ໂດຍ: ພູວັນ
ທ່ານ ສິງໄຊ ວັນຄຳ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງຫຼວງນໍ້າທາ ໄດ້ໃຫ້ສຳພາດຕໍ່ສື່ມວນຊົນໃນວັນທີ 22 ມີນາ ຜ່ານມານີ້ວ່າ:ໂດຍປະຕິບັດຕາມຄໍາສັ່ງແນະນໍາຂອງຄະນະເລຂາທິການສູນກາງພັກ ສະບັບເລກທີ411/ຄລສພ, ລົງວັນທີ 8 ສິງຫາ 2023 ວ່າດ້ວຍການກະກຽມກອງປະຊຸມໃຫຍ່ 3 ຂັ້ນຂອງພັກ. ພາຍຫຼັງໄດ້ຮັບຄຳສັ່ງແນະນຳດັ່ງກ່າວ ຄະນະປະຈໍາພັກແຂວງໄດ້ຈັດຕັ້ງການເຊື່ອມຊຶມນິຕິກໍາພາຍໃນແຂວງ, ຈາກນັ້ນໄດ້ອອກມະຕິຕົກລົງແຕ່ງຕັ້ງຄະນະຮັບຜິດຊອບຊີ້ນໍາລວມແລະອະນຸກໍາມະການກະກຽມກອງປະຊຸມໃຫຍ່3ຂັ້ນຂອງພັກສະບັບເລກທີ88/ຄປພຂ, ລົງວັນທີ 4 ຕຸລາ 2023 ປະກອບມີຄະນະຊີ້ນໍາລວມຂັ້ນແຂວງ ແລະອະນຸກໍາມະການ 5 ອະນຸກໍາມະການຄື: ອະນຸກໍາມະການເນື້ອໃນ; ອະນຸກໍາມະການບຸກຄະລາກອນ; ອະນຸກໍາມະການປ້ອງກັນຊາດ-ປ້ອງກັນຄວາມສະຫງົບ; ອະນຸກໍາມະການຂະບວນການ ແລະພິທີການ.
ພາຍຫຼັງໄດ້ຮັບການແຕ່ງຕັ້ງຄະນະຮັບຜິດຊອບ ກໍໄດ້ເຄື່ອນໄຫວຕາມສິດ, ໜ້າທີ່ຂອງຕົນເປັນຕົ້ນໄດ້ສໍາເລັດການລົງແນະນໍາການກະກຽມຮ່າງບົດລາຍງານການເມືອງ ແລະພັດທະນາເສດຖະກິດ-ສັງຄົມ 5ປີຂອງ5 ອົງຄະນະພັກເມືອງ ແລະ 2 ອົງຄະນະພັກກອງບັນຊາການ. ລົງຊຸກຍູ້ການເປີດກອງປະຊຸມໃຫຍ່ຂັ້ນຮາກຖານພັກພາຍໃນແຂວງສໍາເລັດ75%; ປັດຈຸບັນກຳລັງຢູ່ໃນໄລຍະດໍາເນີນການສຶກສາອົບຮົມການເມືອງ-ແນວຄິດໃຫ້ແກ່ສະມາຊິກພັກ, ພະນັກງານຫຼັກແຫຼ່ງ, ທາບທາມບຸກຄະລາກອນຮອບເປີດກວ້າງເພື່ອກະກຽມເຂົ້າສູ່ກອງປະຊຸມໃຫຍ່ອົງຄະນະພັກເມືອງ ແລະ ດໍາເນີນກອງປະຊຸມໃຫຍ່ 3 ອົງການຈັດຕັ້ງມະຫາຊົນຂັ້ນເມືອງ, 2 ກອງບັນຊາການສໍາເລັດແລ້ວ30%, ຕາມແຜນຄາດຄະເນທ້າຍເດືອນພຶດສະພາ 2024 ແມ່ນໃຫ້ສໍາເລັດການດໍາເນີນກອງປະຊຸມໃຫຍ່ 3 ອົງການຈັດຕັ້ງມະຫາຊົນ, ທ້າຍປີ2024 ແມ່ນໃຫ້ສໍາເລັດກອງປະຊຸມໃຫຍ່ອົງຄະນະພັກເມືອງ ແລະ 2 ກອງບັນຊາການ, ປີ2025 ຈະໃຫ້ສໍາເລັດກອງປະຊຸມໃຫຍ່ອົງຄະນະພັກແຂວງ.
ພ້ອມນີ້ຂະບວນການກະກຽມກອງປະຊຸມໃຫຍ່ 3 ຂັ້ນຂອງພັກ ໄດ້ຕິດພັນກັບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ2023 ທົ່ວແຂວງສໍາເລັດແລ້ວ 100%; ຂະບວນການຮັກຊາດ ແລະພັດທະນາ, ວຽກງານ 3 ສ້າງ,ວຽກງານກໍ່ສ້າງຮາກຖານຕາມ 4 ເນື້ອໃນ 4 ຄາດໝາຍ ແລະການຈັດຕັ້ງປະຕິບັດ 2 ວາລະແຫ່ງຊາດເປັນຂະບວນການກວ້າງຂວາງ.
ຄໍາເຫັນ