 |
ໃນພິທີ, ທ່ານ ສຸວັນທອນ ມະນີພັນ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການຮັບຮອງເອົາຄະນະບໍລິຫານງານພັກແຂວງ ແລະ ຜ່ານມະຕິຕົກລົງຂອງຄະນະປະຈໍາພັກແຂວງ ກ່ຽວກັບການຍົກຍ້າຍ ແລະ ແຕ່ງຕັ້ງ ໜ້າທີ່ພະນັກງານນໍາພາ - ຄຸ້ມຄອງພາຍໃນແຂວງ, ໂດຍຍົກຍ້າຍ ທ່ານ ຄໍາຄ່ອງ ພົມມະປັນຍາ ກໍາມະການປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ ໄປເປັນປະທານ ຄະນະກວດກາພັກ ປະທານອົງການກວດກາລັດ ແລະຫົວໜ້າອົງການຕ້ານການສໍ້ລາດບັງຫຼວງ ແຂວງຫຼວງພະບາງ, ຍົກຍ້າຍ ທ່ານ ທອງຈັນ ລັດຕະນະປະດິດ ຮອງປະທານຄະນະກວດກາພັກ ຮອງປະທານອົງການກວດກາລັດ ແລະ ຮອງຫົວໜ້າ ອົງການຕ້ານການສໍ້ລາດບັງຫຼວງ ແຂວງຫຼວງພະບາງ ໄປເປັນຫົວໜ້າ ຄະນະໂຄສະນາອົບຮົມແຂວງຫຼວງພະບາງ ແລະຍົກຍ້າຍ ທ່ານ ພຽງຄໍາ ທຳມະວົງ ຮອງຫົວໜ້າພະແນກກະສິກຳ ແລະ ສິ່ງແວດລ້ອມແຂວງ ໄປປະຈໍາການ ຢູ່ຫ້ອງວ່າການແຂວງຫຼວງພະບາງ.
ທ່ານ ບຸນເລື່ອມ ມະນີວົງ ໄດ້ມີຄໍາເຫັນຊີ້ນໍາໃຫ້ທຸກພາກສ່ວນ ມີຄວາມຮັບຮູ້ ແລະ ເຂົ້າໃຈຕໍ່ການປັບປຸງສັບຊ້ອນບ່ອນປະຈຳການຂອງພະນັກງານນຳພາ-ຄຸ້ມຄອງ ເພື່ອໃຫ້ສອດຄ່ອງກັບການປະຕິບັດໜ້າທີ່ການເມືອງໃນໄລຍະໃໝ່, ທັງເປັນວຽກງານປົກກະຕິທີ່ໄດ້ຈັດຕັ້ງປະຕິບັດ ນັບແຕ່ສູນກາງລົງຮອດທ້ອງຖິ່ນ, ພ້ອມທັງມີຄຳເຫັນຊີ້ນຳ ໃຫ້ຜູ້ທີ່ໄດ້ຮັບໜ້າທີ່ໃໝ່ ພ້ອມກັນສືບຕໍ່ປະຕິບັດໜ້າທີ່ວຽກງານຂອງຕົນ ໃຫ້ມີຜົນສຳເລັດຕາມຄາດໝາຍທີ່ວາງໄວ້ ແນໃສ່ເຮັດໃຫ້ວຽກງານແຕ່ລະຂົງເຂດມີຜົນສໍາເລັດ ຕາມຄາດໝາຍທີ່ວາງໄວ້, ຕ້ອງຖືສຳຄັນ ການຮັກສາຄວາມສາມັກຄີພາຍໃນໃຫ້ແໜ້ນແຟ້ນ, ມີການແບ່ງງານ ແບ່ງຄວາມຮັບຜິດຊອບໃຫ້ກັນຢ່າງລະອຽດ ທັງມີການຕິດຕາມກວດກາ ການປະຕິບັດວຽກງານໃຫ້ເປັນປົກກະຕິ.
ຂ່າວ-ພາບ: ທະນູສິນ ອິດທິພົນ
ຄໍາເຫັນ