ທາງລົດໄຟເຊື່ອມຕໍ່ສອງປະເທດກະແສການທ່ອງທ່ຽວບັນເລງບົດເພັງໃໝ່: ການເປີດນຳໃຊ້ລົດໄຟຈີນ-ລາວປຽບເໝືອນການເປີດປະຕູແຫ່ງຄວາມສະດວກສະບາຍໃນການເດີນທາງຂ້າມແດນ, ບໍ່ພຽງແຕ່ຊ່ວຍໃຫ້ຜູ້ໂດຍສານຫຼຸດຄວາມອິດເມື່ອຍການເດີນທາງເທົ່ານັ້ນ,ແຕ່ຍັງຈຸດປະກາຍການທ່ອງທ່ຽວຂ້າມແດນແລະການທ່ອງທ່ຽວພາຍໃນປະເທດ, ທັງສອງໄດ້ກາຍເປັນກະແສຍອດນິຍົມທີ່ຍູ້ດັນໃຫ້ອຸດສາຫະກຳການທ່ອງທ່ຽວ ລາວ-ຈີນກ້າວສູ່ຍຸກໃໝ່ທີ່ເຕັມໄປດ້ວຍຄວາມມີຊີວິດຊີວາ, ປັດຈຸບັນນັກເດີນທາງຈຳນວນຫຼວງຫຼາຍຕ່າງກໍຫຼົງໄຫຼນຳລົດໄຟສາຍນີ້ເດີນທາງຕາມຮ່ອງຮອຍລາງເຫຼັກເພື່ອເລີ່ມຕົ້ນການພະຈົນໄພຂ້າມຊາດອັນໜ້າຕື່ນຕາຕື່ນໃຈລະຫວ່າງການເດີນທາງຍັງເພີດເພີນໄປກັບສະເໜ່ວັດທະນະທຳທີ່ເປັນເອກະລັກຂອງສອງປະເທດ, ຊົມທິວທັດທຳມະຊາດທີ່ສວຍສົດງົດງາມແລະເກັບກ່ຽວປະສົບການຂອງການເດີນທາງໃຫ້ກາຍເປັນຄວາມຊົງຈຳອັນລ້ຳຄ່າ. ອີງຕາມຂໍ້ມູນຂອງກຸ່ມລົດໄຟປແຫ່ງຊາດຈີນ (China State Railway Group ໃຫ້ຮູ້ວ່າ: ໃນປີ 2024 ທາງລົດໄຟຈີນ-ລາວໄດ້ຂົນສົ່ງຜູ້ໂດຍສານ 19.11 ລ້ານເທື່ອຄົນເພີ່ມຂຶ້ນ 15.2% ເມື່ອທຽບກັບປີ 2023, ໜ່ວຍງານຂອງລົດໄຟຈີນ-ລາວໄດ້ປັບຕົວເພື່ອຕອບສະໜອງຄວາມຕ້ອງການການເດີນທາງທີ່ເພີ່ມຂຶ້ນຢ່າງຕໍ່ເນື່ອງໂດຍເພີ່ມຂີດຄວາມສາມາດໃນການເດີນລົດແລະພັດທະນາຜະລິດຕະພັນການໂດຍສານໃຫ້ຫຼາກຫຼາຍຂຶ້ນ, ປີ 2024 ໄດ້ເປີດເດີນລົດໄຟໂດຍສານສູງເຖິງ 98 ຂະບວນຕໍ່ວັນແລະນັບແຕ່ເດືອນເມສາ 2024 ເປັນຕົ້ນມາໄດ້ເພີ່ມຂະບວນລົດໄຟໂດຍສານລະຫວ່າງປະເທດສິບສອງພັນາ-ຫຼວງພະບາງເພື່ອອຳນວຍຄວາມສະດວກແກ່ການທ່ອງທ່ຽວ, ການສຶກສາ, ການຄ້າ-ການລົງທຶນ.
