ຫຼວງນໍ້າທາ ຈັດກິດຈະກໍາແຂ່ງຂັນແລ່ນເພື່ອສຸຂະພາບ

ເມື່ອບໍ່ດົນມານີ້ ທີ່ແຂວງຫຼວງນໍ້າທາ ບໍລິສັດ ເອັມເອສພັດທະນາການລົງທຶນຈໍາກັດ ຮ່ວມກັບອົງການປົກຄອງແຂວງ ຈັດພິທີແຂ່ງຂັນແລ່ນເພື່ອສຸຂະພາບ ໂດຍມີທ່ານ ອ່ອນຈັນ ຄໍາພາວົງ ຮອງເຈົ້າແຂວງຫຼວງນໍ້າທາ, ທ່ານ ບຸນຄົງ ພິມມະສອນ ຮອງເລຂາພັກເມືອງ ປະທານກວດກາພັກຫົວໜ້າອົງການກວດກາລັດເມືອງ, ສະມາຊິກສະພາປະຊາຊົນແຂວງ, ມີບັນດາພະແນກການອ້ອມຂ້າງແຂວງ, ນັກທຸລະກິດ, ພາກສ່ວນທີ່ກ່ຽວຂ້ອງ ແລະ ນັກກິລາເຂົ້າຮ່ວມ.
    ທ່ານ ອ່ອນຈັນ ຄໍາພາວົງ ໄດ້ມີຄໍາເຫັນກ່າວເປີດພິທີວ່າ: ການແຂ່ງຂັນແລ່ນ ເພື່ອສຸຂະພາບຄັ້ງນີ້ ເພື່ອສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ວັນເກີດຂອງປະທານຄໍາໄຕ ສີພັນດອນ ຄົບຮອບ 100 ປີ ພ້ອມທັງຮຽກຮ້ອງມາຍັງທຸກສ່ວນ ຈົ່ງພ້ອມກັນສະເຫຼີມສະຫຼອງ ແລະ ສ້າງຂະບວນການໃຫ້ມີບັນຍາກາດຟົດຟື້ນມ່ວນຊື່ນ ເພື່ອເປັນການລະນຶກເຖິງມູນເຊື້ອປະຫວັດສາດຂອງພັກ, ຂອງຊາດ ພ້ອມທັງ ກ່າວສະແດງຄວາມຊົມເຊີຍມາຍັງຄະນະຮັບຜິດຊອບ ແລະ ນັກກິລາທຸກພາກສ່ວນທີ່ໄດ້ເຂົ້າຮ່ວມການແຂ່ງຂັນຢ່າງຕັ້ງໜ້າ ແລະ ສະໜິິດສະໜົມມີຄວາມສາມັກຄີຮັກແພງ ລະຫວ່າງນັກກິລາພາຍໃນ ແລະ ຕ່າງແຂວງ. 
    ການແຂ່ງຂັນມີນັກກິລາເຂົ້າຮ່ວມ ທັງໝົດ 126 ຄົນຍິງ 32 ຄົນແບ່ງອອກເປັນ 2 ປະເພດ: ຮຸ່ນອາວຸໂສ 38 ປີຂຶ້ນໄປ, ຮຸ່ນທົ່ວໄປຍິງ-ຊາຍ ແລ່ນໄລຍະທາງ 7 ກິໂລແມັດ ຕາມເສັ້ນທາງຫຼວງ 17 A ຂ້າງສະໜາມບິນ. ຜ່ານການແຂ່ງຂັນ ຜົນປະກົດວ່າ: ຮຸ່ນອາວຸໂສ ທີ1 ທ້າວ ຮັກດີ ແພງພັນຈິດ ມາຈາກເມືອງນາແລ, ທີ2 ທ້າວ ສີຈັນ ມາຈາກກອງບັນຊາການທະຫານແຂວງ ແລະ ທີ 3 ໄດ້ແກ່ທ້າວ ກົງໃຈ ມາຈາກຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ,  ຮຸ່ນທົ່ວໄປຍິງທີ1ທ່ານ ນາງ ຈັນສຸກ ມາຈາກແຂວງອຸດົມໄຊ, ທີ 2 ນາງ  ເມີຍ  ມາຈາກບ້ານວຽງເໜືອ ແລະ ທີ 3 ໄດ້ແກ່ນາງ ວິນດິດາ ມາຈາກ ມ.ສ ເທດສະບານແຂວງ ແລະ ຮຸ່ນທົ່ວໄປຊາຍ ທີ1 ທ້າວ ສຸລິຍາ ສຸນັນທະວົງ ມາຈາກໂຮງຮຽນ ພອນສະຫວັນ ນະຄອນຫຼວງວຽງຈັນ, ທີ2 ທ້າວ ສົມຕຸ້ຍ ນໍລະດີ  ມາຈາກພະແນກອຸດສາຫະກໍາ ແລະ ການຄ້າແຂວງ ແລະ ທີ 3 ໄດ້ແກ່ທ້າວ ຍອມຄໍາ ໄລປະເສີດ ມາຈາກ ມ.ສ ສາມັກຄີ ການແຂ່ງຂັນແລ່ນທັງ 2 ປະເພດ ທີ1ໄດ້ຮັບຂັນ 1ໜ່ວຍ ພ້ອມເງິນລາງ2 ລ້ານກີບ, ທີ2 ໄດ້ຮັບຂັນ 1ໜ່ວຍ ພ້ອມເງິນລາງ1 ລ້ານ 5 ແສນກີບ ແລະ ທີ 3 ໄດ້ຮັບເງິນລາງ1 ລ້ານກີບ.
ຂ່າວ-ພາບ: ແຂວງ ຫຼວງນໍ້າທາ