 |
ກອງປະຊຸມຄັ້ງນີ້, ໄດ້ເຕົ້າໂຮມບັນດາຜູ້ຊ່ຽວຊານ ແລະ ຜູ້ຕາງໜ້າຈາກພາກສ່ວນສຸຂະພາບຄົນ ແລະ ສຸຂະພາບສັດ ເພື່ອປຶກສາຫາລືກ່ຽວກັບ ໄພຄຸກຄາມຂອງເຊື້ອຕ້ານຢາຕ້ານເຊື້ອ, ເພີ່ມທະວີການຮ່ວມມືແບບສຸຂະພາບໜື່ງດຽວ (One Health), ໂດຍການແບ່ງປັນປະສົບການ ແລະ ຂໍ້ມູນ ລະຫວ່າງພາກສ່ວນສຸຂະພາບຄົນ ແລະ ສັດ, ໂດຍສະເພາະແມ່ນການສຸມໃສ່ສິ່ງທ້າທາຍດ້ານ AMR. ໃນກອງປະຊຸມ ທ່ານ ວີເຊັນ (Vicent Brioudes) ຫົວໜ້າໜວ່ຍງານຝຶກອົບຮົມຕ່າງປະເທດ (ໂຮງຮຽນສັດຕະວະແພດ ປະເທດຝຣັ່ງ) ແລະ ທ່ານ ຊາຍຄໍາ ສຸກສະນິດ ຮອງຫົວໜ້າພະແນກກະສິກໍາ ແລະ ສິ່ງແວດລ້ອມແຂວງ ໄດ້ມີຄຳເຫັນຕໍ່ກອງປະຊຸມ ໂດຍເນັ້ນໃຫ້ຜູ້ເຂົ້າຮ່ວມ ຮັບຟັງການນຳສະເໜີ ການພັດທະນາ-ຈັດຕັ້ງປະຕິບັດກິດຈະກຳການປູກຈິດສໍານຶກ ແລະ ການຮ່ວມມືສຸຂະພາບໜື່ງດຽວ ທີ່ສຸມໃສ່ແກ້ໄຂບັນຫາວຽກງານເຊື້ອຕ້ານຕໍ່ຢາຕ້ານເຊື້ອ, ເພີ່ມທະວີໃນການສ້າງຂໍ້ມູນການທົດລອງຢາຕ້ານເຊື້ອ (ສຳລັບພາກສ່ວນສຸຂະພາບສັດ), ປັບປຸງວຽກງານການເກັບຕົວຢ່າງ ແລະ ການຂົນສົ່ງຕົວຢ່າງໄປຫາລະດັບແຂວງ ແລະ ລະດັບສູນກາງ, ລວມທັງການແປຜົນສໍາລັບລະດັບແຂວງ (ສຳລັບພາກສ່ວນສຸຂະພາບຄົນ), ປະກອບສ່ວນໃນການເຜີຍແຜ່ຂໍ້ມູນ AMR ແລະ ດໍາເນີນກິດຈະກໍາການສະໜັບສະໜູນຈາກອຳນາດການປົກຄອງທ້ອງຖິ່ນ.
ໂອກາດນີ້, ທ່ານ ນາງ ສຸພາພອນ ພະນາວັນ ໄດ້ກ່າວເປີດກອງປະຊຸມວ່າ: ກອງປະຊຸມຄັ້ງນີ້, ເປັນການຈັດຕັ້ງປະຕິບັດຍຸດທະສາດແຫ່ງຊາດເພື່ອການພັດທະນາ, ທັງເປັນການປະຕິບັດຄາດໝາຍ ທີ່ ສປປ ລາວ ມີຕໍ່ສາກົນ, ຈຶ່ງຮຽກຮ້ອງໃຫ້ພາກສ່ວນກ່ຽວຂ້ອງ ພ້ອມກັນສຸມໃສ່ສ້າງຖານຂໍ້ມູນໃຫ້ມີຄວາມຖືກຕ້ອງ, ເພື່ອຮັບປະກັນດ້ານສຸຂະພາບຂອງຄົນ ແລະ ສັດ ໃນການຜະລິດກະສິກຳໃຫ້ທ້ອງຖີ່ນ ມີປະສິດທິພາບ ແລະ ປະສິດທິຜົນ.
 |
ການຝຶກອົບຮົມຄັ້ງນີ, ໄດ້ແບ່ງອອກເປັນ 3 ພາກຄື: ພາກທີ I ແມ່ນການປູກຈິດສໍານຶກຂອງສຸຂະພາບໜຶ່ງດຽວ ແລະ ຄໍາແນະນໍານະໂຍບາຍ AMR, ພາກທີ II ການທົດລອງຢາຕ້ານເຊື້ອ (ສຳລັບພາກສ່ວນສຸຂະພາບສັດ) ແລະ ການເກັບຕົວຢ່າງ (ສຳລັບພາກສ່ວນສຸຂະພາບຄົນ) ແລະ ພາກທີ III ການແບ່ງປັນຂໍ້ມູນ ແລະ ດໍາເນີນກິດຈະກໍາການສະໜັບສະໜູນຈາກ ອົງການປົກຄອງທ້ອງຖິ່ນ, ທັງຈັດໃຫ້ມີການສົນທະນາ ເພື່ອໃຫ້ຜູ້ເຂົ້າຮ່ວມໄດ້ແລກປ່ຽນຄວາມຄິດເຫັນ ແລະ ນຳສະເໜີຜົນການສົນທະນາກ່ອນການສະຫຼຸບກອງປະຊຸມ, ພ້ອມນັ້ນ ໄດ້ລົງແຈກຢາຍໂປສເຕີໃຫ້ປະຊາຊົນ ແລະ ຕິດໂປຣສະເຕີ ໃສ່ສະຖານທີ ທີ່ມີຊຸມຊົນອາໄສຢູ່ຫຼາຍ.
(ຂ່າວ: ອາພຸດເດດ ບຸບຜາ, ພາບ: ທະນູສິນ ອິດທິພົນ)
ຄໍາເຫັນ