ອີງຕາມເວັບໄຊທາງການຂອງແຂວງຢຸນນານໃຫ້ຮູ້ວ່າ: ປີ 2024 ຜ່ານມາ, ດ່ານບໍ່ຫານໄດ້ມີຂະບວນລົດໄຟເຂົ້າ-ອອກປະມານ 79,000 ຂະບວນ, ມີຜູ້ໂດຍສານຈາກ 100 ປະເທດແລະເຂດແຄວ້ນທີ່ເດີນທາງດ້ວຍລົດໄຟສາຍນີ້, ຂໍ້ມູນດັ່ງກ່າວໄດ້ກາຍເປັນເຄື່ອງຈັກສຳຄັນຂອງການພັດທະນາຊຸມຊົນແຫ່ງອະນາຄົດຮ່ວມຈີນ-ລາວ, ປັດຈຸບັນມີນັກທ່ອງທ່ຽວເປັນຈຳນວນຫຼວງຫຼາຍເລືອກເດີນທາງກັບລົດໄຟຂ້າມປະເທດສາຍນີ້ເພື່ອສຳພັດກັບບັນຍາກາດວັດທະນະທຳທີ່ເປັນເອກະລັກ, ຊົມທິວທັດທຳມະຊາດທີ່ສວຍສົດງົດງາມຕື່ນຕາຕື່ນໃຈແລະເກັບຄວາມຊົງຈຳອັນລ້ຳຄ່າໃນການເດີນທາງ, ໃນຂະນະທີ່ປີ 2025 ຄວາມມີຊີວິດຊີວາຂອງທາງລົດໄຟຈີນ-ລາວຍິ່ງປະກົດເດັ່ນຊັດຂຶ້ນ. ອີງຕາມຂໍ້ມູນຈາກນະຄອນຄຸນໝິງແຂວງຢຸນນານໃຫ້ຮູ້ວ່າ: ໃນ 6 ເດືອນຕົ້ນປີ 2025 ລົດໄຟຈີນ-ລາວໄດ້ຂົນສົ່ງຜູ້ໂດຍສານທະລຸ 10 ລ້ານເທື່ອຄົນໂດຍໃນປະເທດຈີນ 8.14 ລ້ານເທື່ອຄົນ, ຕ່າງປະເທດ 1.93 ລ້ານເທື່ອຄົນ, ນອກຈາກນີ້ດ້ວຍນະໂຍບາຍຍົກເວັ້ນວີຊາທຣານຊິດ 240 ຊົ່ວໂມງເຮັດໃຫ້ຄວາມຕ້ອງການການເດີນທາງຂ້າມແດນເພີ່ມສູງຂຶ້ນ, ມີຜູ້ໂດຍສານຂ້າມແດນສະສົມກວ່າ 140,000 ເທື່ອຄົນ, ການເປີດຕົວຂະບວນທ່ອງທ່ຽວແບບວົງກົມເຊັ່ນ: “ນັ່ງລົດໄຟທ່ຽວຢຸນນານ” ແລະ “ຊຽງວັ່ງເຮົ່າ” ໄດ້ຍົກລະດັບປະສົບການການເດີນທາງແລະ ສ້າງວົງແຫວນເສດຖະກິດການທ່ອງທ່ຽວຂ້າມແດນທີ່ມີເອກະລັກສະເພາະ, ປັດຈຸບັນລົດໄຟຈີນ-ລາວໄດ້ກາຍເປັນເສັ້ນທາງ “ຄຳ” ທີ່ຮ້ອນແຮງທີ່ສຸດປາຍທາງດ້ານໜຶ່ງເຊື່ອມຕໍ່ຄຸນໝິງແລະສິບສອງປັນນາ, ອີກດ້ານໜຶ່ງເຊື່ອມຕໍ່ຫຼວງພະບາງແລະນະຄອນຫຼວງວຽງຈັນ ເມືອງທ່ອງທ່ຽວສຳຄັນຂອງລາວ ດ້ວຍຂໍ້ໄດ້ປຽບດ້ານການຄົມມະນາຄົມທີ່ສະດວກສະບາຍ ແລະ ວ່ອງໄວ ບວກກັບວັດທະນະທຳທ້ອງຖິ່ນ, ຄວາມຫຼາກຫຼາຍຂອງອາຫານທີ່ລົດຊາດດີ ແລະ ທິວທັດທຳມະຊາດທີ່ສວຍສົດງົດງາມຈຶ່ງດຶງດູດໃຈນັກທ່ອງທ່ຽວທັງພາຍໃນ ແລະ ຕ່າງປະເທດຫຼັ່ງໄຫຼເຂົ້າມາຢ່າງຕໍ່ເນື່ອງ. ໃນອະນາຄົດ ລົດໄຟສາຍນີ້ ຍິ່ງມີບົດບາດສຳຄັນໃນການສົ່ງເສີມການເຊື່ອມໂຍງ ເຊື່ອມຈອດ, ການແລກປ່ຽນວັດທະນະທຳ ແລະ ຂັບເຄື່ອນການພັດທະນາເສດຖະກິດ-ສັງຄົມ ຂອງ ສປປ ລາວ.
