມູນຂອງການສຶກສາແຫ່ງຊາດ ແລະ ສ້າງໃຫ້ໄດ້ນັກກິລາທີ່ດີເດັ່ນ ໃນວົງການກິລາລາວ ກໍຄືການສ້າງປະສົບການ ແລະ ຄວາມເຂັ້ມແຂງໃຫ້ນັກກິລາດ້ວຍຫຼາຍຮູບແບບ ຫຼາຍສີສັນ ສ້າງເງື່ອນໄຂຍົກລະດັບຄວາມສາມາດ ຂອງນັກກິລາໃຫ້ທຽບທັນກັບລະດັບພາກພື້ນ ແລະ ສາກົນ ດັ່ງຄໍາຂວັນຂອງງາານມະຫະກໍາກິລາແຫ່ງຊາດ ຄັ້ງນີ້ ທີ່ວ່າ:ສາມັກຄີ ມີວິໄນ ໂປ່ງໃສ ໄດ້ການພັດທະນາ ພ້ອມກັນນັ້ນ ກໍເພື່ອສືບຕໍ່ຊຸກຍູ້ການສ້າງຂະບວນການໃຫ້ມີລັກສະນະຕໍ່ເນື່ອງ ແລະ ຟົດຟື້ນ ທັງເປັນການຈັດງານມະຫະກໍາກິລາ-ກາຍຍະກໍາ ໃນທົ່ວປະເທດ ໃຫ້ປະສົບຜົນສໍາເລັດຢ່າງມີໝາກຜົນ ແລະ ຈົບງາມ.
 |
ຂະບວນແຫ່ ແລະ ແລ່ນທວນໄຟ ຄັ້ງນີ້ ແມ່ນໄດ້ເລີ່ມຈາກໜ້າໂຮງໝໍມະໂຫສົດ ມຸ່ງໜ້າສູ່ຫໍຫຼັກເມືອງເມືອງສີສັດຕະນາກ ນໍາພາຂະບວນແຫ່-ແລ່ນທວນໄຟເລີ່ມຈາກຈຸດທີ 1 ທ່ານ ພູວົງ ກິດຕະວົງແລ້ວມອບທວນໄຟສົ່ງຕໍ່ໃຫ້ ທ່ານ ພຸດພັນ ແກ້ວວົງໄຊ ເພື່ອນໍາຂະບວນສືບຕໍ່ແຫ່-ແລ່ນທວນໄຟ ຈາກຈຸດທີ 2 ສົ່ງຕໍ່ໃຫ້ ທ່ານ ແຫວນເພັດ ລັດດາວົງ ເພື່ອນໍາຂະບວນສືບຕໍ່ແຫ່-ແລ່ນທວນໄຟ ຈາກຈຸດທີ 3 ແລະ ສົ່ງຕໍ່ໃຫ້ທ່ານ ທິນນະກອນ ທອງຄໍາ ປະທານຄະນະກໍາມະການປົກຄອງເມືອງສີສັດຕະນາກ ຮັບ ແລະ ສົ່ງມອບໃຫ້ຄະນະຮັບຜິດຊອບ ຈັດງານມະຫະກໍາກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ 2025.
(ຂ່າວ: ຕຸໄລເພັດ ແຫຼງຂ່າວ: ວຽງຈັນໃໝ່)
ຄໍາເຫັນ