ໄດ້ຈັດກອງປະຊຸມຜ່ານຮ່າງແຜນດໍາເນີນບຸນນະມັດສະການ ແລະ ປະກາດຮັບຮອງພະທາດຫຼວງຈຽງຕຶງເປັນມໍລະດົກແຫ່ງຊາດ ເພື່ອສົ່ງເສີມປີທ່ອງທ່ຽວລາວ 2024. ໂດຍການເປັນປະທານຂອງທ່ານ ສີວິໄລ ປັນແກ້ວ ຮອງເຈົ້າແຂວງໆຫຼວງນໍ້າທາ, ທ່ານ ສີສຸພັນ ທໍາປັນຍາ ຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ມີຕາງໜ້າພະແນກທີ່ກ່ຽວຂ້ອງ ເຂົ້າຮ່ວມ.
ທ່ານ ສົມສະຫວາດ ນາມອິນທາ ຮອງຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ໄດ້ຜ່ານຮ່າງແຜນດໍາເນີນບຸນນະມັດສະການ ແລະ ປະກາດຮັບຮອງພະທາດຫຼວງຈຽງຕຶງເປັນມໍລະດົກແຫ່ງຊາດ ເພື່ອສົ່ງເສີມປີທ່ອງທ່ຽວລາວ 2024. ທັງນີ້ ກໍເພື່ອເປັນການປຶກສາຫາລືກ່ຽວກັບການປະຕິບັດຕາມວາລະເຄື່ອນໄຫວຂອງບຸນນະມັດສະການພະທາດຫຼວງຈຽງຕຶງ ເພື່ອສົ່ງເສີມປີທ່ອງທ່ຽວລາວ 2024 ທັງເປັນກິດຈະກໍາລະດັບຊາດ ພ້ອມທັງປະກາດພະທາດຫຼວງຈຽງຕຶງເປັນມໍລະດົກແຫ່ງຊາດລະດັບທ້ອງຖີ່ນ ຊຶ່ງຈະໄດ້ຈັດຂຶ້ນໃນ ລະຫວ່າງ ວັນທີ 9-15 ພະຈິກ 2024. ດັ່ງນັ້ນ, ຄະນະຮັບຜິດຊອບກະກຽມຈັດບຸນນະມັດສະການພະທາດຫຼວງຈຽງຕຶງ ຈຶ່ງໄດ້ສ້າງວາລະການເຄື່ອນໄຫວ ແລະ ແຜນດໍາເນີນງານວາງສະແດງສິນຄ້າ, ຕະຫຼາດນັດ, ຂາຍເຄື່ອງທົ່ວໄປ, ເຄື່ອງຫຼີ້ນເດັກນ້ອຍ, ແຂ່ງຂັນບານເຕະ ຊິງຂັນທ່ານເຈົ້າແຂວງ, ແຂ່ງຂັນກະຕໍ້ຫວາຍ ຊິງຂັນທ່ານເຈົ້າເມືອງ, ວາງສະແດງສິ້ນຄ້າ ຫັດຖະກໍາຂອງບັນດາເຜົ່າ, ສິ້ນຄ້າໂອດ໋ອບຂອງເມືອງ ແລະ ອາຫານທ້ອງຖີ່ນ, ສະແດງສິລະປະວັນນະຄະດີຂອງບັນດາໜ່ວຍ ແລະ ເດີນແບບອາພອນເຜົ່າ 13 ຊົນເຜົ່າ ພ້ອມທັງມີການຕັກບາດ - ຖວາຍສັງຄະທານ ແລະ ອີກຫຼາຍກິດຈະກໍາຢູ່ພາຍໃນບຸນ.
ໂອກາດນີ້, ຜູ້ເຂົ້າຮ່ວມກອງປະຊຸມຍັງໄດ້ປະກອບຄໍາຄິດຄໍາເຫັນເພື່ອເປັນການແລກປ່ຽນ ເປັນຕົ້ນດ້ານງົບປະມານ, ການແບ່ງໜ້າທີ່ຄວາມຮັບຜິດຊອບແຕ່ລະຂະແໜງການ ເພື່ອເຮັດໃຫ້ຮ່າງແຜນດໍາເນີນບຸນນະມັດສະການ ແລະ ປະກາດຮັບຮອງພະທາດຫຼວງຈຽງຕຶງເປັນມໍລະດົກແຫ່ງຊາດ ມີເນື້ອໃນຄົບຖ້ວນ.
(ຂ່າວ: ອຸ້ມ ສົມນໍວັນ)
ຄໍາເຫັນ