ການວາງເສັ້ນທາງທ່ຽວທ່ຽວ “ຄຳ” ດຶງດູດກະແສນັກທ່ອງທ່ຽວທັງພາຍໃນ ແລະ ຕ່າງປະເທດ: ລົດໄຟຈີນ-ລາວ ໄດ້ເຊື່ອມໂຍງນະຄອນຄຸນໝິງ-ສິບສອງປັນນາ ແລະ ເມືອງທ່ອງທ່ຽວສຳຄັນຂອງຈີນຫຼາຍແຫ່ງ, ເມືອງເຫຼົ່ານີ້ອຸດົມສົມບູນໄປດ້ວຍຊັບພະຍາກອນທຳມະຊາດ ແລະ ຄວາມຫຼາກຫຼາຍດ້ານວັດທະນະທຳ ທີ່ສາມາດດຶງດູດນັກທ່ອງທ່ຽວຊາວຈີນຈຳນວນມະຫາສານ ແລະ ຍັງມີສະເໜ່ສາມາດດຶງດູດນັກທ່ອງທ່ຽວຕ່າງປະເທດອີກດ້ວຍ ຕົວຢ່າງ: ສິບສອງປັນນາ, ຈາກຂໍ້ມູນການທ່ອງທ່ຽວຈີນລະບຸວ່າ: ນັບແຕ່ຕົ້ນປີນີ້ ເປັນຕົ້ນມາ ຍອດການສັ່ງຈອງການເດີນທາງຂອງນັກທ່ອງທ່ຽວຈາກປະເທດອາຊຽນໄປຍັງສິບສອງປັນນາເພີ່ມຂຶ້ນຫຼາຍກວ່າ 2.5 ເທົ່າ ເມື່ອທຽບກັບປີຜ່ານມາໂດຍແມ່ນນັກທ່ອງທ່ຽວຈາກໄທ ແລະ ມາເລເຊຍ ເປັນອັນດັບຕົ້ນໆ, ການມີລົດໄຟຈີນ-ລາວທີ່ສະດວກສະບາຍ ເຮັດໃຫ້ນັກທ່ອງທ່ຽວຕ່າງຊາດສາມາດເດີນທາງໄປສິບສອງປັນນາໄດ້ງ່າຍຂຶ້ນ ເພື່ອສຳຜັດສະເໜ່ວັດທະນະທຳໄລລື້, ຊີມອາຫານພື້ນເມືອງ ແລະ ເພີດເພີນກັບທິວທັດທຳມະຊາດປ່າຝົນເຂດຮ້ອນ, ອັດຕາເຂົ້າພັກໂຮງແຮມຕາມແລວເສັ້ນທາງລົດໄຟສູງກວ່າ 85% ເຊິ່ງສະທ້ອນໃຫ້ເຫັນວ່າ ນັກທ່ອງທ່ຽວຕ່າງປະເທດຈຳນວນຫຼວງຫຼາຍ ເລືອກເດີນທາງໄປທ່ອງທ່ຽວຈີນ ຍ້ອນມີລົດໄຟຈີນ-ລາວ, ບວກກັບນະໂຍບາຍຂອງຈີນ ທີ່ຂະຫຍາຍ “ກຸ່ມປະເທດເພື່ອນມິດ ຍົກເວັ້ນວີຊາ” ແລະ ປັບນະໂຍບາຍການຜ່ານແດນປອດວີຊາໃຫ້ສະດວກຂຶ້ນ ເຮັດໃຫ້ນັກທ່ອງທ່ຽວຕ່າງປະເທດສົນໃຈເຂົ້າມາທ່ອງທ່ຽວຈີນເພີ່ມຂຶ້ນຢ່າງຕໍ່ເນື່ອງ, ລົດໄຟຈີນ-ລາວ ຈຶ່ງກາຍເປັນເສັ້ນທາງຄົມມະນາຄົມສຳຄັນສຳລັບການເດີນທາງເຂົ້າປະເທດຈີນ; ດ່ານກວດຄົນເຂົ້າ-ອອກເມືອງ ດ່ານລົດໄຟບໍ່ຫານຍັງໄດ້ເປີດ “ຊ່ອງທາງພິເສດ ສຳລັບຜູ້ໂດຍສານຜ່ານແດນປອດວີຊາ” ເພື່ອອຳນວຍຄວາມສະດວກ ແລະ ໃຫ້ຄຳແນະນຳແກ່ນັກທ່ອງທ່ຽວຕ່າງປະເທດທີ່ເຂົ້າເງື່ອນໄຂຢ່າງທັນເວລາ ເຮັດໃຫ້ການເດີນທາງຂ້າມແດນເປັນໄປຢ່າງວ່ອງໄວ, ການເປີດນຳໃຊ້ລົດໄຟຈີນ-ລາວ ບໍ່ພຽງແຕ່ດຶງດູດນັກທ່ອງທ່ຽວຕ່າງປະເທດຈຳນວນມະຫາສານເດີນທາງເຂົ້າຈີນເທົ່ານັ້ນ ແຕ່ຍັງມີບົດບາດສຳຄັນໃນການສົ່ງເສີມ, ການແລກປ່ຽນການທ່ອງທ່ຽວລະຫວ່າງປະເທດ ແລະ ຂັບເຄື່ອນຕະຫຼາດທ່ອງທ່ຽວຈີນໃຫ້ຂະຫຍາຍຕົວຂຶ້ນນັບມື້.
ທາງລົດໄຟຈີນ-ລາວແມ່ນຄວາມສຳພັນສອງຝ່າຍທີ່ຂ້າມພູຜາ ຜ່ານແມ່ນ້ຳ: ບໍ່ພຽງແຕ່ເປັນການມອບພະລັງຂັບເຄື່ອນການພັດທະນາທີ່ເຂັ້ມແຂງແກ່ສປປລາວແຕ່ຍັງເປີດກວ້າງໂອກາດການຮ່ວມມືແລະການແລກປ່ຽນກັບສປຈີນເຮັດໃຫ້ສອງປະເທດໄດ້ແບ່ງປັນໂອກາດພາຍໃຕ້ຄວາມໄດ້ປຽບທີ່ສົ່ງເສີມເຊິ່ງກັນແລະກັນ, ກ່ອນໜ້ານີ້ ປະເທດລາວມີພູມີປະເທດເປັນພູຜາຄ້ອຍຊັນສະຫຼັບຊັບຊ້ອນແລະລະບົບຄົມມະນາຄົມຂ້ອນຂ້າງອ່ອນນ້ອຍຈົນກາຍເປັນປະເທດແລນລ໊ອກ, ການພັດທະນາເສດຖະກິດ-ສັງຄົມຈຶ່ງມີຂໍ້ຈຳກັດ, ແຕ່ເມື່ອເປີດນຳໃຊ້ທາງລົດໄຟຈີນ-ລາວໄດ້ເປີດສັງກາດໃໝ່ກາຍເປັນປະເທດເຊື່ອມໂຍງເຊື່ອມຈອດກັບພາກພື້ນແລະສາກົນໂດຍສະເພາະແມ່ນການຂົນສົ່ງສິນຄ້າຂ້າມແດນ, ການທ່ອງທ່ຽວໄດ້ກາຍເປັນກະແສເຮັດໃຫ້ເມືອງທ່ອງທ່ຽວຂອງລາວເຊັ່ນ: