ວຽກງານສົ່ງເສີມການຜະລິດກະສິກໍາແບບຍືນຍົງໂດຍບໍ່ທຳລາຍປ່າໄມ້ ພາຍໃຕ້ໂຄງການ ຜັນຂະຫຍາຍການຈັດຕັ້ງປະຕິບັດ ແຜນງານຫຼຸດຜ່ອນການປ່ອຍທາດອາຍເຮືອນແກ້ວ ໂດຍການຄຸ້ມຄອງພູມີທັດປ່າໄມ້ແບບຍືນຍົງຢູ່ ສປປ ລາວ ໂດຍການເປັນປະທານຂອງທ່ານ ສອນໄຊ ອຸດົມ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ມີສຳມະນາກອນຈາກແຂວງຫຼວງພະບາງ, ແຂວງຫຼວງນ້ຳທາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຊຸດຝຶກອົບຮົມໃນຄັ້ງນີ້, ເປັນການຜັນຂະຫຍາຍການຈັດຕັ້ງປະຕິບັດແຜນງານຫຼຸດຜ່ອນທາດອາຍເຮືອນແກ້ວໂດຍການຄຸ້ມຄອງພູມີທັດປ່າໄມ້ ແບບຍືນຍົງ ຢູ່ ສປປ ລາວ ແມ່ນໂຄງການໄລຍະທີ່ 2 ສືບຕໍ່ຈາກໂຄງການຈັດຕັ້ງປະຕິບັດການຄຸ້ມຄອງປ່າໄມ້ແບບພູມີທັດ ແລະ ສົ່ງເສີມຊີວິດການເປັນຢູ່ ຊຶ່ງເປັນໂຄງການປົກປັກຮັກສາປ່າໄມ້ ທີ່ໄດ້ຮັບທຶນຈາກກອງທຶນດິນຟ້າອາກາດ ຂອງສະຫະພັນເຢຍລະມັນ. ຊຶ່ງໂຄງການແມ່ນໄດ້ແນ່ໃສ່ການຫຼຸດຜ່ອນການປ່ອຍທາດອາຍເຮືອນແກ້ວຈາກການປ່ຽນແປງການນໍາໃຊ້ທີ່ດິນທີ່ບໍ່ຖຶກວິທີ ແລະ ຈາກການທຳລາຍປ່າໄມ້ ຊຶ່ງໄດ້ຈັດຕັ້ງປະຕິບັດຢູ່ 6 ແຂວງພາກເໜືອຂອງ ສປປ ລາວ ຄື: ແຂວງຫົວພັນ, ຫຼວງພະບາງ, ໄຊຍະບູລີ, ອຸດົມໄຊ, ຫຼວງນໍ້າທາ ແລະ ແຂວງ ບໍ່ແກ້ວ. ວຽກງານສົ່ງເສີມກະສິກຳແບບຍືນຍົງ ໂດຍບໍ່ທຳລາຍປ່າໄມ້.
ການຝຶກອົບຮົມດັ່ງກ່າວ, ແມ່ນເພື່ອສ້າງຄວາມອາດສາມາດ, ສ້າງຄວາມເຂັ້ມແຂງໃຫ້ແກ່ທີມງານສົ່ງເສີມ ໃຫ້ມີຄວາມເຂົ້າໃຈແຈ້ງ ກ່ຽວກັບຂະບວນການ, ຂັ້ນຕອນ ແລະ ວິທີການຈັດຕັ້ງປະຕິບັດວຽກງານ ແມ່ນຈະໄດ້ສູມໃສ່ການຊຸກຍູ້ສົ່ງເສີມ ແລະ ສ້າງຄວາມເຂົ້າໃຈກ່ຽວກັບການຜະລິດ ແບບຍືນຍົງ.
ຝືກອົບຮົມຄັ້ງນີ້, ສໍາມະນາກອນຈະໄດ້ຮຽນຮູ້ອົງປະກອບຂອງໂຄງການພີຊອບ, ເຕັກນິກ,ຮູບແບບການສົ່ງເສີມ, ການວາງແຜນ,ການກະກຽມຄວາມພ້ອມ, ການເກັບກໍາຂໍ້ມູນ, ການສໍາຫຼວດ, ການກວດກາ,ການປະກອບເອກະສານ, ທັກສະການສືກສາຊາວກະສິກອນ, ການຈັດສັນງົບປະມານ ພ້ອມນັ້ນຍັງໄດ້ສົນທະນາແລກປ່ຽນຫຼາຍບັນຫາກ່ຽວກັບວຽກງານສົ່ງເສີມການຜະລິດກະສິກໍາແບບຍືນຍົງໂດຍບໍ່ທຳລາຍປ່າໄມ້.
(ຂ່າວ: ອຸ້ມ ສົມນໍວັນ)
ຄໍາເຫັນ