ການລົງເຄື່ອນໄຫວຄັ້ງນີ້, ນຳພາໂດຍທ່ານ ເພັດສະຫວັນ ຈິດດາລາ ຮອງຫົວໜ້າພະແນກ ວັດທະນະທໍາ ແລະ ການທ່ອງທ່ຽວແຂວງ, ທ່ານ ສິດປະເສີດ ພົງຈະເລີນ ຫົວໜ້າພະແນກຄຸ້ມຄອງ ມໍລະດົກສະຖານ (ກົມມໍລະດົກ), ກະຊວງວັດທະນະທໍາ ແລະ ການທ່ອງທ່ຽວ ໂດຍມີພາກສ່ວນ ທີ່ກ່ຽວຂ້ອງ ເຂົ້າຮ່ວມ.
ການລົງເກັບກຳຂໍ້ມູນຄັ້ງນີ້, ແມ່ນປະຕິບັດຕາມຂໍ້ຕົກລົງຂອງຫົວໜ້າພະແນກ ວັດທະນະທໍາ ແລະ ການທ່ອງທ່ຽວ ແຂວງຫຼວງນ້ຳທາ ສະບັບເລກທີ 378/ວທຂ, ລົງວັນທີ 19 ມີນາ 2026 ວ່າດ້ວຍການແຕ່ງຕັ້ງພະນັກງານລົງເຮັດວຽກເກັບກຳຂໍ້ມູນປະຫວັດພະທາດປຸມປຸກ. ໃນໂອກາດດັ່ງກ່າວ, ຄະນະກຳມະການທີ່ກ່ຽວຂ້ອງໄດ້ຮ່ວມກັນປຶກສາຫາລື ແລະ ເປັນເອກະພາບກັນ ໃນການຈັດຕັ້ງປະຕິບັດວຽກງານ ໂດຍສະເພາະແມ່ນ ການຮິບໂຮມຂໍ້ມູນ ປະຫວັດຄວາມເປັນມາ ຂອງພະທາດ ໃຫ້ມີຄວາມລະອຽດ, ຖືກຕ້ອງ ແລະ ຊັດເຈນ ເພື່ອປະກອບເຂົ້າໃນສຳນວນເອກະສານ ກຽມສະເໜີພະທາດປຸມປຸກ ກາຍເປັນມໍລະດົກແຫ່ງຊາດ ລະດັບທ້ອງຖິ່ນໃນຕໍ່ໜ້າ.
ສຳລັບ “ພະທາດປຸມປຸກ” ແມ່ນໜຶ່ງໃນປູຊະນີຍະສະຖານອັນເກົ່າແກ່ ແລະ ເປັນທີ່ເຄົາ ລົບສັກກາລະບູຊາຂອງຊາວເມືອງຫຼວງນໍ້າທາ. ຕາມປະຫວັດສາດບັນທຶກໄວ້ວ່າ: ພະທາດອົງນີ້ ສ້າງຂຶ້ນຄັ້ງທໍາອິດໃນປີ ຄ.ສ 1628 ໂດຍແມ່ນ ທ່ານ ສີສຸໂທທະນະ ທໍາມິກະລາດ ເປັນຜູ້ສ້າງ; ມາຮອດປີ 1957 ໄດ້ມີການປັບປຸງບູລະນະຄືນໃໝ່ ຊຶ່ງໃຊ້ເວລາເຖິງ 4 ປີ ຈຶ່ງສໍາເລັດ. ແຕ່ໜ້າ ເສຍດາຍ, ຕົກມາຮອດປີ 1965 ພວກລ່າເມືອງຂຶ້ນແບບໃໝ່ ໄດ້ໃຊ້ຍົນຖິ້ມລະເບີດທໍາລາຍ ເຮັດໃຫ້ພະທາດພັງທະລາຍລົງ. ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນໃນປີ 1975, ພັກ-ລັດ ໄດ້ມີນະໂຍບາຍໃຫ້ປັບປຸງຟື້ນຟູວັດຖຸບູຮານ ແລະ ປູຊະນີຍະສະຖານອັນເກົ່າແກ່ຄືນໃໝ່. ດັ່ງນັ້ນ, ໃນປີ 2000 ອົງການປົກຄອງແຂວງ, ເມືອງ ແລະ ອົງການປົກຄອງ 9 ໝູ່ບ້ານ ໃນເຂດທົ່ງພຽງເມືອງຫຼວງນໍ້າທາ ພ້ອມດ້ວຍອອກຕົນຍາດໂຍມ ຊາວພຸດທະສາສະນິກະຊົນ ທັງພາຍໃນ ແລະ ຕ່າງປະເທດ ໄດ້ພ້ອມກັນປະກອບສ່ວນບູລະນະກໍ່ສ້າງພະທາດປຸມປຸກຄືນໃໝ່ ຈົນສໍາເລັດໃນປີ 2003 ແລະ ໄດ້ຢືນຍົງເປັນສູນລວມຈິດໃຈສັກກະລະບູຊາຂອງຊາວເມືອງ ຫຼວງນໍ້າທາ ຈົນເຖິງປັດຈຸບັນ.
(ແຫຼ່ງຂ່າວ: ແຂວງຫຼວງນໍ້າທາ)
ຄໍາເຫັນ