ວັນທີ 22 ມີນານີ້, ການນໍາແຂວງຫຼວງນ້ໍ້າທາ ໄດ້ເຂົ້າວາງກະຕ່າດອກໄມ້ຢູ່ອານຸສອນສະຖານປະທານ ໄກສອນ ພົມວິຫານ ແລະ ວາງພວງມະລາຢູ່ອະນຸສາວະລີນັກຮົບນີລະນາມ ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 69 ປີ (22 ມີນາ 1955 ຫາ ວັນທີ 22 ມີນາ 2024) ແລະ ວັນຄຽດແຄ້ນຂອງປະຊາຊົນລາວ-ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 78 ປີ ໃຫ້ກຽດເຂົ້າຮ່ວມ ແລະ ເລົ່າມູນເຊື້ອໂດຍທ່ານ ຈັນທອງ ແກ້ວປະເສີດ ຮອງເລຂາພັກແຂວງ ຫົວຫນ້າຄະນະຈັດຕັ້ງແຂວງ, ມີແຂກຖືກເຊີນ ແລະ ພາກສ່ວນກ່ຽວຂ້ອງຂອງແຂວງເຂົ້າຮ່ວມ.
ທ່ານ ຈັນທອງ ແກ້ວປະເສີດ ໄດ້ໃຫ້ຮູ້ກ່ຽວວ່າ: ກັບການເສີມຂະຫຍາຍມູນເຊື້ອແຫ່ງການນຳພາ ຂອງພັກເຂົ້າໃນການຈັດຕັ້ງປະຕິບັດພາລະກິດປ່ຽນແປງໃໝ່ຢ່າງແຂງແຮງ ແລະ ເລີກເຊິ່ງ (ເນື່ອງໃນໂອກາດວັນສ້າງຕັ້ງພັກ ປະຊາຊົນປະຕິວັດລາວ ຄົບຮອບ 69 ປີ ວັນທີ (22 ມີນາ 1955 ຫາ ວັນທີ 22 ມີນາ 2024) ພັກປະຊາຊົນປະຕິວັດລາວເປັນກອງນໍາໜ້າ ແລະ ເປັນຕົວແທນແຫ່ງສິດຜົນປະໂຫຍດຂອງຊົນຊັ້ນກໍາມະກອນ ຊາວຜູ້ອອກແຮງງານບັນດາເຜົ່າ, ເຮັດສໍາເລັດພາລະກິດປົດປ່ອຍຊາດ, ລົບລ້າງລະບອບລ່າເມືອງຂຶ້ນ, ສ້າງສັງກາດໃໝ່ໃຫ້ແກ່ປະເທດຊາດ; ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນ, ພັກໄດ້ສືບຕໍ່ນໍາພາປະຊາຊົນລາວບັນດາເຜົ່າ, ປົກປັກຮັກສາເອກະລາດ ແລະ ກໍ່ສ້າງຊີວິດໃໝ່.
ທ່ານ ບຸນສາງ ອິນມະນີ ຮອງຫົວຫນ້າຄະນະໂຄສະນາອົບຮົມແຂວງ ໄດ້ປະຖະກະຖາວັນຄຽດແຄ້ນຂອງປະຊາຊົນລາວ-ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດວັນທີ 21 ມີນາ 1946 ຫາ 21 ມີ ນາ 2024 ຄົບຮອບ 78 ປີ ຊຶ່ງໄດ້ຍົກໃຫ້ເຫັນນໍ້າໃຈອັນພິລະອາດຫານຂອງນັກຮົບທີ່ອົງອາດກ້າຫານ ແລະ ຕໍ່ສູ້ເພື່ອປົດປ່ອຍປະເທດຊາດ, ຕ້ານພວກຈັກກະພັດລ່າເມືອງຂຶ້ນທັງແບບເກົ່າ ແລະ ແບບໃໝ່.
(ຂ່າວ: ອຸ້ມ ສົມນໍວັນ)
ຄໍາເຫັນ