ຫຼວງນໍ້າທາ ເຜີຍແຜ່ ເອກະສານການເລືອກຕັ້ງສສຊ ຊຸດທີ X ແລະ ສສຂ ຊຸດທີ V

ທ່ານ ບຸນຄົງ ພິມມະສອນ ກໍາມະການພັກແຂວງ ເລຂາຄະນະບໍລິຫານງານພັກເມືອງ ປະທານຄະນະກໍາມະການເລືອກຕັ້ງຂັ້ນເມືອງ ໄດ້ລາຍງານການກະກຽມເລືອກຕັ້ງສສຊ ຊຸດທີ X ແລະ ສສຂ ຊຸດທີ V ຂັ້ນເມືອງຫຼວງນໍ້າທາ ປະກອບມີ 5 ອະນຸກຳມະການ.ໃນນັ້ນ, ໄດ້ສຳເລັດການກຳນົດໜ່ວຍປ່ອນບັດເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຈໍານວນ 97 ໜ່ວຍປ່ອນບັດເລືອກຕັ້ງ; ສຳເລັດ ການເກັບກໍາສະຖິຕິພົນລະເມືອງ ແລະ ຜູ້ມີສິດປ່ອນບັດເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V; ຈຳນວນພົນລະເມືອງທັງໝົດມີ 68,190 ຄົນຍິງ 33,911 ຄົນ, ຈຳນວນຜູ້ມີສິດປ່ອນບັດເລືອກຕັ້ງ (ຕາມສໍາມະໂນຄົວ) ມີ 41,544 ຄົນຍິງ 20,457 ຄົນ, ຜູ້ທີ່ສາມາດປ່ອນບັດເລືອກຕັ້ງຢູ່ໜ່ວຍຂອງຕົນ (ຕາມສໍາມະໂນຄົວ) 39,101 ຄົນຍິງ 19,153 ຄົນ, ຜູ້ມີສີດປ່ອນບັດເລືອກຕັ້ງຢູ່ທ້ອງຖິ່ນອື່ນ (ຕາມສໍາມະໂນຄົວ) 1,859 ຄົນຍິງ 934 ຍິງ;

ກອງປະຊຸມ ຍັງໄດ້ເຜີຍແຜ່ເຊື່ອມຊຶມເອກະສານ ແລະ ຜັນຂະຫຍາຍ ມະຕິກົມການເມືອງສູນກາງພັກ, ສະບັບເລກທີ 26/ກມສພ, ລົງວັນທີ 12 ກັນຍາ 2026 ວ່າດ້ວຍການເພີ່ມທະວີການນໍາພາ-ຊີ້ນໍາຂອງຄະນະພັກທຸກຂັ້ນຕໍ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V; ເອກະສານ ກ່ຽວກັບການເພີ່ມທະວີການນໍາພາແນວຄິດ ແລະ ເສີມຂະຫຍາຍ ສິດປະຊາທິປະໄຕ ເພື່ອເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V; ເອກະສານ ເຊື່ອມຊຶມ ແລະ ກຳແໜ້ນກົດໝາຍວ່າດ້ວຍການເລືອກຕັ້ງ ສສຊ ແລະ ສສຂ; ເອກະສານເຊື່ອມຊືມ ແລະ ຈັດຕັ້ງປະຕິບັດແຜນດໍາເນີນງານຂອງຄະນະກຳມະການເລືອກຕັ້ງລະດັບຊາດ ເພື່ອເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V, ເຜີຍແຜ່, ແນະນໍາໃຫ້ຜູ້ມີສິດເລືອກຕັ້ງໄດ້ຮັບຮູ້, ເຂົ້າໃຈເເຈ້ງກ່ຽວກັບ ປະຫວັດການເຄື່ອນໄຫວ ແລະ ຜົນງານຂອງຜູ້ສະໝັກຮັບເລືອກຕັ້ງ ເປັນ ສສຊ ຊຸດທີ X ປະຈໍາເຂດເລືອກຕັ້ງທີ 3 ແຂວງຫຼວງນໍ້າທາ ແລະ ສສຂ ຊຸດທີ V ປະຈໍາເຂດເລືອກຕັ້ງເມືອງຫຼວງນໍ້າທາ.ຈາກນັ້ນ, ຜູ້ເຂົ້າຮ່ວມ ໄດ້ປະກອບຄໍາຄິດເຫັນ ແຕ່ລະບັນດາເອກະສານ ເພື່ອຄວາມເຂົ້າໃຈເປັນເອກະພາບ ແລະ ເປັນບ່ອນອີງໃນການຈັດຕັ້ງປະຕິບັດ ໃຫ້ມີຜົນສໍາເລັດ.

(ແຫຼ່ງຂ່າວ: ເມືອງຫຼວງນໍ້າທາ)