ຫຼວງພະບາງອາໄສກະແສນັກທ່ອງທ່ຽວທີ່ຫຼັ່ງໄຫຼເຂົ້າມາຈຳນວນມະຫາສານພ້ອມລົດໄຟ, ໂຮງແຮມ, ຮ້ານອາຫານ, ຕະຫຼາດຫັດຖະກຳທ້ອງຖິ່ນເຕີບໂຕຢ່າງໄວວາປະຊາຊົນລາວຈຳນວນບໍ່ໜ້ອຍມີລາຍຮັບຈາກການບໍລິການການທ່ອງທ່ຽວຊ່ວຍຍົກລະດັບຊີວິດການເປັນຢູ່ໃຫ້ດີຂຶ້ນຢ່າງເຫັນໄດ້ຊັດເຈນ. ທາງລົດໄຟສາຍນີ້ບໍ່ພຽງແຕ່ຫຍໍ້ໄລຍະທາງແລະເວລາການເດີນທາງລົງເທົ່ານັ້ນ ແຕ່ຍັງເຮັດໃຫ້ ສປປ ລາວ ເຊື່ອມໂຍງ ເຊື່ອມຈອດກັບພາກພື້ນ ແລະ ສາກົນຍິ່ງຂຶ້ນ, ຊາວໜຸ່ມລາວ ສາມາດຂີ່ລົດໄຟໄປສຶກສາຮຽນຮູ້ການກະເສດສະໄໝໃໝ່ ແລະ ເສດຖະກິດດີຈີຕ໋ອນໃນຈີນ; ໃນຂະນະທີ່ສະຖານທີ່ທ່ອງທ່ຽວສຳຄັນຂອງລາວ ກໍມີນັກທ່ອງທ່ຽວຈາກຫຼາຍປະເທດເດີນທາງມາສຳຜັດກັບທຳມະຊາດ, ປະຫວັດສາດ ແລະ ວັດທະນະທຳຂອງລາວເປັນຈຳນວນຫຼວງຫຼາຍ. ສຳລັບບລົດໄຟຈີນ-ລາວແມ່ນຜົນລັບສຳຄັນຂອງການຮ່ວມມືກັບອາຊີຕາເວັນອອກສ່ຽງໃຕ້ ແລະ ເປັນການປະຕິບັດຕົວຈິງຂອງຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ທີ່ນຳຜົນປະໂຫຍດຮອບດ້ານຢ່າງເປັນຮູບປະທຳ.
ເສັ້ນທາງ “ຄຳ” ຍູ້ໜູນການຄ້າ, ຮ່ວມສ້າງໂອກາດໃໝ່ແຫ່ງການພັດທະນາ: ສິນຄ້າເຄື່ອງກົນຈັກເອເລັກໂຕຣນິກ ແລະ ຜະລິດຕະພັນອຸດສາຫະກຳເບົາຂອງຈີນ ໄດ້ສົ່ງເຂົ້າສູ່ຕະຫຼາດລາວຢ່າງຕໍ່ເນື່ອງໂດຍຜ່ານລົດໄຟຈີນ-ລາວ, ລາວ-ຈີນ, ໃນຂະນະດຽວການກໍໄດ້ສ້າງຄວາມສະດວກແກ່ການລົງທຶນ ແລະ ຜູ້ປະກອບກິດຈະການຂອງບໍລິສັດຈີນໃນລາວ ສົ່ງເສີມການຂະຫຍາຍຕ່ອງໂສ້ອຸດສາຫະກຳຂ້າມແດນ ເຮັດໃຫ້ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ. ສໍາລັບການທ່ອງທ່ຽວ ແລ ການແລກປ່ຽນວັດທະນະທຳ, ລົດໄຟລາວ-ຈີນ ໄດ້ເຮັດໃຫ້ນັກທ່ອງທ່ຽວຈີນເດີນທາງເຂົ້າມາລາວໄດ້ງ່າຍ ແລະ ໄວຂຶ້ນ “ການທ່ອງທ່ຽວຂ້າມແດນແບບພ້ອມອອກເດີນທາງທັນທີ” ກາຍເປັນຈິງ, ບໍ່ພຽງແຕ່ເພີ່ມທາງເລືອກໃຫ້ແກ່ປະຊາຊົນຈີນເທົ່ານັ້ນ ແຕ່ຍັງເພີ່ມໂອກາດການເຜີຍແຜ່ວັດທະນະທຳຈີນສູ່ສາຍຕາຊາວຕ່າງປະເທດອີກດ້ວຍ ເມື່ອນັກທ່ອງທ່ຽວຈີນ ນຳສັນຍາລັກທາງວັດທະນະທຳ ເຊັ່ນ: ໜ້າກາກງິ້ວຈີນ ຜົນງານການປະດິດຕົວອັກສອນເຂົ້າສູ່ລາວ ແລະ ເມື່ອຊາຜູເອີ້, ຜ້າໄໝໄທລື້ ຈາກແຂວງຢຸນນານ ໄດ້ມາປະຊັນຄວາມງົດງາມກັບດອກຈຳປາລາວ ແລະ ງານຈັກສານຈາກເຖົາວັນຂອງລາວ, ວັດທະນະທຳທັງສອງຊາດກໍຫຼໍ່ລ້ຽງເຊິ່ງກັນ ແລະ ກັນ ຜ່ານການແລກປ່ຽນ, ໃນຂະນະດຽວກັນ ຈີນຍັງດຶງດູດຊາວລາວ ໃຫ້ເຂົ້າໄປສຳຜັດພະລັງແຫ່ງການພັດທະນາ ແລະ ວັດທະນະທຳອັນຫຼາກຫຼາຍຂອງຈີນຜ່ານລົດໄຟ ເສີມສ້າງຄວາມເຂົ້າໃຈ ແລະ ມິດຕະພາບຂອງປະຊາຊົນສອງປະເທດໃຫ້ແໜ້ນແຟ້ນຍິ່ງໆຂຶ້ນ.
ຫາກເບິ່ງໄປອະນາຄົດຂ້າງໜ້າ, ທາງລົດໄຟຈີນ-ລາວ ຈະເຮັດໃຫ້ການຮ່ວມມື ລາວ-ຈີນ ຍິ່ງຈະເຂົ້າສູ່ທາງເລິກ ແລະ ທາງກວ້າງຍິ່ງໆຂຶ້ນ, ພ້ອມກັບການຂັບເຄື່ອນຂໍ້ລິເລີ່ມ "ໜຶ່ງແລວ ໜຶ່ງເສັ້ນທາງ” ການຮ່ວມມືລະຫວ່າງຈີນ ແລະ ລາວດ້ານເສດຖະກິດ-ການຄ້າ, ການລົງທຶນ, ວັດທະນະທຳ, ການສຶກສາ, ເຕັກໂນໂລຊີ ຈະເລິກເຊິ່ງຍິ່ງໆຂຶ້ນ. ລົດໄຟຈີນ-ລາວ, ໃນຖານະມັງກອນເຫຼັກສາຍຍາວ ຈະຍົກສູງສັກກະຍະພາບດ້ານການທ່ອງທ່ຽວ, ການຄ້າ, ແລກປ່ຽນວັດທະນະທຳ, ກາຍເປັນເຄື່ອງຈັກສຳຄັນໃນການພັດທະນາຊຸມຊົນແຫ່ງອະນາຄົດຮ່ວມ ຈີນ-ລາວ ໂດຍສະເພາະການທ່ອງທ່ຽວ, ສອງປະເທດຈະສົ່ງເສີມການຮ່ວມມືຢ່າງຕໍ່ເນື່ອງ, ຮ່ວມພັດທະນາຊັບພະຍາກອນດ້ານການທ່ອງທ່ຽວ, ຂຸດຄົ້ນທ່າແຮງ ຄວາມງົດງາມຕາມແລວເສັ້ນທາງລົດໄຟ ເຊື່ອມໂຍງກັບສະຖານທີ່ທ່ອງທ່ຽວສຳຄັນ ເຊັ່ນ: ທະເລສາບຕຽນຊື່ຂອງຄຸນໝິງ, ປ່າຝົນສິບສອງປັນນາ ແລະ ວັດບູຮານ ນະຄອນຫຼວງພະບາງ ເພື່ອສ້າງຜະລິດຕະພັນ ແລະ ເສັ້ນທາງທ່ອງທ່ຽວຂ້າມແດນແບບ “ໜຶ່ງເສັ້ນທາງ ຫຼາຍຈຸດໝາຍ" ນັກທ່ອງທ່ຽວສາມາດສຳຜັດກັບເທດສະການຫົດນ້ຳຂອງເຜົ່າໄທລື້ ແລະ ເທດສະການສຳຄັນຂອງລາວໄດ້ໃນຂະບວນລົດໄຟ, ນອກຈາກນີ້ ສອງປະເທດຍັງຈະສົ່ງເສີມການຄຸ້ມຄອງຕະຫຼາດທ່ອງທ່ຽວ, ຍົກລະດັບຄຸນນະພາບການບໍລິການ ແລະ ນຳໃຊ້ລະບົບດ່ານອັດສະລິຍະ ເຮັດໃຫ້ການເດີນທາງສະດວກຄືກັນກັບ “ໄປຢ້ຽມຢາມບ້ານເພື່ອນ” ດ້ວຍການຮ່ວມກັນເຮັດທຸກວິທີທາງ ເພື່ອໃຫ້ນັກທ່ອງທ່ຽວມີຄວາມປອດໄພ, ສະດວກສະບາຍ ແລະ ວ່ອງໄວ, ເສັ້ນທາງທ່ອງທ່ຽວ “ຄຳ” ສາຍນີ້ ປຽບເໝືອນໂຄງຂ່າຍຂະໜາດໃຫຍ່ ທີ່ແຜ່ລັດສະໝີໄປຍັງພື້ນທີ່ໃກ້ຄຽງ, ສົ່ງເສີມ, ການປະສານຢ່າງເລິກເຊິ່ງຂອງວົງຈອນທ່ອງທ່ຽວໃນພູມີພາກອິນດູຈີນ, ສົ່ງເສີມການຮ່ວມມືດ້ານການທ່ອງທ່ຽວລະດັບພາກພື້ນ ເຮັດໃຫ້ “ນັ່ງລົດໄຟທ່ຽວອາຊຽນ” ກາຍເປັນເລື່ອງປົກະຕິ ແລະ ຂະຫຍາຍຕະຫຼາດທ່ອງທ່ຽວໃຫຍ່ຂຶ້ນ ດ້ວຍການຮ່ວມມືຈາກລັດຖະບານ ແລະ ປະຊາຊົນສອງປະເທດ ຈີນ-ລາວ; ລົດໄຟຈີນ-ລາວ ຈະເຕີບໂຕເປັນສາຍເສດຖະກິດທີ່ເຊື່ອມໂຍງຄວາມຈະເລີນ ແລະ ເປັນຂົວຕໍ່ການແລກປ່ຽນວັດທະນະທຳທີ່ເຊື່ອມໃຈຜູ້ຄົນເຕີມພະລັງແບບບໍ່ຮູຈົບໃຫ້ຊຸມຊົນແຫ່ງອະນາຄົດຮ່ວມຈີນ-ລາວ ແລະ ຜົນໄດ້ຮັບຂອງການພັດທະນາ ຈະຫຼໍ່ລ້ຽງປະຊາຊົນສອງຝ່າຍ ຄ້າຍຄືກັນກັບສາຍນ້ຳຂອງທີ່ໃສເຢັນ ຮ່ວມກັນສ້າງອະນາຄົດທີ່ສົດໄສຍິ່ງໆຂຶ້ນ.
ຄໍາເຫັນ